Smiley face
Smiley face
Smiley face

مافناسێکی ئێرانی: تورکیا یاسا نێودەوڵەتییەکان پێشێل دەکات

2018-03-22 08:18:46



ڕۆژنیوز - ناوەندی هەواڵەکان

 

ئومید شەمس، شاعری ناودار و پسپۆر لە بواری مافە نێودەوڵەتییەکاندا دەڵێت، کە حکومەتی تورک بە بەهانەی پاراستنی سنوورەکانی یاسا نێودەوڵەتییەکان پێشێل دەکات.

 

ئومید شەمس، شاعری ئێرانی و مامۆستا لە زانکۆی پۆرتسموسی بەریتانیا لە بەشی مافە نێودەوڵەتییەکان، لێدوانێکی تایبەت بۆ ڕۆژنیوز دەدوێت و لە ڕووی مافە نێودەوڵەتییەکانەوە باس لە هێرشەکانی سوپا تورک دەکات.

 

ئومید شەمس وتی: لە بەندی چواری خاڵی دووەمی جارنامەی نەتەوە یەکگرتووەکاندا هاتووە، 'هەموو ئەندامانی نەتەوە یەکگرتووەکان دەبێت دووریی بکەن لە بەکارهێنانی هێز لە دژی سنوورەکان و سەربەخۆیی سیاسیی وڵاتانی دیکە'، ئەوەش هەموو جۆرە کردەوەیەکی دوژمنانەی سەربازی دەگرێتەوە، هاوکات لە خاڵی ٥١ی ئەو جاڕنامەیەدا هاتووە، کە مافی بەکارهێنانی هێزی سەربازیی بۆ بەرگری لە خۆ بۆ هەموو وڵاتێک بە ڕەوا دەزانرێت، بەڵام لەو خاڵەدا ئەوەش هاتووە، کە لە ئەگەری ڕوودانی هێرشی سەربازیی بۆ سەر ئەو وڵاتە ئەو مافە بەڕەوا دەزاندرێت، بەڵام لە ڕۆژئاوای کوردستانەوە هیچ هێرشێک نەکراوەتەسەر تورکیا.

 

شەمس لە بەردەوامیدا بەم شێوەیە باسی هێرشی حکومەتی تورک بۆ سەر عەفرین کرد: بەڵام ئەگەر ئەوەش قبوڵ بکەین، ئەوە لە کاتێکدایە کە بەڵگەی متمانەپێکراو لە بارەی مەترسی و هەڕەشەی سەربازی لە سەر ئەو وڵاتە ئاراستەی کۆمەڵگای نێودەوڵەتی کرابێت، هێزەکانی سوریای دیموکرات دەیان جار ڕایانگەیاندووە، کە لەلایەن ئەوانەوە هیچ مەترسی و هەڕەشەیەکی سەربازی نەکراوەتە سەر تورکیا، هیچ بەڵگەیەکیش لە ئارادا نییە کە بیسەلمێنێت ئەو هێزانە ڕاستەوخۆ یان ناڕاستەوخۆ لە خاکی تورکیادا چالاکییان ئەنجام دابێت، تەنیا بەهانەی تورکیا بۆ ئەو هێرشە پەیوەندیی سیاسی و مەعنەویی هێزەکانی سوریای دیمومکرات بە پارتی کرێکارانی کوردستان- پەکەکەوەیە، کە ئەوەش وەک بەڵگە ناناسرێت.

 

ئەو مامۆستایەی مافە نێودەوڵەتییەکان لە کۆتاییدا، وتی: بە بۆچوونی من تورکیا بەو هێرشە بەرگریی لە خۆی ناکات، بەڵکو هێرش دەکات و ئەوەش پێشێلکردنی یاسا نێودەولەتییەکان لەقەڵەم دەدرێت.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin