Smiley face
Smiley face
Smiley face

قه‌ره‌یلان: ده‌ستمان به‌ هه‌نگاوێکى فراوان کردووه‌.. نوێکراوەتەوە

2018-04-20 15:00:09



ڕۆژنیوز ـ ناوه‌ندى هه‌واڵه‌کان

 

موراد قەرەیلان، فەرماندەی بڕیارگەی ناوەندیی پاراستنی گەل- نەپەگە، ڕایگەیاند: دەستمان بە هەنگاوێکی فراوان کردووە و چیدی بە شێوەی کلاسیک لە دژی فاشیزم تێکۆشان ناکەین.


ئەمڕۆ خولێکی پەروەردەی گەریلاکانی ئازادیی کوردستان لە ئەکادیمیاکانی شەهید ماهیر لە چیاکانی کوردستان بە ئەنجامدانی مەراسیمێک کۆتایی پێهات، لە مەراسیمەکەدا موراد قەرەیلان قسەی بۆ گەریلاکان کرد.


قەرەیلان وتی: تێکۆشانی ئازادیی کوردستان لە قۆناغێکی مێژووییدایە، شۆڕشمان تا ئێستا لەسەر بنەمای پارادایمی ڕێبەر ئاپۆ، واتە پارادایمی دیموکراتی، ژینگەپارێزی و شۆڕشی ژنان پێشکەوتووە، ئەوە دوژمنی ترساندووە، ئەو کاتەی ئەردۆغان هەڵوەشاندنەوەی پەیمانی ئاشتیی دۆڵمەباخچەی ڕاگەیاند، لە دژی گەلی کورد و گەلانی تورکیا شەڕی ڕاگەیاند، سێ ساڵە ئەو شەڕە بەردەوامیی هەیە و ئەمڕۆ گەیشتووەتە قۆناغێکی زۆر گرنگ.


وتیشی: دەبێت هەموان بزانن کە گەلی کورد نایەوێت تورکیا پارچە بکات، بەڵکو هەوڵ دەدات شۆڕشێک لە تورکیادا پێکبێنێت و لە ئەنجامیدا تورکیا بە دیموکراتی بکات، ئەوانەی لەو دیموکراسییە دەترسن شەڕیان لە دژی گەلی کورد ڕاگەیاند، کاتێک نەیانتوانی لە باکوری کوردستان بگەنە ئامانجە داگیرکارییەکان، هێرشیان کردە سەر عەفرین، ئێستاش هێرش دەکەنە سەر خاکی باشوری کوردستان، تورکیا دەیەوێت کوردستان داگیر بکات و سنوورەکانی "سوێندی نەتەوەیی" بگەڕێنێتەوە، بۆ ئەوەش لە دژی سێ پارچەی کوردستان شەڕی چڕ بەڕێوەدەبات.


لە بەردەوامیشدا قەرەیلان وتی: باوەڕمان وایە کە شەڕمان لەگەڵ حکومەتی تورک لەمساڵدا دەگاتە بەرزترین ئاستی و لە ئەنجامدا سەردەکەوین، ئەردۆغان باش تێگەیشتووە کە بەو هەموو قەیرانانەوە کە تورکیا تووشی بووە، ناتوانن حکومەت بەڕێوەببەن، بە دۆخی نائاساییەوە ناتوانن وڵات بەڕێوەببەن، بۆ ئەوەش بوو کە بەپەلە لەگەڵ باخچەلی کۆبوونەوە و بڕیاری هەڵبژاردنی پێشوەختەیان دەرکرد، شتی وا لە جیهاندا ڕوونادات، هەم دەڵێن کە ئێستا لە شەڕی ڕزگارکردنی تورکیاداین، هەم تورکیا بە دۆخی نائاساییەوە بەڕێوەدەبن، هەم سیاسەتی شۆڤینی گەش دەکەنەوە، هەم هەموو کۆمەڵگا بە فشار و سەرکوت بێدەنگ دەکەن، لەو لاشەوە هەڵبژاردن بەڕێوەدەبەن.


ڕاشیگەیاند: دەسەڵاتداریی ئاکەپە و مەهەپە بەردەوام دەڵێن، کە ئێمە لە دژی پەکەکەین، بەڵام ئەوە ڕاست نییە، ئەوان لە دژی هەموو دەستکەوتەکانی گەلی کوردن، دەڵێن یەپەژە و یەپەگە و قەسەدە و شەڕڤانانی شەنگال و باشور هەموویان پەکەکەن، پەکەکە بەم شێوەیە دەکەنە بەهانە و هێرش دەکەنە سەر هەموو کورد، ئەوان لە دژی هەبوونی گەلی کوردن.


لە بارەی هەڵوێستی سیاسەتمەدارانی باشوری کوردستانیشەوە وتی: پێویستە سیاسەتمەدارانی باشوری کوردستان ڕاستییەکان ببینن، بەڵام نایبینن بە داخەوە، دەڵێن بەهۆی پەکەکەوەیە کە هێرش دەکرێتە سەر باشور، ئەوە ڕاست نییە، با هەمووان بزانن، سوپای تورک لە هەر شوێنێکی باشور جێگربێت چیدی ناگەڕێتەوە و ناچێتە دەرەوە، حکومەتی عێراق ئەو هەموو هەوڵەیدا سوپای تورک لە باشیق دەربکات، ئایا توانی؟ نا، لە ئێستادا پێویستە گەلی کورد و وڵاتپارێزان لە باشوری کوردستان لە دژی داگیرکارییەکانی حکومەتی تورک بوەستنەوە، باشوری کورستان لە دۆخێکی زۆر مەترسیداردایە.


موراد قەرەیلان وتیشی: لەم دۆخە مەترسیدارەدا پێویستە کورد یەک بگرن و سیاسەتی هاوبەش لە دژی داگیرکاری بەڕێوەببەن، هەروەها وتی: هێزی گەریلا ئامادەیە بۆ دژایەتی فاشیزم، گەریلاکان چیدی نەک بە شێوەی کلاسیک، بەڵکو بە شێوەیەکی پرۆفیشناڵ ئامادەن فاشیزم لەناو ببەن، باوەڕمان وایە کە تێکۆشانمان ڕاستییەکی نوێ لە سەرتاسەری کوردستان دەخولقێنێت.


لە کۆتاییشدا تیشکی خستە سەر هەنگاوی نوێی تێکۆشان لە ساڵی ٢٠١٨ و وتی: هەنگاوی ساڵی ٢٠١٨ زۆر ستراتیژییە، ڕایدەگەیەنین، کە هەموو هەڤاڵانمان لەسەر بنەمای گەیشتن بە سەرکەوتنی گەورە لە ئەمساڵدا تێدەکۆشن، هەنگاوێکی فراوانمان دەستپێکردووە و هیوای سەرکەوتن بۆ هەموو هەڤاڵان دەخوازین لەو هەنگاوەدا.


ک.ک

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin