Smiley face
Smiley face
Smiley face

کوالێتی بەرز و نرخی هەرزان بازاڕی لەنگە گەرم دەکات

2018-04-21 10:40:17



ڕۆژنیوز - ڕۆزە محەمەد

 

ژنان و پیاوان بۆ دەستکەوتنی پۆشاک و پێڵاو و کەلوپەلی کوالێتی بەرز و نرخ هەرزان ڕوو لە بازاڕی لەنگە دەکەن.

 

بەهۆی هەرزانی نرخ و تاکیی و کوالێتی بەرز-ی پۆشاک و پێڵاو و کەلوپەلی ناوماڵ-ی لەنگە، بازاڕی لەنگەی شاری سلێمانی جمەی دێت لە کڕیاری ژن و پیاو لەسەرجەم چین و توێژە جیاوازەکان.

 

پەرێز سابیر، ڕۆژنامەنووسێکی دانیشتووی شاری سلێمانییە، کە بۆ کڕینی جلوبەرگی لەنگە ڕووی لە بازاڕی لەنگە کردبوو سەبارەت بە هۆکاری کرینی پۆشاکی لەنگە بە ڕۆژنیوزی وت: پۆشاکی لەنگە کوالێتیی باشە، هەروەها تاکە و لە هەموو دوکانێکدا نییە، بۆیە زیاتر ڕوو لە بازاڕی لەنگە دەکەم.

 

لەبارەی جیاوازیی نرخیشەوە، پەرێز، وتی: ئەو پارەیەی کە یەک پۆشاکی پێدەکڕیت لە تازە، ئەوا دەتوانیت لە لەنگە ٥ - ٦ پارچەی پێبکڕیت.

 

هەروەها، بەهۆی بایکۆتکردنی کەلوپەلی تورکییەوە پڕفرۆشیی لەنگە زیادی کردووە، چونکە دەوڵەتی تورک بە تەوایی ئابووری باشوری کوردستانی قۆرغ کردووە و بەڕێژەی ٩٥% ی ئەو پۆشاکانەی لە دوکانەکاندا هەن دروستکراوی وڵاتی تورکیان.

 

ئەو کەسانەی بەشدارییان لە کەمپەینی بایکۆتکردنی کەلوپەلی تورکیی کردووە، جیاواز لە تورکیی پۆشاکی دیکەیان دەستناکەوێت، بۆیە بۆ کڕینی پێداویستییەکانیان ڕوو لە بازاڕی لەنگە دەکەن.

 

سپێدە فایەق، یەکێکە لەو ژنانەی کە دوای دوو ڕۆژ گەڕان بەناو بازاڕی تازەدا، نەیتوانی پۆشاکی لەدەرەوەی تورکیی دەستبکەوێت، بۆیە لە بازاڕی لەنگە چەند پارچە پۆشاکێکی ئەوروپیی کڕیبوو.

 

سپێدە، بە ڕۆژنیوزی وت: دەوڵەتی تورک لەرووی ئابوورییەوە بەتەواویی باشوری کوردستانی داگیرکردووە، کئەو کەلوپەلانەی لەناوخۆدا بۆی ساغ نابێتەوە ڕەوانەی بازاڕەکانی باشوری دەکات و داهاتەکەشی دەدات بە چەک و گەلی کوردی پێ لەناو دەبات، بۆیە ئامادەنیم هیچ کەلوپەلێکی تورکیی بکڕم.

 

تەنها ژنان بۆ کڕینی جلوبەرگ و پێداویستی دیکە ڕوو لە بازاڕی لەنگە ناکەن، بەڵکو پیاوانیش پێداویستیەکانی خۆیان لە بازاڕی لەنگە بەدەست دەخەن، تەنانەت ئەو کەسانەشی، کە باری داراییان لە ئاستێکی بەرزدایە.

 

ئاریان بەکر، کە جلی لەنگەی پیاوان دەفرۆشێت، بە ڕۆژنیوزی وت: هەموو چین و توێژە جیاوازەکان بێ جیاوازیی ڕوومان تێدەکەن، لەناو کڕیارەکانماندا پارێزەر و پزیشک و ڕۆژنامەنووس و مامۆستاش هەن.

 

ژنان و پیاوان تەنها بۆ کڕینی جلوبەرگی لەنگە ڕوو لە بازاڕی لەنگە ناکەن، بەڵکو بۆ دەستکەوتنی قاپ و قاچاغ، ئامێری کارەبایی، پەردە، فەرش، لێفە و زۆر پێداویستی دیکەی ناوماڵ لەو بازاڕانە دەستدەخەن.

 

بالەکان زیاتر لە وڵاتی نەرویج و سوید و هۆڵەندا و دانیمارک و کەنەدا و ئەڵمانیا و کۆریا و چەندین وڵاتی دیکە هاوردەی باشوری کوردستان دەکرێن.

 

 

ش.ف

 

 

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin