Smiley face
Smiley face
Smiley face

لەبەرامبەر هێرشەکانی سەر عەفرین شاعیران داوای یەکگرتوویی دەکەن

2018-03-19 11:17:11



ڕۆژنیوز- هاوکار مستەفا


شاعیرانی هەورامان ئاماژە بەوەدەکەن، بێدەنگبوونی وڵاتانی جیهان لە کۆمەڵکوژییەکانی سەر عەفرین ئاماژەی مەترسیدار بەدوای خۆیاندا دەهێنێت و داواش لە گەلی کورد دەکەن یەک هەڵوێست بن بەرامبەر بە داگیرکەران.


دەوڵەتی تورکیا ماوەی ٥٩ ڕۆژە بەهەموو شێوەیەک هێرشی داگیرکاریی بۆ سەر گەلی عەفرین دەکات و بەرخۆدانی شەڕڤانان و گەلی عەفرین-یش بەردەوامیی هەیە.


بەکر هەجیجی، یەکێک لە شاعیرانی شارەدێی خورماڵ سەربە هەڵەبجە، بە ڕۆژنیوزی وت: جێگەی داخە کە بەهۆی پەرتەوازەیی و دووبەرەکی ناوخۆمان و دابەشبوونی حزبە سیاسییەکانی باشووری کوردستان بەسەر بەرژەوەندی وڵاتانی هەرێمدا، وایکردووە کە نەمانپەرژێتە سەر ئەو کۆمەڵکوژییەی ئێستا لە عەفرین ڕوودەدات، بۆیە هەرچی زووە دەبێت واز لە پشت بەستن بە وڵاتانی هەرێمی و زلهێزەکانی تری جیهانیش بهێنین و یەکدەنگبین بۆ ڕووبەڕووبونەوەی دوژمنان.

 


وتیشی: مێژوو ئەوەی سەلماندووە کە گەلی کورد بە پیلانی وڵاتانی هەرێمیی و زلهێزانی جیهان کۆتایی نەهاتووە و کۆتاییشی نایەت، بۆیە بێدەنگبوونی وڵاتانی زلهێزی جیهانی لە ئاست کۆمەڵکوژییەکانی سەر عەفرین ئاماژەی مەترسیدار بەدوای خۆیاندا دەهێنن و بە جۆرێک لە جۆرەکان ڕێگەدانە بە تورکیا بۆ کۆمەڵکوژکردنی زیاتری گەلەکەمان لە ڕۆژئاوای کوردستان.


ئەو شاعیرە بە دێڕە شیعرێکی خۆی نیگەرانی لە پەرتەوازەیی ناوماڵی کوردی دەربڕی


بۆ بۆ یەکتری بووین بە گورگە هارە
 بۆ یەک هەڵئەخەین پەتی قەنارە
 وەرن با بۆ یەکتر ببین بە چرا
 پشتی یەکبگرین گشت وەکو برا
 یەک بۆ یەکتری خۆمان کەین بە پرد
 بونیادنێین دەوڵەت یەکپارچەیی کورد


هەروەها ئارام حاجی، یەکێک لە شاعیرانی تەوێڵە، بە ڕۆژنیوزی وت: وڵاتانی جیهان بە هاوکاری تورکیا دەیانەویت بە پیلانەکانیان عەفرین بسڕنەوە و خەڵکەکەی کۆمەڵکوژ بکەن، گرنگە ئەو ڕاستیە بزانن کە ئەوە خەیاڵێکی خاوە، چونکە وەک چۆن کۆبانێیان وێرانکرد، بەڵام کۆبانێ‌ دروست بوویەوە بە هەمان شێوەش ئەگەر عەفرنیش وێران بکەن هەر دروستدەبێتەوە، بۆیە دەبێت ستەمکارانی تورکیا و جیهان واز لەو بیرکردنەوانەیان بهێنن.

 


ئارام حاجی، وتیشی: بێدەنگی وڵاتانی جیهان لەئاست ئەو کۆمەڵکوژیانەی لە عەفرین ڕوودەدات جێگەی سەرسوڕمانە، لەکاتێکدا وا جارێکی تر ١٦/٣/١٩٨٨ی تاوانی هەڵەبجە خۆی نمایش دەکاتەوە لە عەفرین، لە کاتێکدا بە چەند پاساوێکی بێبنەمای دەوڵەتی تورک باوەڕیان هێناوە و بێدەنگ بوون لە ئاست تاوانەکە، بۆیە جارێکی تر ئەو ڕاستیەمان بۆ ڕووندەبێتەوە کە دەبێت باوەڕ بەهیچ وڵاتێکی جیهان نەکەین، بەڵکو خۆمان پشتی یەکبگرین.


ک.ک
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin