Smiley face
Smiley face
Smiley face

وتەبێژی یەپەگە لە عەفرین: شەڕ پێی ناوەتە قۆناغێکی نوێوە

2018-03-19 09:20:08



ڕۆژنیوز - ناوەندی هەواڵەکان


بروسک حەسەکە، وتەبێژی یەکینەکانی پاراستنی گەل- یەپەگە لە عەفرین دەڵێت، شەڕی حەفرین پێی ناوەتە قۆناغێکی نوێوە و لەمڕۆ بە دواوە خاڵەکانی سوپای تورک و چەتەکانی دەکەین ئامانج.


دوێنێ وتەبێژی یەپەگە لە کۆنگرەیەکی ڕۆژنامەنووسیدا باسی لە بەرخۆدانی شەڕڤانانی یەپەژە و یەپەگە کرد و بەڵێنی شەڕڤانانی یەپەژە و یەپەگەی بۆ خەڵک دووپات کردەوە.


بروسک حەسەکە ڕایگەیاند: ڕوسیا ڕێگای بۆ چەتەکانی داعش و ئەلقاعیدە خۆش کرد، کە بە هەموو جۆرەکان هێرشبکەنە سەر عەفرین، ئێمە بەڵێنمان بە گەلەکەمان داوە کە بەرگرییان لێ بکەین، شەڕی دژی سوپای تورک چووە قۆناغێکی نوێوە، بەردەوام دەبین لە شەڕەکەدا تا ئەو کاتەی تاکە یەک سەربازی سوپای تورک لە خاکی عەفریندا مابێت.


بروسک وتیشی: حکومەتی تورک بە هێڕشکردنە سەر عەفرین ژیانی ئاشاتیانە و برایەتی گەلانی کردووەتە ئامانج، بەڵێن دەدەین، کە ڕێگانەدەین حکومەتی تورک لە دژی گەلەکەمان کۆمەڵکوژی ئەنجام بدات، تا ئێستا لە قۆناغی بەرگری لە هاوڵاتیانی مەدەنیدا بووین، لەمەودوا کە هاوڵاتیانی مەدەنی لە شوێنی پارێزراو لە شەڕ جێگیرکراون، چالاکییەکانمان لە دژی سوپای تورک دەستپێدەکەین، بەبێ دوودڵی هەموو خاڵەکانیان دەکەینە ئامانجی چالاکییەکانمان.


وتەبێژی یەپەگە لە عەفرین باسی لەوەش کرد، کە شەڕڤانانی یەپەژە و یەپەگە خاکی عەفرین دەکەنە گۆڕستانی داگیرکەران، لەمڕۆ بە دواوە لە هەموو شوێنێک دەبین، ئەوەندەی سوپای تورک ئاڵاکانی لە عەفرین هەڵ بکات، چەندین ئەوەندە لە دژیان چالاکی دەکەین و عەفرین لە چنگیان ڕزگاردەکەین.


لە کۆتاییشدا وتی: دەوڵەتانی جیهان کە پشتگیریی یەپەژە و یەپەگەیان دەکرد بۆ شەڕی دژی داعش، ئەمڕۆ وەستاون و سەیردەکەن چۆن خەڵکی عەفرین کۆمەڵکوژ دەکرێن، یەپەژە و یەپەگە ڕێگانادەن کە سوپای تورک دیموگرافیای ناوچەکە بگۆڕێت.


ک.ک
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin