Smiley face
Smiley face
Smiley face

گەنجانی پێنجوێن: فەلسەفەی ئۆجالان چارەسەری کێشەکانی ڕۆژهەڵاتی ناوەڕاست دەکات

2018-02-14 09:23:50



ڕۆژنیوز - هاوکار مستەفا

 

گەنجانی شارۆچکەی پێنجوێن، ڕایدەگەیەنن، کە ئۆجالان تەنیا بە جەستە لە زیندانە، بەڵام بە فکر و ئایدۆلۆژیا لەناو خەڵکدایە، دەشڵێن: فەلسەفەی ئۆجالان تاکە ڕێگایە بۆ چارەسەرکردنی کێشەکانی ڕۆژهەڵاتی ناوەڕاست.

 

سبەینێ ١٩ ساڵ تێدەپەڕێت بەسەر گەلەکۆمەی نێودەوڵەتیی ١٥ی شوبات دژ بە عەبدوڵا ئۆجالان، ڕێبەری پارتی کرێکارانی کوردستان (پەکەکە) و گەنجانی شارۆچکەی پێنجوێنی سەر بە پارێزگای سلێمانی-ش لەوبارەیەوە بۆ ڕۆژنیوز دەدوێن.

 

میترا پێنجوێنی، یەکێک لەو گەنجانەیە و وتی: ئۆجالان ماوەی 19 ساڵە لە زیندانی تاکە کەسیی بەرخۆدان دەکات بە بێ‌ ئەوەی تەسلیم بە خواستی داگیرکەران ببێت، بە پێچەوانەی هەندێک لە سەرکردەکانی تر، کە لەپێناو بەرژەوەندییەکی تایبەتیی خۆیان تەسلیم بە دووژمنان کردووە.

 

 

میترا پێنجوینی، بەردەوامیی بە بەراوردکارییەکەی دا و وتی: ئۆجالان بە جەستە لە زیندانە، بەڵام بە فکر و ئایدۆلۆژیا لەناو خەڵک و ئێمەی گەنجاندایە لە کاتێکدا سەرکردەکانی تر بە جەستە ئازادن، بەڵام بیرۆبۆچون و کارکردنیان خزمەتکردنە بە داگیرکەران.

 

میترا، هەروەها وتی: هەموو خەبات و ژیانی ئۆجالان لەپێناو ئازادیی گەلی کورد و گەلانی تری بندەست بووە، ئەوە سەرەڕای ئەوەی ئازادیی ژنان لە سەروو هەموو کارێکی ئۆجالانەوە بووە، بۆیە ئێمە وەک ژنان درێژە بە خەبات دەدەین بۆ ئازادیی جەستەیی ئۆجالان.

 

هەردی ڕەحمان، یەکێکی دیکەیە لەو گەنجانە و وتی: ئەو فکر و فەلسەفەیەی ئۆجالان هەیەتی تاکە ڕێگایە بۆ چارەسەرکردنی سەرجەم کێشە و گرفتەکانی ڕۆژهەڵاتی ناوەڕاست بە گشتی و گەلی کورد بە تایبەتی، بۆیە جێگەی خۆیەتی هەموو تاکێکی گەلی کورد شانازیی بە کەسایەتییەکەی وەک ئۆجالان-ەوە بکەن و شوێن ڕێبازەکەی بکەون.

 

 

هەردی، وتیشی: ئەگەر بە وردیی گوزەرێک بە ژیان و خەبات و بیروبۆچونەکانی عەبدوڵا ئۆجالاندا بکەین، ئەوا زۆ بە ئاسانیی بۆمان ڕوون دەبێتەوە، کە چۆن دەتوانین مامەڵە لەگەڵ داگیرکەراندا بکەین و زۆریش بە ئاسانی دەتوانین بە سەر دوژمنەکانماندا سەرکەوین، لەبەر ئەوە ئەرکی هەموو تاکێکە چالاکی ئەنجام بدات بۆ ئازادیی ئۆجالان.

 

له‌ ڕۆژی ٩ی ئۆکتۆبه‌ری ساڵی ١٩٩٨، گه‌له‌کۆمه‌ی نێوده‌وڵه‌تیی بۆ ده‌ستگیرکردنی عه‌بدوڵا ئۆجالان، ڕێبه‌ری پارتی کرێکارانی کوردستان -په‌که‌که‌‌ ده‌ستیپێکرد، دواتر له‌ ١٥ی شوباتی ساڵی ١٩٩٩، ئۆجالان له‌ شاری نایرۆبی پایته‌ختی وڵاتی کینا ڕفێنرا و ڕاده‌ستی ده‌وڵه‌تی تورک کرا و خرایه‌ زیندانی ئیمراڵی-یه‌وه‌.

 

پارێزەرەکانی ئۆجالان لە ڕۆژی ٢٧ی تەموزی ساڵی ٢٠١١وە ڕێگایان پێ نەدراوە سەردانی ئیمرالی بکەن و چاویان بە بریگرتەکەیان بکەوێت.

 

هەروەها، له‌ ٥ى نیسانى ٢٠١٥ ده‌وڵه‌تی تورک بەتەواویی گۆشه‌گیریی خستووەته‌ سه‌ر ئۆجالان و له‌و ماوه‌یه‌دا ته‌نیا یه‌ک جار و له‌ ١١/٩/٢٠١٦ محه‌مه‌د ئۆجالان-ی برای سه‌ردانی ئیمراڵی کردووه‌ و چاوی پێیکه‌وتووه‌، له‌ دوای ئه‌و سه‌ردانه‌شه‌وه‌ هه‌تا ئێستا هیچ زانیارییه‌ک له‌سه‌ر ڕه‌وشی ئۆجالان نییه‌ و هیچ په‌یامێکی ئۆجالان نه‌گه‌یشتووه‌ته‌ ده‌ره‌وه‌ی زیندان.

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin