Smiley face
Smiley face
Smiley face

هاوڵاتیانی کانی ماسی بێزارن لە داگیرکارییەکانی سوپای تورک

2018-04-21 13:57:47



ڕۆژنیوز - زەینەب بۆتان

 

هاوڵاتییانی گوندی کانی ماسی دەڵێن، کە بەهۆی داگیرکارییەکانی حکومەتی تورک لەو ناوچانەدا ناتوانن بە کارە ڕۆژانەکەیان ڕابگەن و ئەوەش زۆر بێزاری کردوون، هەروەها ڕەخنەی توند لە بێدەنگی حکومەتی هەرێم دەگرن.

 

ناڕەزاییەکانی هاوڵاتیان لە دژی هەوڵە داگیرکارییەکانی حکومەتی تورک لە باشوری کوردستان ڕۆژ لەدوای ڕۆژ زیاتر دەکەن، ژمارەیەک لە هاوڵاتیانی گوندی کانی ماسی سەربە ئامێدیی پارێزگای دهۆک، لەو بارەیەوە بۆ ڕۆژنیوز دەدوێن.

 

محەمەد مستەفا دەڵێت: کاری من هەنگەوانییە، هەنگە مێشەکانم لە پشتی گوندەکامەنە، بەڵام بە هۆی هێرشی فرۆکە جەنگییەکانەوە ناتوانم سەردانیان بکەم، ناتوانین بچینە ناو باخ و باخچەکانمانەوە، چەند ڕۆژ پێش ئێستا لە شیلادزێ سێ برا کۆمەڵکوژ کران، ئەوان هاوڵاتی مەدەنی بوون، کێ ئەو مافەی داوەتە تورکیای داگیرکەر کە بەو شێوەیە مرۆڤ بکوژێت؟ ئێمە ئەوە قبوڵ ناکەین.

 

ئەرجان کەستەیی وتی: چەند ساڵە کە حکومەتی تورک هێرش دەکاتە سەر خاکمان و ڕێگا نادات بە ئاژەڵەکانمان ڕابگەین، بە فڕۆکە و تۆپخانەکانیانەوە هێرش دەکەنە سەرمان، ماڵ و موڵکمان دەکەنە ئامانج و ژیانیان لێ سەخت کردووین، دەبێت حکومەتی هەرێمی کوردستان چارەسەرییەک بۆ ئەو کێشەیە بدۆزێتەوە، بۆچی بێدەنگە؟، ئەو بێدەنگییە شەرمەزار دەکەین، دەبێت هەڵوێست بگرێت و ناڕەزایی پیشان بدات لە دژی ئەو داگیرکارییانەدا.

 

ژنێک بەناوی شیرین محەمەد، وتی: بەهۆی بۆردوومان و تۆپبارانەکانەوە ناتوانین لە ماڵەوە بچینە دەرەوە، ناتوانین بە ئازادی لە خاکی خۆماندا بگەڕێین، بیریی چیاکانمان کردووە، چەند ساڵە باس لە زۆردارییەکانی حکومەتی تورک دەکەین، بەڵام کەس گوێ ناداتێ، ئەو هەموو هاوڵاتییە بێ تاوانە دەکوژرێن و حکومەتەکەمان دەنگی لێوە نایەت، لە چنگی زۆرداریی سەدام ڕزگاربووین، بەڵام زۆرداریی سەختتر و قورسترمان لێدەکرێت.

 

پیرەپیاوێکی دیکە بەناوی مەحمود مستەفا وتی: فڕۆکە جەنگییەکانی سوپای تورک شەو و ڕۆژ بۆردوومانمان دەکەن، ناتوانین بچینە ناو باخ و باخچەکانمان، لە شیلادزێ سێ هاوڵاتیان کۆمەڵکوژکران، ئەوان هاوڵاتی مەدەنی بوون و بۆ کاری خۆیان چووبوون، هەر کەس لە ماڵی خۆی بچێتە دەرەوە دەڵێن پەکەکەیە و دەیکوژن، تەنیا هۆکاری ئەو کەسانەی دەکوژرێن ئەوەیە کە کوردن، داوا لە حکومەتی هەرێم دەکەین، کە لە دژی ئەو هێرشانە هەڵوێست بگرێت.

 

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin