Smiley face
Smiley face
Smiley face

له‌ سیمینارێکدا هۆکاره‌کانی ده‌ستگیرکردنى ئۆجالان خرانه‌ڕوو

2018-02-14 19:50:54



ڕۆژنیوز - هاوکار مسته‌فا


له‌ شارۆچکه‌ی پێنجوێن-ی سه‌ر به‌ پارێزگای سلێمانی له‌ سیمینارێکدا که‌ بۆ نوسه‌رێکی کورد سازکرابوو، باس له‌ هۆکاره‌کانی پیلانگێڕیی ١٥ی شوبات و هاوکات هۆکاره‌کانی به‌رده‌وامی به‌رخودانی گه‌لی عه‌فرین به‌رامبه‌ر به‌ داگیرکه‌ران خرانه‌ڕوو.


 ئێواره‌ی ئه‌مڕۆ، له‌ هۆڵی کتێبخانه‌ی گشتی شارۆچکه‌ی پێنجوێن-ی سه‌ر به‌ پارێزگای سلێمانی، کۆمیته‌ی ئاماده‌کاری چالاکییه‌کانی ۱٥ی شوبات، له‌سه‌ر پیلانگێڕی ۱٥ی شوباتی ساڵی ١٩٩٩ی دژبه‌ ئۆجالان، سیمینارێکی بۆ حه‌سه‌ن جودی نوسه‌ر، ڕێکخست.


 له‌ سیمیناره‌که‌دا که‌ ژماره‌یه‌ک له‌ به‌رپرسانی حزبیی و حکومیی و چین و توێژه‌ جیاوازه‌کانی شارۆچکه‌ی پێنجوێن ئاماده‌یبوون، حه‌سه‌ن جودی، ئاماژه‌ی به‌وه‌کرد: پیلانگێڕیی ١٥ی شوبات زۆر مه‌به‌ست و ئامانجی له‌ پشته‌وه‌ بوو، که‌ دوژمنانی گه‌له‌که‌مان به‌ نیاز بوون به‌و پیلانگێڕییه‌ نێوده‌وڵه‌تییه‌ به‌ده‌ستیان بهێنن، به‌ تایبه‌ت که‌ ویستیان به‌ ده‌ستگیرکردنی ئۆجالان خه‌باتی کورد بگێڕنه‌وه‌ خاڵی سفر و گه‌لی کورد زیاتر پارچه‌ پارچه‌ بکه‌ن.

 


ئه‌وه‌شی خسته‌ڕوو: یه‌کێکی تر له‌ ئامانجه‌کانی پیلانگێڕیی سه‌ر ئۆجالان تێکشاندنی ئیراده‌ی گه‌لی کورد بوو به‌ گشتی و له‌ باکوور به‌ تایبه‌ت، به‌ڵام له‌مه‌شدا دوژمن به‌ هه‌ڵه‌دا چوو، له‌به‌ر ئه‌وه‌ ده‌بینین له‌ ئێستادا چ ئیراده‌یه‌کی پۆڵاین له‌سه‌ر ده‌ستی ئۆجالان له‌ هه‌موو کوردستان به‌دی ده‌کرێت، بۆیه‌ ئه‌وه‌ی که‌ کرا به‌رامبه‌ر به‌ ئۆجالان ته‌نها پیلان نه‌بوو دژ به‌ که‌سایه‌تی ئۆجالان به‌ڵکو پیلان بوو بۆ له‌ناوبردی گه‌لێک.


حه‌سه‌ن جودی ئه‌وه‌شی باسکرد: ئه‌وه‌ی ئێستا له‌ عه‌فرین ده‌گوزه‌رێت و به‌رخودانێکی قاره‌مانانه‌ به‌دیده‌کرێت و درێژه‌ی پێده‌درێت، له‌سه‌ر ئه‌و بنه‌مایه‌ دامه‌زراوه‌ که‌ ئۆجالان خه‌باتی بۆ کردووه‌، بۆیه‌ دڵنیاین که‌ له‌م هێرشانه‌شدا داگیرکه‌ران شکست ده‌هێنن وه‌ک چۆن له‌ کۆبانی شکستیان هێنا و هه‌روه‌ها نه‌شیان توانی ئه‌و ئامانجانه‌ به‌دی بهێنن که‌ مه‌به‌ستیان بوو له‌ ده‌ستگیرکردنی ئۆجالاندا به‌ده‌ستی بهێنن.


 له‌ کۆتایی سیمیناره‌که‌شدا له‌لایه‌ن ئاماده‌بووانه‌وه‌ به‌ خستنه‌ڕووی چه‌ند پرسیار و سه‌رنجێک زیاتر باس له‌ پیلانگێڕى ١٥ى شوبات کرا.

 


ک.ک
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin