Smiley face
Smiley face
Smiley face

بەشێکی هاوڵاتییانی خورماتوو متمانەیان بە هێزە ئەمنییەکان نییە بۆ گەڕانەوەیان

2018-03-23 08:13:31



ڕۆژنیوز - هاوڕێ کرێکار


نوێنەرێکی ئاوارەکانی خورماتوو ڕایدەگەیەنێت، دۆخی ئەمنی شارۆچکەی خورماتوو زۆر باشە، بەڵام بەشێک لە هاوڵاتیانی شارۆچکەکە ڕایدەگەیەنن، دڵنیا نین لە دۆخی شارۆچکەکە بۆیە ناگەڕێنەوە و بە باشی دەزانن هێزێکی کوردی بگەڕێتەوە خورماتوو.

 

لە سەرەتای مانگی یەکی ئەمساڵەوە، هێزێکی بەرپەرچدانەوەی خێرای سەر بەوەزارەتی ناوخۆی عێراق، چووەتە شارۆچکەی خوماتووی سەر بە پارێزگای سەڵاحەدین، بەڵام تا ئێستا بەشێکی کوردانی ناوچەکە نەگەڕاونەتەوە سەر شوێنی خۆیان.


مەریوان خورشید، هاوڵاتییەکی کوردی دانیشتوی شارۆچکەی خورماتووە، بۆ ڕۆژنیوز وتی: گەڕاومەتەوە نێو شارۆچکەی خورماتوو، سەرقاڵی کارکردنی خۆمم و هیچ ڕێگیریی و پشێلکارییەکم بەرامبەر نەکراوە، نە لە لایەن خەڵکی شارۆچکەکە لە نەتەوەکانتی تر و نە لە لایەن هێزە ئەمنیەکانەوە.

 

 

مەریوان، وتیشی: لەڕووی ئەمنییەوە، زۆر باشتر لە جاران ئارامترە و نە تەقەیەک هەیە و نە کەس دەڕفێنرێت و نەکەسیش قسەیەکت پێ دەکات، بۆیە هیچ پەشیمان نیم لە گەڕانەوەم بۆ شارۆچکەی خورماتوو.


ئاری عەلی، هاوڵاتیەکی دیکەی شارۆچکەکەیە، بەڵام نەگەڕاوەتەوە خورماتوو، دەربارەی هۆکاری نەگەڕانەوەی بە ڕۆژنیوزی وت:"هۆکاری نەگەڕانەوەم بۆ خورماتوو دەگەڕێنمەوە بۆ ئەوەی تا ئێستا هیچ گرنتییەک نییە، کە خەڵک دڵی پێی خۆش بێت و بگەڕێتەوە، ڕاستە هێزێک هەیە لەنێو شارۆچکەکە و یاسا جێبەجێ دەکات، بەڵام نەیتوانیوە ئێمەی هاوڵاتیانی خورماتوو دڵنیابکاتەوە، لەوەی جارێکی تر هیچمان بەسەر نەیەت.

 

 

ئاری عەلی، ئەوەشی وت: تا هێزی پێشمەرگە یان هێزێکی کوردی نەگەڕێتەوە خورماتوو، ناتوانم بگەڕێمەوە، چونکە دڵنیا نیم لەو هێزانەی کە بە ناوی پاراستنی خەڵک و جێبەجێکردنی یاساوە دێنە شارۆچکەکە.

 

هەروەها مەلا هاوار داودی، نوێنەری ئاوارەکانی خورماتوو، بۆ رۆژنیوز دوا و، وتی: بەشێک لە ئاوارەکان هاتوونەتەوە نێوماڵی خۆیان وەک جاران، بەشێکی تریان تا ئێستا نەهاتوەنەتەوە و متمانەیان بەم هێزانەی ئێرە نییە و دەترسن.

 

 

دەربارەی ڕێژەی گەڕانەوەی کوردانی شارۆچکەکە، مەلا هاوار، وتی: ٥٠%ی دانیشتوانی شارۆچکەکە گەڕاونەتەوە، دۆخی ئەمنی تا ئێستا باشە و هیچ گرژی و ئاڵۆزی و سەرپێچی و پێشێلکارییەک نییە و هیچ تەقە و ڕفاند و کردەوەی تیرۆریستیش بوونی نییە، بەڵام خەڵکەکە هێشتا ترسی هەیە  و دڵنیا نییە.


سەردار ئەحمەد، ئەندامی ئەنجومەنی شارۆچکەی خورماتووش، دەربارەی دەوامی ئەنجومەنەکەیان دەڵێت: گەڕاومەتەوە ئەنجوومەن و دەوامی ئاسایی خۆم دەکەم، وەک ڕۆژانی پێش ١٦ی ئۆکتۆبەر و هیچ گرفتێک و کێشەیەکم نییە و ماڵیشم گەڕاوەتەوە شارۆچکەکە.

 

 

وتیشی:ئەو ئەندامانەی نەگەڕاونەتەوە، هەفتەی دووجار دێنە دەوام و دەگەڕێنەوە، هۆکاری نەهاتنەوەشیان بە وتەی خۆیان بۆ ئەوە دەگەڕێننەوە کە دڵنیانین لە دۆخی شارەکە.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin