Smiley face
Smiley face
Smiley face

بەشێک لە گەرمیان توشی وشکەساڵیی بووە

2018-04-17 13:02:12



ڕۆژنیوز ـ هاوڕێ کرێکار 


بەڕێوەبەرى کشتوکاڵی گەرمیان، وشکەساڵیی لە گەرمیان ڕادەگەیەنێت و ئاماژە بەوە دەکات، بە هۆی کەمى باران بارینەوە، لە بەشێکى زۆری سنوری گەرمیان وشکەساڵییە.


بەهۆی کەمى باران بارینەوە لە سنوری ئیدارەى گەرمیان، نیشانەکانى وشکەساڵیی لە بەرهەمەکانى دانەوێڵەدا دەرکەوتووە، لەو بارەیەوە بەشێک لە جوتیارانى گەرمیان، بۆ ڕۆژنیوز قسە دەکەن. 


لە گەرمیان، یەک ملێون و چوار سەد هەزار دۆنم زەوى دێمی هەیە، واتە پشت بە باران دەبەستێت و ١١١ هەزار دۆنم زەوی بەرئاو هەیە واتە پشت بە ئاوی سەرزەوى و ژێر زەوى دەبەستێت، ئەمساڵ نزیکەى ٤٠٠ بۆ ٥٠٠ هەزار دۆنم زەوى کراوە بە دانەوێڵەى گەنم و جۆ، لەو ڕێژەیە ٢٨٥ هەزاری دۆنم زەوى توشی وشکەساڵیی هاتووە. 


گۆران سادق، جوتیار، دەڵێت: لە ١٩٩١ کاری جوتیاری ئەکەم و دانەوێڵە دەچینم، ئەمساڵ ١٣ تەن گەنم و جۆم چاندووە لە ناوچەکانى کۆشک و کۆرمۆر، بەڵام بەهۆی کەم بارانیەوە هیچی نەهاتوەتە بەرهەم و دەستم لێ شۆردووە و ئومێدم پێی نەماوە.

 


دەشڵێت: ساڵى ڕابردوو بەرهەممان زۆر باشتر بوو لە ئێستا، ئەمساڵ لە کاتى وەشاندنى تۆوەوە تا کاتى سەوزبوونى، نزیکەى یەک دەفتەر دۆلار زیانمان کردووە و وازمان لێیهێناوە.


هەروەها جەبار ئەدهەم، جوتیار، باسی لەوە کرد: نزیکەى ٣٥ ساڵە کاری جوتیاری دەکەم بە قەد ئەمساڵ وشکەساڵیم نەبینیوە بەم شێوەیە، ئەمساڵ چەند تۆوم وەشاندووە، هیچی لێ بەرهەم نەهاتووە. 

 


ئاماژەى بەوەشدا: ساڵی ڕابردوو بەرهەمى دانەوێڵە لە زۆربەى ناوچەکانى گەرمیان باش بوو بەهۆی ئەوەى باران زۆر باری و لەکاتى خۆیدا بوو، بەڵام بارانەکەى ئەمساڵ وەک پێویست نەبووە و لەکاتی خۆیشیدا کە گەنم و جۆ لەژێر زەویدا پێدویستى بە ئاو بوو، باران نەباری.


شادیە حسێن، بەڕێوەبەری کشتوکاڵی گەرمیان لەسەر ئەو پرسە، بۆ ڕۆژنیوز  دوا و وتى: لەبەرئەوەى ئەمساڵ باران کەم باری، وشکە ساڵی لە گەرمیان بۆ بەرهەمى گەنم وجۆ دەرکەوتووە، لە سنوری شارۆچکەى کفری بە تەواوى وشکەساڵیی هەیە، شارەدێێ قۆرەتوو دەوربەری و شارۆچکەى خانەقین و کەلار و شارەدێی ڕزگاری و دەوروبەری بەهەمان شێوە، بەڵام لە شارەدێی مەیدان و باوەنوور بەهۆی  زۆری بارانەوە وشکە ساڵیی تێدا ڕوونادات.

 


وتیشی: ئەمساڵ بە شێوەیەکى زۆر کەم دانەوێڵە، لەو ناوچانەى سەرەوە ئاماژەم بۆکرد هاتوەتە بەرهەم، ساڵی ڕابردوو بەرهەمى دانەوێڵە لەم ناوچانە  بەراورد بە ئەمساڵ زۆر باشتر بووە. 


ک.ک


 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin