Smiley face
Smiley face
Smiley face

"ڕەوتی ئاپۆچی بووەتە ڕەوتێکیی گەورەی شۆڕشگێڕان لە جیهاندا"

2018-02-14 09:14:38



ڕۆژنیوز – ڕۆزە محەمەد

 

بەرپرسی کۆمیتەی ئازادی ئۆجالان ڕایدەگەیەنێت:"دوژمنانی کورد نەیانتوانی بە پیلانگێڕی نیودەوڵەتی سەر ئۆجالان پەکەکە لاوازبکەن، بەڵکو ڕەوتی ئاپۆچی لە هەموو دونیادا بووەتە ڕەوتی گەورەی شۆڕشگێڕانە و مرۆڤدۆستانە".

 

سبەینێ ١٩ ساڵ بەسەر گەلەکۆمەی نێودەوڵەتی دژ بە عەبدوڵا ئۆجالان، ڕێبەری پارتی کرێکارانی کوردستان- پەکەکەدا تێدەپەڕێت، کە لە ١٥ی شوباتی ١٩٩٩ لە پیلانگێڕییەکی نێودەوڵەتیدا لە کینیا ڕفێندرا، لەگەڵ نزیکبوونەوە لەو ڕۆژە، داواکارییەکان بۆ ئازادی ئۆجالان لە ناوخۆ و دەرەوە روو لەزیادبوون دەکەن.

 

ڕێکەوت ئیسماعیل، بەرپرسی کۆمیتەی ئازادی ئۆجالان بە رۆژنیوزی وت:"لە ماوەی ئەو ١٩ ساڵەی کە ئۆجالان لە زینداندا بووە گۆڕانکاری گەورە بووە، دوژمنانی کورد نەیانتوانی بەو پیلانگێڕیە نیودەوڵەتیە ئامانجی خۆیان بپێکن، کە لاوازکردنی پەکەکە بوو، ئێستا کە دەبینین پەکەکە گەشەسەندنێکی جۆری بەخۆیەوە بینیوە".

 

 

ڕێکەوت ئیسماعیل، وتیشی:"ڕەوتی ئاپۆچی لە هەموو دونیادا بووەتە ڕەوتی گەورەی شۆڕشگێڕانە و مرۆڤدۆستانە، کە لە هەموو دونیاوە پشتیوانی لێدەکرێت، وە ئەو چارەسەرییەی کە ئۆجالان بۆ کێشەکانی ڕۆژهەڵاتی ناوەڕاست دایناوە، بەتایبەتی کە لە سوریا ڕەنگ دەداتەوە کە ئەو هەرێمە فیدڕاڵیەی تێدا ڕادەگەیەندراوە، بەرخۆدان و خاوەنداریکردنی گەلی کورد لە ئۆجالان بوونە هۆکاری ئەوەی ئامانجی پیلانگێڕیە تێکبشکێندرێت".

 

ئاماژەی بەوەشدا:"گەورەترین کێشەی کوردی هەرچوار پارچەی کوردستان ئەوەیە کە پەکەکە هەتا ئێستا لەناو لیستی تیرۆردایە، بۆیە پێویستە خەمی یەکەممان ئەوە بێت کە ناوی پەکەکە لەو لیستەدا دەربهێنین، کە ئەوەکرا ئەوا هیچ واتایەک بۆ ئەوشەڕانەی تورکیا بە ناوی تیرۆرەوە بەکوردی دەکات نامێنێتەوە".

 

ڕێکەوت زیاتر دواو، وتی:''تورکیا لەو باوەڕەدان کە گۆشەگیرکردنی ئۆجالان و ئەشکەنجەدانی دەروونی بریتییە لە شەڕێک کە بەسەر کورد پیادە دەکرێت، لەم شەڕەدا شکستیان هێناوە و شکستی زیاتر دەهێنن، پێم باشە گەلی کورد لە جاران زۆر زیاتر بیر لە چارەسەری ڕادیکاڵانە بکاتەوە بەرامبەر بەو دەستدرێژیانەی کە تورکیا و ئەردۆغان دەیکەنە سەر نەتەوەی کورد".

 

جێگای باسە، پارێزەرەکانی ئۆجالان لە ڕۆژی ٢٧ی تەموزی ساڵی ٢٠١١وە ڕێگایان پێ نەدراوە سەردانی ئیمرالی بکەن و چاویان بە بریگرتەکەیان بکەوێت.

 

هەروەها، له‌ ٥ى نیسانى ٢٠١٥ ده‌وڵه‌تی تورک بەتەواویی گۆشه‌گیریی خستووەته‌ سه‌ر ئۆجالان و له‌و ماوه‌یه‌دا ته‌نیا یه‌ک جار و له‌ ١١/٩/٢٠١٦ محه‌مه‌د ئۆجالان-ی برای سه‌ردانی ئیمراڵی کردووه‌ و چاوی پێیکه‌وتووه‌، له‌ دوای ئه‌و سه‌ردانه‌شه‌وه‌ هه‌تا ئێستا هیچ زانیارییه‌ک له‌سه‌ر ڕه‌وشی ئۆجالان نییه‌ و هیچ په‌یامێکی نه‌گه‌یشتووه‌ته‌ ده‌ره‌وه‌ی زیندان.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin