Smiley face
Smiley face
Smiley face

​لە هەڵەبجە دیبەیتێک بۆ سێ‌ مامۆستای زانكۆ بەڕێوەچوو

2018-04-23 20:04:33



ڕۆژنیوز – جیهاد هەورامی

 

كتێبخانەی هەژار موكریانی لە شاری هەڵەبجە، دیبەیتێكی بۆ بەناونیشانەکانی "بەراوردی سیكۆلاریزم لەنێوان وڵاتانی ڕۆژهەڵات و ڕۆژئاوا"، "پێگەی ژن لە كایەی سیاسیی" و "هێزەكانی ڕاكێشانی دەنگی خەڵك لە وڵاتانی ڕۆژهەڵات" بۆ سێ‌ مامۆستای زانكۆی سلێمانی ساز كرد.

 

ئێوارەی ئەمڕۆ، کتێبخانەی هەژار موکریانی لە شاری هەڵەبجە، دیبەیتێكی كراوەی بۆ سێ‌ مامۆستای زانكۆی سلێمانی سازکرد.

 

سەرەتا ماجد خەلیل، مامۆستای زانکۆ، بابەتەكەی خۆی بەناونیشانی "بەراوردی سیكۆلاریزم لەنێوان وڵاتانی ڕۆژهەڵات و ڕۆژئاوا" پێشكەشكرد و وتی: سیكۆلاریزم لە ڕۆژئاوا و بەتایبەت لە وڵاتانی ئەوروپا لەدوای سەردەمی ڕێنینساس و شۆڕشی پیشەسازی بەرەوپێشچوونێكی باشی بەخۆیەوەبینی و بەتەواوەتی چەسپا، دەسەڵاتی ئایینی لە دەسەڵات و سیستمی حوكمڕانی جیاكرایەوە و گەلانیش بەرەوپێشچوونێكی باشیان بەخۆیانەوە بینی.

 

 

باسی لەوەش كرد: بەپێچەوانەوە گەلانی ڕۆژهەڵاتی ناوەڕاست و بەتایبەت وڵاتانی عەرەبیی، ئایینی ئیسلام بە مەرجەع و تاكە دەسەڵاتی ڕەهای خۆیان دەزانن و نەتەوە و ئایینەكانی دیکە بە پلەیەكی تر و نزمتر دادەنێن، كە بەهاتنی ئایینی ئیسلام مێژوو سفركرایەوە و تەواوی شارستانییەتی پێشخۆیان بە جاهیلییەت ناوبرد و ڕەفزیانكردەوە.

 

سەبارەت بە ڕۆڵی ژنان لە كایەی سیاسیدا، سۆزان كەریم لەسەر بابەتەكەی ئاماژەی بەوەدا: بەداخەوە لە باشوری كوردستان ڕۆڵی ژنان بەتەواوی پشتگوێ‌ خراوە و بەشدارییان پێناكرێت لە دەركردنی بڕیار و پڕۆژە گرنگەكانی حزبەكان و حكومەتیش، پێچەوانەی ژنانی ڕۆژئاوای كوردستان كە لە عەفرین و كۆبانێ نموونەی ژنی لێهاتوو و قارەمانیان پیشانی جیهان داوە.

 

 

وتیشی: هەموو ئەو پەراوێزخستنە لە باشور، دەگەڕێتەوە بۆ سیستمی پیاوسالاری و حزبایەتیی، كە دەكرێت نموونەی ئەو سیستمە و خۆبەڕێوەبەرییە دیموكراتییەی ڕۆژئاوای كوردستان لە باشوور جێبەجێ‌ بكەین، تاوەكو جارێكی تر ڕۆڵ بۆ ژنان بگەڕێنینەوە.

 

لەکۆتاییشدا، ئیبراهیم حاجی زەڵمی، لەسەر ناوەرۆكی بابەتەكەی، کە بریتیبوو لە "هێزەكانی ڕاكێشانی دەنگی خەڵك لە وڵاتانی ڕۆژهەڵات"، قسەیكرد و وتی:"ئەو پێگە و شوێنانەی كە لە ڕۆژهەڵاتی ناوەڕاست و بەتایبەت لە باشوری كوردستان بۆ ڕاكێشانی دەنگی خەڵك بەكاردەهێنرین، بریتییە لە سەرمایە و دەسەڵات و پیاوی ئایینی و میدیا، بەجۆرێك لەلایەن حزبە دەسەڵاتدارەكان قۆرخكراون و سوودیان لێ دەبینن".

 

 

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin