Smiley face
Smiley face
Smiley face

لە چەمچەماڵ كۆمەڵكوژییەكەی دۆڵی باڵەیان شەرمەزار کرا

2018-03-22 18:29:26



ڕۆژنیوز- ئاشتی ئەحمەد

 

چین و توێژەکانی شارۆچكەی چەمچەماڵ، کۆمەڵکوژییەکەی بەرەبەیانی ئەمڕۆی دۆڵی باڵەیان-ی سەر بە شارەدێی قەسرێ-یان لەلایەن فڕۆکە جەنگییەکانی تورکیاوە شەرمەزارکرد.

 

ئێوارەی ئەمڕۆ، لە شارۆچكەی چەمچەماڵ-ی سەر بە پارێزگای سلێمانی، گردبوونەوەیەک دژی ئەو كۆمەڵكوژییەی کە بەرەبەیانی ئەمڕۆ فڕۆکە جەنگییەکانی تورک لە دۆڵی باڵەیان-ی سەر بە شارەدێی قەسرێ لە شارۆچکەی چۆمان ئەنجامیاندا، بەڕێوەچوو.

 

ئارام شێخ عەزیز، ڕۆژنامەنووس، بەیاننامەی گردبوونەوەکەی خوێندەوە و تیایدا ئیدانەی هێرشەکانی سوپای تورک بۆ سەر هاوڵاتی مەدەنیی کرا، ئاماژە بەوشکرا، کە هێرشەكانی توركیا بۆ سەر هاوڵاتیان كورد لە هەرچوار پارچەی كوردستان بەردەوامە.

 

 

هەروەها، داوا لە پەرلەمان و حكومەتی هەرێم كرا، لەگەڵ ڕێكخراوەكانی كۆمەڵگای نێودەوڵەتیی و وڵاتانی دەرەوە، فشارەكانیان بخەنەگەڕ، بۆ ئەوەی توركیا هێرشەكانی بۆ سەر ڕۆژئاوا و باشوری كوردستان ڕابگرێت، "چونكە دەوڵەتی توركیا دەیەوێت ئیرادەی گەلی كورد تێكبشكێنێت و پیلانی هەیە بۆ كەركوك شەنگال و باشوری كوردستان".

 

لە بەشێکی دیکەی بەیاننامەکەدا، ئەوەش هاتبوو: كە توركیا بێدەنگیی کۆمەڵگای نێودەوڵەتیی و ناتەبایی لایەنە سیاسییەکانی هەرێمی کوردستانی قۆستووەتەوە، بۆ بەردەوامیدان بە پێشێلکاری و دەسدرێژییەکانی.

 

جێگای بیرهێنانەوەیە، بەرەبەیانی ئەمڕۆ فڕۆکە جەنگییەکانی تورکیا گوندەکانی وەسان و سەرکان و ماونای سەر بە شارەدێی قەسرێ-یان لە سنوری چۆمان لە دۆڵی باڵەیان-ی پارێزگای هەولێر کردە ئامانج بەو هۆیەشەوە چوار هاوڵاتی شەهیدبوون کە دوانیان پێشمەرگە بوون و بۆ بەسەر بردنی کاتێکی خۆش ڕوویان لەناوچەکە کردبوو.

 

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin