Smiley face
Smiley face
Smiley face

ژنێک لە تابلۆکانیدا ئاوڕ لە پەراوێزخراوەکانی کۆمەڵگا دەداتەوە

2018-05-08 10:58:32



ڕۆژنیوز - سەمیرا شەهابی

 

ژنێکی گەنج بە فڵچە و ڕەنگەکانی ئاوڕ لە کەسە پەراوێزخراوەکانی ناو کۆمەڵگا دەداتەوە و تابلۆکانی بە دیمەنی ژاکاوی ئەوان دەنەخشێنێت.

 

هەرکاتێک کەسێک توشی گرفتێکی دەروونیی دەبێت، یەکەم ترس و دڵەراوکێ کە ڕووبەڕووی دەبێتەوە ئەوەیە کە چواردەور و کۆمەڵگا جیاوازتر مامەڵەی لەگەڵدا دەکەن! بۆیە ئەو مرۆڤانە لە ئەنجامدا پەراوێز دەخرێن و لەلایەن خەڵکەوە بە شێوازێکی نائاسایی بۆیان دەڕواندرێت، بۆ کاڵکردنەوەی ئەو جیاوازییەش ژنێکی گەنجی شێوەکار بە فڵچەکەی دەستی وێنەیان دەکێشێت.

 

لەرێ نەجمەدین، ژنێکی تەمەن ٢٠ساڵی لە دایکبووی شارۆچکەی چەمچەماڵ-ی سەر بە پارێزگای سلێمانییە و خوێندکاری قۆناغی سێی بەشی شێوەکاریی کۆلێژی هونەرە جوانەکانی شاری سلێمانی-یە، لە تابلۆکانیدا تیشکی خستووەتە سەر ئەوکەسانەی، کە تووشی نەخۆشیی دەرونیی بوون و لە کۆمەڵگادا بە (شێت) ناودەبرێن و لە ژیانی ئاسایی دابڕاون.

 

 

لەرێ ئامانجی سەرەکیی لە کێشانی ئەو تابلۆیانە دەگەڕێنێتەوە بۆ ئەوەی کۆمەڵگا، سەرەڕای پەراوێزخستن بە ئەو چینە، گاڵتە بەو دۆخە دەکرێت کە تێیدا دەژین و دەیانکەنە مژاری گاڵتەئامێزی تۆڕە کۆمەڵایەتییەکان.

 

لایەنێکی تری تابلۆکانی لەرێ، تایبەت کراوە بەو ژنانەی کە توندوتیژییان بەرامبەر دەکرێت و لە هەندێک وڵاتی وەک ئێران-دا تێزاب دەڕژێندرێت بەڕوویاندا.

 

 

لەرێ هونەر بە بەشێکی ژیانی ناودەبات و دەڵێت: هونەر و وێنە کێشان ئاڕاستەی ژیانی منی دیارییکردووە و لەم ڕێگایەوە دەتوانم ئەوەی لە ناخمایە بیخەمەڕوو.

 

 

لە تابلۆکانی لەرێ-دا ڕەنگی  جوانییەکان و خۆشی نابیندرێن و تەنیا ڕوخساری شێواو و خەمبار بەدیدەکرێت، هەربۆیە دەڵێت: دەمەوێت بەم شێوازی وێنەکێشانمە ناشرینییەکان نیشان بدەم، نامەوێت ماسکێک بکەم بە ڕووی کارەکانمدا و بڵێم بەڵێ ئێرە وایە و بێ کێشەیە، لە کاتێکدا ئێمە بەهۆی کێشە و گرفتەکانەوە تووشی تێکچوونێکی دەروونی بووین.

 

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin