Smiley face
Smiley face
Smiley face

ڕووناک مەجید پرۆژەکانی خۆی و لیستەکەی بۆ ناوچە دابڕێندراوەکان دەخاتەڕوو

2018-04-25 10:47:54



ڕۆژنیوز - ڕۆزە محەمەد

 

ڕووناک مەجید، کاندیدی لیستی ١٢٠(نەوەی نوێ) لە پارێزگای سەلاحەدین، پرۆژەی خۆی لیستەکەی بۆ پارێزگاکە دەخاتەڕوو.

 

کاندیدێکی نەوەی نوێ پرۆژەکانی لە پرۆژەکانیدا هەوڵدەدات بۆ  پێکەوە ژیانی پێکهاتە جیاوازەکان و بەدەستهێنانی مافی ژن و نەهێشتنی فرەژنی و باشکردنی خزمەتگوزارییەکانی ناوچە دەبڕێنراوەکان.

 

ڕوناک مەجید، کاندیدی ژمارە ٢ لەسەر لیستی ١٢٠ی نەوەی نوێ، کە پێکهاتووە لە (تەڤگەری ئازادیی کۆمەڵگەی کوردستان، بەرەی دیموکراسیی گەل و جوڵانەوەی نەوەی نوێ)، کە تاکە لیستی کوردیی پارێزگای سەلاحيدینە، لەم چاوپێکەوتنەی ڕۆژنیوز-دا پرۆژەکانی بۆ ژن و پارێزگاکە دەخاتەڕوو.

 

دەقی چاوپێکەوتنەکە:

 

-پرۆژەی ئێوە بۆ خەڵکی ناوچەدابرێندراوەکانی پارێزگای سەلاحەدین چییە؟

 

"دەبێت پێکەوەژیان لەنێوان پێکهاتە جیاوازەکان دروست بکەینەوە"

 

ڕوناک مەجید: لەو ناوچانەدا بەهۆی ئەوەی کە سێ پێکهاتەی کورد و عەرەب و تورکی بەهەردوو مەزهەبەکەیەوە تێدایە لە شیعە و سونە تا دێت کێشە و ململانێکان قوڵتر دەبێتەوە و زیاتر لە یەکتر دەترازێن، بەهۆی ئەو ململانێ سیاسیانەی کە حزبە سیاسییەکان لەو ناوچانەدا پەیڕەویان کردووە و بەهۆی دەستێوەردانی دەوڵەتە هەرێمەکان لە بارودۆخی عێراقدا، بۆیە ئێمە دەبێت کارێک بکەین، کە متمانە بۆ کەمە نەتەوەییەکانی ئەو ناوچانە بگەڕێنینەوە، هەروەها پێکەوەژیان لەنێوان پێکهاتە جیاوازەکان دروست بکەینەوە تا چیتر نێوانی عەرەب لە کورد و کورد لە عەرەب و تورکمان لە عەرەب و کورد و سونە و شیعە لە یەکتر ئاڵۆز نەبێت، بەڵکو ژیانی چەند ساڵەی پێکەوەژیانی کەمەنتەوەییەکان دەگەڕێنینەوە.

 

-وەک کاندیدێکی ژن چ کارێک بۆ ژنانی سنوورەکە دەکەیت؟

 

"هەوڵدەدەین هانی ژنان بدەن کە خۆیان ئازاد بکەن"

 

ڕوناک مەجید: سەلاحەدین ناوچەیەکە کە بەداخەوە ژنان تیایدا بەهۆی ململانێ سیاسیی و مەزهەبگەراییەکانەوە قوربانی یەکەمن و ستەملێکراون، ڕێگەیان پێنادرێت کە بێنە دەرەوە و داوای مافەکانی خۆیان بکەن، بۆیە ئێمە هەوڵدەدەین کە مافی ژنان بەدەستبهێنین و نەهێڵین بکوژانی ژن بەر لێبوردنی گشتی بکەون و ئازاد بکرێن، بەڵکو هەوڵی سزای هەتا هەتاییان بۆ دەدەین، هەروەها هەوڵدەدەین یاسای باری کەسێتی لە بەرژەوەندی ژنان هەموار بکەینەوە و بەشودانی منداڵان و فرەژنی نەهێڵین، هەروەها هەوڵدەدەین هانی ژنان بدەن کە خۆیان ئازاد بکەن و بێنە ناو سیاسەتەوە، بۆیە داوا لە ژنان دەکەم کە دەنگ بە کاندیدە ژنەکان بدەن تاوەکو پشت و پەنا بۆ خۆیان دروست بکەن.

 

-لەڕووی خزمەتگوزارییەوە چ پرۆژەیەکتان هەیە؟

 

"دەتوانین خورماتوو بکەینە سەرچاوەی داهاتی هەموو ناوچەکە"

 

ڕووناک مەجید: سەلاحەدین لەڕووی خزمەتگوزارییەوە زۆر وێرانە، هەرچەندە لە ڕووی کشتوکاڵی و بازرگانییەوە دەتواندرێت سودێکی زۆری هەبێت بۆ ئابووریی لەبەرئەوەی کە باشوری کوردستان دەبەستێتەوە بە عێراقەوە، بەڵام بەداخەوە کە لە ماوەکانی ڕابردوو ئابووریی ئەو ناوچەیە تەنها بۆ گیرفانی چەند کەسێک دەچوو، بۆیە لە ڕووی ئابوورییەوە دەتوانین خورماتوو بکەینە سەرچاوەی داهاتی هەموو ناوچەکە چی لە ڕووی کشتوکاڵ و داهاتی ژێر زەوی وەک قیر و گەچ و نەوت، بۆیە دەبێت ئەو ناوچەیە بۆ خۆی بگەڕێتەوە و بۆ خزمەتگوزارییەکانی خۆی خەرج بکرێت، نەک کۆمەڵێک کەس خۆی پێدەوڵەمەند بکات و خەڵکەکەی بە شێوەیەکەی زۆر هەژارانە بژین، بۆیە پرۆژەمان ئەوە دەبێت کە داهاتی ناوچەکە بۆ خۆی بێت و بۆ پرۆژە خزمەتگوزارییەکانی بۆ خەرج بکرێت.

 

-پێشوازیی هاوڵاتیانی ناوچەی سەلاحەدین لە ئێوە وەک کاندیدێکی ژن چۆنە؟

 

ڕوناک: پییان سەیرە، کە ژنێک لەو ناوچەیەدا و کورد بێت و کاندید بێت، بۆیە پێشوازی باشم لێکرا و هەمووان پێیان دەوتم دەنگمان بۆ تۆیە، دێن و سەردانی بارەگاکەمان دەکەن و پرۆژەکانی خۆمانیان بۆ باسدەکەین.

 

 

ش.ف

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin