Smiley face
Smiley face
Smiley face

خۆپیشاندەرانی سیدەکان ڕێگرییەکانی پارتی و هێرشەکانی تورکیان شەرمەزار کرد

2018-04-21 17:22:11



ڕۆژنیوز – قەسرێ

 

خۆپیشاندەرانی باشوری کوردستان، کە بۆ شەرمەزارکردنی هێرشە داگیرکارییەکانی دەوڵەتی تورک دەیانویست بچنە ناوچەی سیدەکان و لەلایەن ئاسایشی پارتییەوە ڕێگرییان لێکرا، بە لێدوانێک هێرشەکانی دەوڵەتی تورک و ڕێگرییەکانی ئاسایشی پاتی-یان شەرمەزار کرد.

 

ئەمڕۆ، هاوڵاتیانی کورد لە شارەکانی سلێمانی، هەولێر، ڕانیە، قەڵادزێ، شارەزوور، کەرکوک، کەلار و قەندیلەوە بەرەو سیدەکان بەڕێکەوتن، لە گوندی باڵەیانی سەر بە شارۆچکەی قەسرێ چۆمان گەیشتنە یەکدی و کاروانێکی هاوبەشیان پێکهێنا بە مەبەستی شەرمەزارکردنی هێرشەکانی حکومەتی تورک بۆ سەر باشوری کوردستان، بەڵام لەلایەن ئاسایشی پارتییەوە لە خاڵی پشکنینی گۆجاری لە شارەدێی قەسرێ ڕیگرییان لێکرا.

 

هەرچەندە خۆپیشاندەرانی ناڕەزایەتییان دژی ڕێگرییەکانی ئاسایشی پارتی دەربڕی و ویستیان بازگەکە تێپەڕێنن، بەڵام ئاسایشی پارتی دەستڕێژی گوللـەیان بەسەر خۆپیشاندەراندا کرد و چەکی گورسیان لە گردەکانی دەوروبەری بازگەکە جێگیرکرد.

 

لە ئاڵۆزییەکەدا، گەنجانیش بە بەرد و دروشم، وەڵامی تەقەی چەکدارانی پارتییان دایەوە.

 

دواتر، لەپێناو گەشەنەکردنی ئاڵۆزییەکاندا، خۆپیشاندەران گەڕانەوە گوندی پردەشاڵی و چەندین دروشمی وەک "سوپای تورک بۆ دەرەوە"، "بمرێ خیانەت"، "بژی بەرخۆدانی گەریلا" و "بژی ڕێبەر ئاپۆ" دەوتەوە، هەروەها ئاڵا و وێنەی عەبدوڵا ئۆجالان، ڕێبەری پەکەکە و وێنەی ئەو هاوڵاتییانەی کە لە هێرشەکانی دەوڵەتی تورکدا لە باڵەیان و شیلادزێ شەهیدبوون، بەرزکرایەوە، ئاڵای هەریەکە لە ڕژاک، تەڤگەری ئازادیی، پەکەکە و یەپەگەش هەڵکرابوو.

 

لەو میانەیەدا، زارا ئەحمەد، ئەندامی ئەنجومەنی بەڕێوەبەریی ڕێکخراوی ژنانی ئازادی کوردستان، کە چالاکییەکەیان ڕێکخستبوو، لە لێدوانێکی ڕۆژنامەنووسییدا، وێڕای شەرمەزارکردنی ڕێگرییەکانی ئاسایشی پارتی، وتی:"وەکو ڕێکخراوی ڕژاک، ویستمان ڕێپێوانێکی جەماوەریی لەدژی داگیرکارییەکانی دەوڵەتی تورک لە سیدەکانی ئەنجام بدەین، بەڵام جارێکی دیکە هێزەکانی ئاسایشی پارتی ئاستەنگییان دروستکرد و نەیانهێشت بچینە سیدەکان، بەڵام هات هەتا ئێرە و پیشاندانی ناڕەزایەتیی، دەریدەخات کە چالاکییەکەمان سەرکەوتووبووە".

 

 

ناوبراو، ڕایگەیاند، کە چالاکییەکانیان لەدژی داگیرکاریی بەردەوام دەبێت، وتیشی:"ئێمە وەکو ژنان و گەنجان، بەهیچ شێوەیەک ڕێگانادەین کە داگیرکەر لە خاکی باشوری کوردستاندا جێگیرببن".

 

ژنان و گەنجانی بەشداربووی چالاکییەکەش، بە پێشکەشکردنی پەیامی کورت، هەم ناڕەزایەتیی خۆیان دژی داگیرکارییەکانی دەوڵەتی تورکیا نیشانیدا، هەمیش توڕەیی خۆیان لەبەرامبەر ڕیگرییەکانی ئاسایشی پارتی دەربڕی.

 

چالاکییەکەدا بە هەڵپەڕکێ لەگەڵ دەهۆڵ و زووڕنا-دا و وتنەوەی دروشم، کۆتاییهات.

 

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin