Smiley face
Smiley face
Smiley face

کەجەدە کۆمەڵکوژکردنی ئەرمەنییەکانی بە توندیی شەرمەزار کرد

2018-04-24 11:06:21



ڕۆژنیوز - ناوەندی هەواڵەکان

 

کۆنگرەی جڤاکی دیموکراتی- کەجەدە، جینۆسایدی ئەرمەنییەکان لە ساڵی ١٩١٥ی بە توندی شەرمەزارکرد و ڕایگەیاند، کە ئەو کۆمەڵکوژییە ئەمڕۆ لە عەفرین بەردەوامی هەیە.

 

ئەمڕۆ لە ساڵیادی جینۆسایدی ئەرمەنییەکان لە ساڵی ١٩١٥دا، کۆنگرەی جڤاکی دیموکرات- کەجەدە ڕاگەیەندراوێکی بڵاوکردەوە.

 

لە ڕاگەیەندراوەکەدا هاتووە: سیاسەتی کۆمەڵکوژی و قڕکردنی حکومەتی تورک لە ئاناتۆلیا و مەزۆپۆتامیا لە سەر بنەمای سیاسەتی یەک نەتەوە و یەک زمان لە کۆنەوە دەستیپێکردووە، ئەو عەقڵییەتە ئەمڕۆش لەلایەن حکومەتی تورکەوە بەردەوامی پێدەدرێت، لەو چوارچێوەیەدا کوردەکان، ئەرمەنییەکان، سوریانەکان، ئێزدییەکان، چەرکەس و ژمارەیەکی دیکە لە گەلانی ناوچەکە کۆمەڵکوژکراون، یەکێک لە گەورەترینی ئەو کۆمەڵکوژییانە، قڕکردنی گەلی ئەرمەنی لە ساڵی ١٩١٥دا بوو.

 

لە بەردەوامیدا هاتووە: ١٠٣ ساڵ بە سەر ئەو تراژیدییەدا تێپەڕیوە، هێشتا حکومەتی تورک دان بەو کۆمەڵکوژییەدا نانێت و ئینکاریی دەکات، هەر لە سەر بنەمای ئەو ئینکارکردنەشە کە سیاسەتی قڕکردن بە سەر گەلی ئەرمەنیدا هاتووە و ئەمڕۆش بەسەر گەلی کورد دێت، عەفرین نموونەی هەر بەرچاوی ئەو کۆمەڵکوژییانەیە.

 

کەجەدە ئاماژەی بەوەشداوە: بەڵام ئەو سیاسەتە نەیتوانیوە ئیرادەی گەلەکەمان تێکبشکێنێت کە ساڵانێکی درێژە بۆ ئازادی تێدەکۆشێت.

 

لە کۆتایی ڕاگەیەندراوەکەدا هاتووە: قڕکردنی گەلی ئەرمەنی لە ساڵی ١٩١٥دا بە توندی شەرمەزاردەکەین و بانگەوازیی حکومەتی ئاکەپەش دەکەین، کە دەست بەرداری سیاسەتی قڕکردن و لەناوبرنی گەلانی دیکە بێت.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin