Smiley face
Smiley face
Smiley face

عەبدولخالق مەعروف شەهیدی هەڵوێست و قەڵەم

2018-04-10 13:27:24



ڕۆژنیوز - دڵشاد خۆشناو

 

 ڕۆژی ١٠ی نیسانی هەموو ساڵێک، ساڵڕۆژی شەهیدبوونی نووسەر و ڕووناکبیری کورد، عەبدولخالق مەعروفە، کە لە ساڵی ١٩٨٥، لەناو جەرگەی شاری هەولێر و لەبەردەم ماڵی خۆییدا لە گەڕەکی ئازادی شەهید کرا.


 

عەبدولخالق مەعروف، ڕۆژی ١/١/١٩٣٥، لە شارەدێی کەندێناوەی هەولێر، لە بنەماڵەیەکی نیشتمانپەروەر و لە باوکێکی مەلا و دایکێکی مەلازادە لەدایک بوو، سەرەتا لە شارەدێیەکەیان قۆناغی سەرەتایی تەواو کردووە، دوای تەواوکردنی قۆناغی سەرەتایی کە ئەو کاتە پێنج پۆل بووە، دواتر باوکی لە خوێندنگە دەریهێناوە و خستویەتییە بەر خوێندنی ئیسلامی و مزگەوت و هاتوەتە هەولێر، دواتر لە ساڵی ١٩٥٨ بۆ درێژەدان بەخوێندن لە زانکۆی ئەزهەر، ڕووی کردوەتە وڵاتی میسر، بەڵام بەهۆی فەرمی نەبوونی بڕوانامەکەی، نەیتوانیوە لەوێ درێژە بەخوێندن بدات و وەرنەگیراوە، پاشان گەڕاوەتەوە بەغدا و لای هەردوو منەوارنی کوردی، عەلائەدین سەجادی و محەمەد قزلجی، درێژەی بە خوێندنی ئاینی دا.

 

 

عەبدولخالق مەعروف هەر لەتافی لاوێتییەوە خولیای خوێندنەوە و خۆ رۆشنبیر کردن بووەو لەناوچەکەی خۆیدا وەک خوێندەوارێکی هاوچەرخ ناوی دەرکردبوو، ئەو کاتەشی کە وەکو فەقێ لە حوجرەکانی هەولێر بوو، وەکو فەقێیەکی لایەنگری چاکسازی و هێنانەدی چاکسازی لەناو مەلاکاندا کاری کردووە، لەو سەردەمەدا لەگەڵ دووسەد فەقێی دیکە داوا لە موتەسەریفی هەولێر دەکەن کە خوێندنی ئیسلامیان بۆ بکرێتەوە و چیتر لەناو مزگەوت و حوجرەکاندا نەخوێنن.

 

هەرچەندە کە مەلاکان لەو سەردەمە زۆر هەوڵیانداوە کە ڕێگری لەو کارە بکرێت، بەڵام ئیسماعیل حەقی شاوەیس، کە ئەو کاتە موتەسەریفی هەولێر بووە، پشتیوانی داواکاریی فەقێیەکانی کردووە وە داواکەیانی بۆ جێبەجێ کردوون.

 

سەعید یحیا، هێمن، عەبدولخالق مەعروف


عەبدولخالق مەعروفی نووسەر و روناکبیر و نیشتمانپەروەر، شەخسییەتێکی کۆمەڵایەتی هێندە خۆشەویست بوو کە لەسەرتاسەری کوردستانداو بەتایبەت لەناو ئەدیبان و نووسەران و هێزە سیاسییە پێشکەوتن خوازەکاندا بەڕێزەوە ناوی دەبرا.

 

لە ساڵی ١٩٥٦، بوەتە پێشنوێژ و وتارخوێن لە سوپای عێراق، هەر لەناو سوپا خۆی فێری کاروباری ئەلەکترۆنی دەکات و فێری ئەوە دەبێت کە وێستگەی ڕادیۆیی دروست بکات،

 

عەبدولخالق جگە لەوەی پسپۆرێکی ئاینی بوو، شارەزاییەکی باشیشی لە ئەدەبی کلاسیک و ئەلەکتریکیشدا هەبوو، ئەم تواناو بەهرەیەشی تەرخان کرد بۆ خزمەتی گەلەکەی، لە سەردەمی شۆرشی ئەیلول ئەو وێستگەی شۆڕشی دامەزرند کە ناوی ئێستگەی دەنگی کوردستانی عێراق بوو، دواتریش لە سەرهەڵدانی شۆڕشی نوێی خەڵکی کوردستانی عێراق، دەزگای رادیۆی (دەنگی گەلی کوردستان)ی دامەزراند.

 

 

لە ساڵی ١٩٧١، لە لایەن سەرکردایەتی شۆڕشی ئەیلولەوە نێردراوە بۆ وڵاتی چیکۆسلۆڤاکیان، بۆ ئەوەی پەورەردەی تەکنیکی ببینێت، دواتر دەچێتە ئەڵمانیا و لە ساڵی ١٩٧٦ دەگەڕێتەوە هەولێر و دوکانێکی چاککردنەوەی کەلوپەلی ئەلەکترۆنی دادەنێت.

 

 

عەبدولخالق مەعروف، لەماوەی ساڵانی 1977ەوە تا ساڵی 1985 پێنج کتێبی نووسیوە و پێشکەشی کتێبخانەی کوردی کردووە، لەوانە کتێبی (ئەنتێنا-١٩٧٧)، کتێبی (تەکنیکار-١٩٨٠)، کتێبی (اجهزة الارسال - ١٩٧٩) بە زمانی عەرەبی نووسیوە،  کتێبی (دیوانی نالی و کێ ڕاستە-١٩٨٤)، کتێبی ئادەمیزاد لە کۆمەڵی کوردەواریدا)، بووە دوا کتێبی و هاوکات بووە هۆکار و بیانوویەکیش بۆ لەناوبردن و تیرۆرکردنی ئەو نووسەرە لەلایەن هێزە داپلۆسێنەرەکانی دەزگای ئاسایشی بەعس.

 

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin