Smiley face
Smiley face
Smiley face

ڕێپێوانی سیدەکان و پەیامەکەی

2018-04-22 13:01:50



ڕۆژنیوز - ناسیار و کەژاڵ

 

ڕێپێوانێک کە دوێنێ لە دژی داگیرکاریی بەرەو سیدەکان بەڕێوەچوو، لەلایەن ئاسیشی پارییەوە ڕێگریی لێکرا، بەڵام چالاکوانانی باشوری کوردستان سەرەڕای ئەو ئاستەنگییانە پەیامی خۆیان لە دژی داگیرکاریدا ڕاگەیاند.

 

هاوڵاتیانی باشوری کوردستان ڕۆژ لە دوای ڕۆژ لە ئاستی هەوڵە داگیرکارانەکانی حکومەتی تورک بێزارتردەبن، هاوکات حکومەتی هەرێمی کوردستان بێدەنگیی هەڵبژاردووە.

 

تووڕەیی و بێزاریی هاوڵاتیانی باشوری کوردستان پەیامی سەرەکیی ئەو ڕێپێوانە بەرەو سیدەکان بوو، هاوڵاتیان لە چەند ڕۆژ پێش ئێستاوە ئامادەییان ڕاگەیاندبوو بۆ بەشداریکردن لەو ڕێپێوانەدا و لە شارەکانی هەولێر، سلێمانی، ڕانیە، کەلار، کەرکوک، گەرمیان و هەڵەبجە و بناری قەندیلەوە بەرەو سیدەکان بەڕێکەوتبوون.

 

چالاکوانانی سلێمانی بە سێ پاسەوە لە سەرلەبەیانیی دوێنێوە بەڕێکەوتبوون و  بە وتنەوەی سرود و دروشم بە ورەی بەرزەوە خۆیان گەیاندە ڕانیە.

 

لە ڕانییە چالاکوانانی هەڵەبجە، هەولێڕ، گەرمییان، کەرکوک، شارەزوور، ڕانیە، چوارقوڕنە و سەنگەسەر بەشداری کاروانەکە بوون و هەمو چالاکوانان پێکەوە گردبوونەوە، هاوڵاتیانی ڕانیە پێشوازییان لە کاروانەکە کرد، هەروەها ژمارەیەک لە هاوڵاتیانی باکوری کوردستانیش بەشداریی ئەو چالاکییەیان کرد.

 

هاوڵاتیان بە وتنەوەی دروشمی "تورکیا بچۆ دەرەوە" و "هەبوونی بیانییەکان لە سەر خاکەکامان قبوڵ ناکەین" تووڕەیی و بێزارییان لە هێڕشەکانی حکومەتی تورک بۆ سەر سیدەکان ڕاگەیاند.

 

ئامادەبوونی دایکان و بەساڵداچووان لە کاروانەکەدا سەرنجڕاکێش بوو، لە سلێمانیشەوە چەند پێشمەرگەیەک بەشداری خۆپیشاندانی دژی داگیرکارییەکانی حکومەتی تورکیان کردبوو.

 

گەنجانی هەورامی و کەرکوکیش لە بەشداربووە دیارەکانی ئەو چالاکییە بوون، ئەوانیش بە زاراوە خۆیانەوە دروشمی دژی داگیرکارییان وتەوە، هەروەها بە وتنەوەی سرودی "زاپ زاپ زاپێ" پەیامیان دایە سوپای تورک کە وەک شەڕی زاپ دیسانەوە تێکدەشکێن.

 

هەروەها ژمارەیەک لە کاندیدەکانی تەڤگەریی ئازادیی کۆمەڵگای کوردستان لە لیستی ١٢٠ی نەوەی نوێدا لەو چالاکییەدا بەشدارییان کرد.

 

کاروانەکە کە لە ڕانییەوە بەرەو سیدەکان بەڕێکەوت، ئاڵای پەکەکە، ڕژاک، تەڤگەری ئازادی، پژاک، هەرێمی کوردستان و وێنە و پۆستەری عەبدوڵا ئۆجالان، رێبەری پەکەکەیان هەڵکرد.

 

ئەندامانی تەڤگەری چاند و هونەریش بە ژەندنی دەفە، دەهۆڵ و زوڕنا و وتنی گۆرانی و سرود ڕەنگێکی تایبەتیان دایە خۆپیشاندانەکە.

 

دوایین وەستانی کاروانەکە لە بناری قەندیل بوو، هاوڵاتیانی ڕۆژهەڵاتی کوردستان کە بەهۆی زۆردارییەکانی حکومەتی ئێڕانەوە ئاوارەبوون لەوێ بەشداری کاروانەکە بوون، دەتوانین بڵێین کە چوار پارچەی کوردستان لە خۆپیشاندانی دژی داگیرکارییەکانی حکومەتی تورکدا بەشدارییان کرد.

 

کاتێک کاروانەکە گەیشتە خاڵی پشکنینی گۆجار بۆ ئەوەی بچنە سیدەکانەوە، لەلایەن ئاسیشی پارتییەو ڕێگری لێکرا، شاندێکی ژنان بۆ دانوستان لەگەڵ بەرپرسانی ئاسایشی پارتی چوون و قسەیان لەگەڵ کردن، ئەندامانی ئاسایشی پارتی وتیان، کە لە سەرەوە فەرمانیان پێکراوە ڕێگا نەدەن بە کاروانەکە بچێتە سیدەکان.

 

هاوڵاتیان لە بەرامبەردا لەوێ مانەوە و دروشمیان وتەوە، ئەندامانی ئاسایشی پارتی دەستڕێژی گولـلەیان کرد و چەکە قورسەکانیان بۆ بە ئامانج گرتنی هاوڵاتیان دانا، ئەوەش هاوڵاتیانی تووڕە کرد و بە دروشم وتنەوە و بەرد هەڵدان وڵامی ئاسایشیان دایەوە.

 

بە مەبەستی ئەوەی تێکهەڵچونەکانی نێوان دوو لایەنەکە قووڵتر نەبێتەوە، کۆمیتەی ئامادەکاری خۆپیشاندانەکە دەستێوەردانی کرد، هاوڵاتیان گەڕانەوە بۆ پردەشالێ و لەوێ کۆنگرەیەکی ڕۆژنامەنووسییان لە دژی داگیرکارییەکانی حکومەتی تورک بەڕێوەبرد، هێرشەکانیان شەرمەزارکرد و بەڵێنیان دا لە دژی ئەو داگیرکارییانەدا بوەستنەوە و تێبکۆشن.

 

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin