Smiley face
Smiley face
Smiley face

پاسەوانان چاوەڕێی وەڵامی حکومەتن

2018-04-26 11:18:39



ڕۆژنیوز - ڕۆزە محەمەد

 

یەکەی پاسەوانانی حزبەکان لە چاوەڕوانی چاککردنی سیستمی پاشەکەوتی مووچەکانیان لەلایەن سەرۆکی حکومەتەوە و لە ئەگەری چاکنەکردنیشیدا، خۆپیشاندانێکی بەرفراوان ئەنجام دەدەن.

 

بەهۆی ئەوەی ٦٥% مووچەی یەکەی پاسەوانی حزبەکان پاشەکەوت دەکرێت، ماوەی هەفتەیەک پاسەوانان لە سلێمانی و هەولێر و ڕانیە و گەرمیان و چەمچەماڵ. خۆپیشاندانیان ئەنجامدا.

 

لەسەر ئەنجامی چالاکییەکانیان، عەمید بەمۆ عومەر، وتەبێژی ئەنجومەنی باڵای نوێنەرایەتی پۆلیسی پاسەوانی حزبەکان لە شاری سلێمانی بە ڕۆژنیوزی وت: دوێنێ لە کۆبونەوەمان لەگەڵ حزبەکان و ئەندامانی مەکتەب سیاسی یەکێتی و جەلال شێخ کەریم بریکاری وەزارەتی ناوخۆی هەرێمی کوردستان بەڵێنیان پێداوین، کە لەگەڵ سەرۆکی حکومەت و جێگرەکەی چەند ڕۆژێک کاتیان بدەینێ، هەوڵبدەن کە مووچەکانمان لەگەڵ هاوپیشەکانمان لە هەموو بەڕێوبەرایەتییەکانی ناو وەزارەتی ناوخۆ هاوتا بکەنەوە.

 

داواکارییان بۆ هاوتاکردنی مووچەکانیان لەبەرئەوەیە کە مووچەی پاسەوانانی دیکەی بەڕێوبەرایەتییەکانی وەزارەتی ناوخۆ بە ڕێژەی (١٠-٣٠)% مووچەیان لێ پاشەکەوت دەکرێت، بەڵام یەکەی پاسەوانی حزبەکان ٦٥% مووچەکانیان پاشەکەوت دەکرێت، هەر وەک عەمید بەمۆ دەڵێت:"ئەوەش غەدرێکی گەورەیە".

 

ئاماژەی بەوەشدا:بریکاری وەزارەت لە چەند ڕۆژی ڕابردوودا ڕایگەیاند، کە لە مووچەی مانگی داهاتوو دەستکاری پاشەکەوتەکە دەکەن، بەڵام ئێمە ڕەتمانکردەوە، لەبەرئەوەی ئێرە وڵاتی قەزا و قەدەرە و نازانین مانگی داهاتوو مووچە دەدرێ یان نادرێت.

 

دەستکاریی مووچەکانیان کراوە و عەمید بەمۆ دەڵێت:"کۆتا دەستکاری مووچە کە بۆ ئێمە کرابێت ئەوەیە کە ٩٩ هەزار دینار بۆ مووچەکانمان زیاد کراوە، کە ئەوەش هیچ لە ژیانمان ناگۆڕێت".

 

لە دوای تەواو بوونی مۆڵەتەکەیان کە بۆ حکومەتیان دیارییکردووە مووچەکانیان چاکبکەن، کە تا ناوەڕاستی هەفتەی داهاتووە، وەک ئەو وتەبێژە دەڵێت:"خۆپیشاندانێکی بەرفراوانی شارستانی ئەنجامدەدەین".

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin