Smiley face
Smiley face
Smiley face

هاوڵاتییان داواکارییان لە لیست و کاندیدەکان هەیە

2018-04-25 09:00:14



ڕۆژنیوز - ڕۆزە محەمەد

 

چین و توێژە جیاوازەکان داواکارییەکانیان ئاڕاستەی کاندید و لیست و قەوارەکان دەکەن، کە پرژەکانییان لە بانگەشەدا باسی دەکەن جێبەجێی بکەن، هاوکات داواکارییەکانی خۆیان دەخەنەڕوو، تێیدا داوای پاراستنی سنوورەکان و کردنە دەرەوەی سوپای بێگانە دەکەن.

 

بڕیارە ١٢ی ئایار هەڵبژاردنی ئەنجومەنی نوێنەرانی عێراق بەڕێوەبچێت و لیست و کاندیدەکانیش لە ١٥ی ئەم مانگەوە دەستیان بە بانگەشە کردووە، لە شاری سلێمانی هاوڵاتییان لە رێگەی ڕۆژنیوزەوە داواکارییەکانیان ئاراستەی لیست و کاندیدەکان دەکەن.

 

عوسمان عەلی، میوزیکژەنێکی سەرشەقامە و  دەڵێت: داواکارم لە کاندید و لیستەکان کە گرنگی بە هونەرمەندان بدرێت و شوێنی زیاتری هونەریان بۆ بکرێتەوە، هەروەها گرنگی بە منداڵان بدرێت بە تایبەتی ئەو منداڵانەی کە کاریان پێدەکرێت لەناو باخ و لای ترافیکەکاندا، هەروەها گرنگی بە خوێندنگاکان بدەن.

 

دنیا سۆران، کچە خوێندکارێکی زانکۆی سلێمانییە، داواکارییەکی لەم شێوەیەی بۆ لیست و کاندیدەکان هەیە: داوا لەو لیست و قەوارانە دەکەم کە هانی گەنجان بدەن کە بیرۆکە و پرۆژەکانیان بخەنەگەڕ، بۆئەوەی ئەو وڵاتە و ئەو ناوچەیەی کە ئەوانی تێدان پێشیبخەن، هەروەها هیوادارم کە کاندیدەکان پرۆژەی بانگەشەکانیان جێبەجێ بکەن.

 

 

دنیا، وتیشی: زۆر ڕوون و ئاشکرایە کە سەدان هەزار دەرچووی زانکۆ و پەیمانگاکان هەن کە لەماڵەوەن و هیچ ئیشێکیان نەدۆزیوەتەوە، بۆیە گرنگە کە هەلی کاریان بۆ بڕەخسێت، چ لە کەرتی حکومی بێت یاخود کەرتی تایبەت.

 

هەروەها یادگار مەولود-ی پێشمەرگە وتی: داواکارم لە سەرجەم لیست و کاندیدەکان کە کوردانە لە ئەنجومەنی نوێنەرانی عێراق داوای مافەکانی کورد بکەن، نەبن بە دوو پارچە و سێ پارچە، وە هیوادارم ئەو کاندیدەی من دەنگی پێدەدەم لە ئاستی ئەو دەنگەی مندا بێت، هاوڵاتیان داوای مافە سەرەتاییەکانیان دەکەن، هەر لە مووچە و ئاو و کارەبا و خزمەتگوزارییەکانەوە.

 

 

یادگار، دەربارەی پاراستنی سنوورەکانی کوردستان وتی: پێمخۆشە خۆمان کە پێشمەرگەمان هەیە سنوری خۆمان بپارێزین، نەک هێزی بێگانە لە سنورەکانمان جێگیر بێت، ئەو هێرشانەی کە لە عەفرین کردیان ئەوا ڕەنگە لێرەش بیکەن، هەموومان کوردین و ئەگەری ئەو هێرشانە هەیە، بۆیە گرنگە کاندید و لیست و قەوارەکان هەوڵی دەرکردنی هێزی بێگانە بدەن.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin