Smiley face
Smiley face
Smiley face

شانۆ و ڕۆڵی ژنان لەو بوارەدا

2018-05-03 11:14:45



ڕۆژنیوز ـ سەمیرا شەهابی

 

ساڵانێکی زۆرە سەکۆی شانۆ و نواندن، بووەتە هۆیەک بۆ گواستنەوەی خۆشی و ناخۆشییەکانی ناو کۆمەڵگا و ژنانیش لەو بوارەدا ڕۆڵێکی بەرچاو و کارایان بینیوە.

 

سەرهەڵدانی شانۆ لە ساڵانی شەستەکانی سەدەی ڕابردوو لە باشوری کوردستان و دەرکەوتنی ژنان لەسەر سەکۆی شانۆ لە دوای ساڵانی هەشتاکان لاپەڕەکانی مێژووی بە چەشنێکی جوان هەڵدایەوە، واتە سەرەتا پیاوان ڕۆڵی ژنانیان بە جلوبەرگی ژنانەوە دەبینی، دواتر خودی ژنانن بە ڕۆڵی خۆیانەوە چوونە ناو شانۆ و تا بێت هەنگاونانیان لەو بوارەدا بەرەو پێش دەڕوات.

 

شاناز محەمەد، یەکێکە لەو ژنانەی کە چەندین ساڵە کاری نواندن لە دراما و شانۆدا دەکات و لەو بارەیەوە وتی: دڵخۆشم بەوەی کە توانیومە ئازارەکانی کۆمەڵگا به هونەر بەرجەستە بکەم.


 

هەروەها، شاناز لە پیاهەڵدانی بۆ شانۆ دەڵێت: شانۆ نوێبوونەوە و پاکبوونەوەیە لە زۆر شت و سحرێکە کە لێوانلێوە لە جوانیی، کە لە درامادا ئەو جوانی و سحرە بوونی نییە.

 

کیژان حەمە جەزا، شانۆکارێکی دیکەیە و لە شانۆیەکدا ڕۆڵی دەبینێت، کە لە هاوسەرەکەی جیابووەتەوە، لەبارەی ڕۆڵەکەیەوە، وتی: بەم نواندنەم هەوڵدەدەم پەیامێک بدەمە کۆمەڵگا، کە ئەو ژنەی لە هاوسەرەکەی جیابووەتە یاخود هاوسەرەکەی لەدەستداوە، وەک هەموو تاکەکان مرۆڤە و نابێت ژیانی لەنێو وشەی بێوەژندا قەتیس بکرێت.

 

 

لە رۆژهەڵاتی کوردستان، شانۆ پێشکەوتنی باشی بە خۆیەوە بینییوە و بەشداریی ژنان-یش لە نواندندا لەجاو باشوری کوردستان زۆر زیاترە.

 

ساریا ئەمینی، خەڵکی شاری سەقز-ی ڕۆژهەڵاتە و لە شانۆی سەرشەقامی شاری سلێمانی-دا بەشداری کردبوو، لەبارەی ڕۆڵی ژنانەوە لە ڕۆژهەڵات وتی: ژنان لە ڕۆژهەڵاتی کوردستان بە جۆش و خرۆشەوە لەناو هونەری شانۆدا ڕۆڵ دەبینن و توانیویانە بە شێوازە جیاوازەکان بچنە ناو دڵی خەڵک و زۆر بابەتی کۆمەڵایەتی بخەنە بەر دیدی بینەران.

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin