Smiley face
Smiley face
Smiley face

کەنەکە هێرشی سەر کۆڵبەران و سیاسەتی برسیکردن لە ڕۆژهەڵات ئیدانە دەکات

2018-04-25 09:24:37



ڕۆژنیوز - ناوەندی هەواڵەکان

 

کەنەکە هێرشی سەر کۆڵبەران و سیاسەتی برسیکردن و بێکارکردنی خەڵکی ڕۆژهەڵات ئیدانە دەکات و داوا دەکات، کە خەڵکی کوردستان لە یەکێتیییەکی نەتەوەییدا خاوەنداری لە ڕۆژهەڵاتی کوردستان بکات.

 

ئەمڕۆ، کۆنسەی بەڕێوەبەرایەتیی کۆنگرەی نەتەوەیی کوردستان-کەنەکە، لەبارەی هێرش بۆ سەر کۆڵبەران ڕاگەیەندراوێکیان بڵاوکردەوە.

 

لە ڕاگەیەندراوەکەی کەنەکەدا هاتووە: مێژووی نزیکەی ٤٠ ساڵەی کۆماری ئیسلامی ئێران مێژووی کوشتن، ڕاوەدوونان، زیندانیکردن و ترساندنی گەلانی ئێرانە، بە تایبەتیی دژ بە خەڵکی ڕۆژهەڵاتی کوردستان کە هەمیشە ناوەندی ئازادیخوازیی بووە.

 

باس لەوەشکراوە:"ڕژێمی داگیرکەریی ئێران سەرەڕای ئەوەی رۆژهەڵاتی کوردستانی کردووە بە سەربازگەیەکی گەورە و بە بنکەی ئیتلاعات و پاسدار و بەسیج، بنەمای ئابووری کوردستانیشی خاپوور و وێران کردووە، نەک هەر لە هیچ روویەکەوە بایەخ بە بووژاندنەوەی ئابووریی لە کوردستان نادات، بەڵکو بێکاریی و بە ئەستەم دابینکردنی بژێوی ژیانیشی لە خەڵک قەدەغە کردووە و هەر رۆژەی بە بیانوویەک هێرش دەکاتە سەر خەڵکی کوردستان، ئەم سیاسەتی بێکارکردن و برسیکردن و قەرزدارکردنە پایەیەکی ستراتیژیی سیستمی داگیرکەرییە.

 

ڕاشیان ئاماژەی بەوەشکردووە: ژمارەی کوشتن و گولەبارانکردنی کۆڵبەران ڕۆژ بە ڕۆژ لە زیادبووندایە، سەرەرای بانگی ئاشتیانەی کورد، کۆماری ئیسلامیی ئێران لە سەر ئەم دەستدرێژیی و پێشێلکاریانەی مافی مرۆڤ بەردەوامە.

 

کەنەکە ڕاشیگەیاندووە:"کۆنگرەی نەتەوەیی کوردستان بە توندیی دڕندەکاریی کۆماری ئیسلامیی دژ بە کۆڵبەران شەرمەزار دەکات و پشتگیریی لەو ناڕەزاییە بەریینە دەکات کە بە نیشاندانی ″سفرەی خاڵیی‟ پێ دەنێتە یازدەهەمین ڕۆژی خۆی و خەڵکان داوای خۆیان بۆ ئاشتیی و نان و ئازادیی دەردەبڕن، ئەو جۆرە لە نیشاندانی ناڕەزاییەتیی ساکارترین شێوەی دەربڕینی مرۆڤی سەربەرزە بۆ ژیانێکی ئاسوودە کە مافی ڕەوای خۆیەتی".

 

لە کۆتایشدا کۆنگرەی نەتەوەیی کوردستان- کەنەکە داوای لە کوردستانیان کرد، لە هەر شوێنێک هەن کە خاوەنداریەتی لە خەڵکی ڕۆژهەڵاتی کوردستان بکەن و برەو بە یەکێتییەکی نەتەوەیی پتەو بدەن.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin