Smiley face
Smiley face
Smiley face

دیوانی دادگەریی ئەوروپا دۆزێکی بۆ پەکەکە کردەوە

2018-04-17 10:47:51



ڕۆژنیوز - ناوەندی هەواڵەکان

 

دانیشتنی دادگا سەبارەت بە دۆزی سڕینەوەی ناوی پەکەکە لەناو لیستی تیرۆردا، کە ماوەیەک پێش ئێستا برابووە دیوانی دادگەریی ئەوروپا بەڕێوەچوو و وابڕیارە تا شەش بۆ نۆ مانگی دیکە بڕیارە کۆتایی لەو بارەیەوە بدرێت.

 

بۆ ئەوەی پەکەکە لە ناو لیستی تیرۆردا لاببرێت، دیوانی دادگاریی ئەوروپا لە لوکزامبورگ دۆسییەیەکی کردبووەوە، دوێنێ دانیشتنی ئەو دادگایە بەڕێوەچوو و پێدەچێت ئەنجامی ئەرێنی لێبکەوێتەوە.

 

لە دادگاکەدا ڕاگەیەندرا، کە پەکەکە لە ماوەی ١٠ ساڵی ڕابردوودا هیچ چالاکییەکی تیرۆریستیی نەبووە، بۆیە سووربوون لە سەر مانەوەی لە ناو لیستی تیرۆردا ناتوانێت گونجاو بێت.

 

ئەو دۆزە لە ساڵی ٢٠١٤دا لە سەر داواکاریی موراد قەرەیلان و دووران کاڵکان، ئەندامانی بەڕێوبەرێتی پەکەکە، لە دیوانی دادگەریی ئەوروپادا کرابووەوە، لەو ڕووەوە کە لیستی تیرۆری یەکێتی ئەوروپا هەر شەش مانگ جارێک نوێ دەبێتەوە، بڕیاری ئەو دادگایە دەتوانێت پەکەکە لە ناو لیستی تیرۆری ئەوروپادا دەربکات.

 

پارێزەران لە دانیشتنی دادگاکەدا ڕایانگەیاند، کە پەکەکە لەسەر داواکاریی دەوڵەتی تورک خراوەتە ناو لیستی تیرۆرەوەوە، کە خۆی دەیان چالاکیی تیرۆریستیی لە دژی کورد ئەنجام داوە، دەوڵەتی تورک کردەوە تیرۆریستییەکانی دەخاتە ئەستۆی پەکەکە، ئەو پارێزەرانە هەروەها ڕایانگەیاند، کە پەکەکە بەگوێرەی یاسا نێودەوڵەتییەکان دەجووڵێتەوە و لەڕووی پاراستنی مافی هاوڵاتیان و یاساکانی شەڕەوە پێشێلکارییەک لەلایەن پەکەکەوە ئەنجام نەدراوە.

 

هەروەها ئاماژەیان بەوەشدا، کە پەکەکە لە چالاکییەکانیدا هێزە سەربازییەکان دەکاتە ئامانج و هیچ چالاکییەک لە دژی هاوڵاتیان ئەنجام نادات.

 

پێدەچێت دیوانی دادگەریی ئەوروپا تا ماوەی شەش بۆ نۆ مانگی دیکە بڕیاری کۆتایی لەو بارەیەوە دەربکات، لە ڕووی چۆنێتی بەڕێوەچونی دادگاکەشەوە چاوەڕوان دەکرێت کە بڕیاری ئەرێنی لەو بارەیەوە بدرێت.

 

 


ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin