Smiley face
Smiley face
Smiley face

پێشمەرگە دێرینەکان: عەفرین واتا کوردستان

2018-03-19 19:02:03



ڕۆژنیوز - سلێمانی

 

سکرتێری کۆمەڵەی پێشمەرگە دێرینەکانی هەرێمی کوردستان هۆشداریدا لەوەی، کە هێرشەکانی سەر عەفرین، لەچوارچێوەی پیلانگێڕێیەکی گەورەدایە بۆ سەر گەلی کورد، دەشڵێت: پێویستە هەموو لایەک خاوەنداریی لە عەفرین بکەین، چونکە عەفرین واتا کوردستان.

 

ئێوارەی ئەمڕۆ، ئەنجومەنی باڵای کۆمەڵەی پێشمەرگە دێرینەکانی هەرێمی کوردستان، لە بینای کۆمەڵەکەیان لە شاری سلێمانی، کۆنگرەیەکی ڕۆژنامەنووسییان سەبارەت بە دۆخی عەفرین ئەنجامدا.

 

لە کۆنگرە ڕۆژنامەنووسییەکەدا، حەمەڕەشید قەرەداغی، سکرتێری کۆمەڵەی پێشمەرگە دێرینەکان و ئەندامی ئەو شاندەی کە دوێنێ لە عەفرین گەڕانەوە، باسی لەوەکرد: لە سەردانکردنمان بۆ عەفرین، ئامادەیی ئەوەمان دەربڕی کە بەشداری لە شەڕ بکەین، بەڵام ئەوان ڕازی نەبوون و ڕایانگەیاند کە ئێمە میوانین، بە ڕێزەوە لە هەموو شوێنێکی ڕۆژئاوادا پێشوازیمان لێکرا.

 

 

وتیشی: پێویستە بزانرێت کە تورکیا ئامانجی بە تەنیا عەفرین نییە، بەڵکو دەیەوێت هەموو کورد لە ناوببات، بەداخیشەوە لە ماوەی ئەو چەند ڕۆژەی ئێمە لە عەفرین بووین، کەناڵێکی ڕاگەیاندنی باشور لە عەفرین نەبوو، کە ڕووماڵی دۆخی عەفرین بکات.

 

لە بەشێکی دیکەی قسەکانیدا، سکرتێری کۆمەڵەی پێشمەرگە دیرینەکان، ئاماژەی بەوەکرد: ڕۆژئاوای کورستان لە ڕووی سەربازییەوە خاوەن دیسپلینێکی بەهێزن و ئەوەی لە ئەواندا هەیە لە سیستمی ئێمەشدا نەبووە، بۆیە بابەتی عەفرین زۆر گرنگە و دەبێت ئێمەش لە سیاسەتی عەبادی تێبگەین کە بەهۆی دەستی دەستی کردنەوە جارێکی تر لێکمان دابڕێن و بە کێشەی مووچەوە سەرقاڵمان بکەن، بەڵام دەبێت باش لەوە تێبگەین کە سەرەڕای قەیرانەکان خاوەندارییەتی لە عەفرین بکەین، چونکە ئەمە  پیلانگێڕی گەورەیە لە سەر گەلی کورد و عەفرین واتای کوردستانە.

 

شایەنی باسه، ڕۆژی ۱۱ی ئەم مانگە، شاندێک لە کەسایەتیی و نوێنەر و بەشێک لە حزب و پێکهاتەکانی هەرێمی کوردستان، بە سەرپەرشتیی کۆنگرەی نەتەوەیی کوردستان، سەردانی عەفرینیان کرد و لە ناو ئەو شاندەشدا، چەند پێشمەرگەیەکی دێرین بەشداربوون.

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin