Smiley face
Smiley face
Smiley face

نامەکانی شەهید ڤیان جاف بۆ عەبدوڵا ئۆجالان

2018-01-31 13:07:05



ڕۆژنیوز- ناوەندی هەواڵەکان

 

ڤیان جاف لە نامەکەیدا بۆ عەبدوڵا ئۆجالان، ڕێبەری پارتی کرێکارانی کوردستان نووسیویەتی "وەك قوتابییەكی ئێوە لەدژی ئەم هێرشە ناڕەوایە دەمەوێ‌ لەم 15ی شوباتەدا لەنێو گەلی خۆمدا بەرخۆدانی گەلەكەم، بەئاگری جەستەم دەمەوێ‌ پەیامێك بدەمە مێشك و دڵی سەهۆڵبەندی شارستانێتی كۆمەڵگای چینایەتی".

 

لەیلا والی حسێن، ناسراو بە (ڤیان جاف)و(ڤیان کارۆخ) و (ڤیان سۆران) لەساڵی ١٩٨١ لەشاری سلێمانی لە دایکبووە و لە بەهاری ساڵی ١٩٩٧ بەشداری ڕیزەکانی گەریلا بووە، لە شەوی ٢/١ی مانگی شوباتی ٢٠٠٦ لە ناوچەی حەفتانین بە دروشمی"سەر لە نوێ واتادان بە گوتەکانمان" چالاکییەکی گیانبازیی ئەنجامدا.

 

ڤیان جاف، پێش ئەنجامدانی چالاکییەکە نامەیەکی چوار بەشیی نووسی، کە دوای شەهیدبوونی دەنگدانەوەیەکی زۆری لەناو خەڵکدا دروستکرد و هۆکاریک-یش بوو بەشداربوونی ژمارەیەکی زۆر لە گەنجانی باشوری کوردستان بۆناو ڕیزەکانی گەریلا.

 

دووەم بەشی نامەکەی ڤیان جاف بۆ عەبدوڵا ئۆجالان-ە.

 

ئەمەی خوارەوە دەقی بەشی دووەمی نامەکەی شەهید ڤیان-ە.

 

بۆ رۆشنایی شەوەزەنگەكان "سەرۆك ئاپۆ" :-

 

لەو رۆژەوەی كە تۆم بیستووەو ناسیوە هەست بەژیان دەكەم، دەزانم كە كێم و دەبێ‌ چۆن بژیم. یانی فكر و رامانی تۆ منی بەمن ناساند و فێری كردم كە بەمانا بژیم، فێری ئەلفوبای ئازادی و سەربەستیت كردم. لەفێرگەكەی تۆدا چەندە زەحمەتیشم كێشا بێت، هیچ رۆژێ‌ لەرۆژان دوودڵی و پەشیمانیم ژیان نەكرد، چونكە تیایدا هێزی واتام كەشفكرد، هێزی فكر و هێزی مرۆڤ، كەمێكیش بێت لەوە تێگەیشتم كەهیچ شتێك موستەحیل نییەو مرۆڤ چی بكاتە ئامانج دەتوانێ‌ پێی بگات بەمەرجێ‌ كە لەو ئامانجەدا جددی بێت و پێی باوەڕ بێت، وەكو ژنێك و وەكو كوردێك ئازادیم كردە ئامانج و لەدڵەوە باوەڕیم پێكرد، بۆ ئەمەش بەحەسرەتەوە بووم كە بۆ ساتەوەختێكیش بێت لەنزیكەوە بتبینم و توند لەباوەشت بگرم و هەناسەیەكم بدایە و پاشان ئەوەی لەدڵمدایە دەرهەق بەئازادی خۆم و ژنان و گەلەكەم لەگەڵ تۆدا وتووێژ بكەم، بەڵام لەساڵی 1998دا پیلانگێڕییە گڵاوەكەی نێودەوڵەتی لەدەرەوەو ناوەوەدا كەوتە نێوان من و تۆ و بەهەزاران كەسی وەك من كە هاوئەشق و بەهیوا بوون بەدیتنت. دوای ئەوە دەستگیركردنی ئێوە لەمندا زیاتر تەكانی بەهێزو بڕیاری ئازادی دا و هیواو حەسرەتی دیتنی ئێوەم قەد وون نەكرد، بەڵام بەردەوام هەوڵی ئەوەم دەدا كە زۆر لەنزیكەوە هەستت پێبكەم. بۆیە زۆر جار لەناخمدا دیالۆگم لەگەڵتاندا پێش دەخست و هەستم دەكرد وەك دەنگ، وەك وزەیەك دەكەوتیە ناخمەوەو ئیلهامم لێدەگرتن.

 

چەند جاریش هاتی بەمیوانی خەونەكانم و زۆر زۆر خۆشحاڵا بووم، ئەوەی راستی بێت ناتوانم بەتەواوی گوزارە بكەم لەهەست و بیرەكانم سەبارەت بەئێوە، بەڵام لەساڵی 1999 بەدواوە بەردەوام راستییەك لەمێشكی مندا دەزرینگێتەوە، ئەویش ئەوەیە كەزیندانیكردنی مرۆڤێكی گەورەی وەك ئێوەم پێ هەزم نەكرا و  هەر دەموت ئەم مرۆڤە ئەو جێیەی حەق نەكردووە، بێگومان بەرپرسیاری دەستگیركردن و گۆشەگیركردنی سەرۆكی گەلێك و رێنیشاندەرێكی گەورەی مرۆڤایەتی تەنیا دەوڵەتانی رووڕەشی جیهان نابینم، بەئەندازەی ساختەكاری و دووڕوویی و خیانەتی دەوڵەتانی سەردەست لاوازی و كەم و كورتی هاوڕێیەتی خۆم و هەڤاڵانیشم بەرپرسیار دەبینم. بۆیە هەردەم شەرمەندە بووم لەحزووری ئێوەو گەل و ئەو ژنانەدا كە هیوای ئازادییان بەئێوەوە گرێداوە.

 

ئەمڕۆش لە 15ی شوباتی 2006دا پێ دەنێینە هەشتەمین ساڵی دەستگیركردنی سەرۆكایەتییەوەو پیلانگێڕی نێودەوڵەتی قۆناخێكی نوێ‌ و مەترسیداری لەسەر ئیمرالی و كوردستان بەگشتی دەستپێكردووە. دەیانەوێ‌ هەموو رەنج و تێكۆشانی ئاشتی و دیموكراسی سەرۆكایەتی و گەلی كورد بەفیڕۆ بدەن و بەئاشكرا بانگەشەی تەسلیمیەت و دەستبەردان لەسەرۆكایەتی بكەن، دەیانەوێ‌ دەستەمۆمان بكەن و فێری ئەوەمان بكەن كە بێ‌ سەرۆك، واتە بێ‌ ئایدیۆلۆژی، بێ‌ ئیرادە ژیان بكەین، بۆیە ئەمڕۆ گەل لەهەر چوارلای جیهان لەدژی ئەم سیاسەتی قڕكردنەی كە لەسەر سەرۆكایەتی پەیڕەو دەكرێ‌ ناڕەزایی خۆی دەردەبڕێ‌، منیش وەكو قوتابییەكی ئێوە لەدژی ئەم هێرشە ناڕەوایە دەمەوێ‌ لەم 15ی شوباتەدا لەنێو گەلی خۆمدا بەرخۆدانی گەلەكەم، بەئاگری جەستەم دەمەوێ‌ پەیامێك بدەمە مێشك و دڵی سەهۆڵبەندی شارستانێتی كۆمەڵگای چینایەتی و وەك زۆر مرۆڤی دیكە دەمەوێ‌ لەدادگای مێژوودا ببمە شاهیدێك بۆ قیڕاندن و ئیشارەپێكردنی زۆرداری و درۆزنی سیستەمی داد و مافی مرۆڤی رۆژئاوا.

 

سەرۆكی من،

 

ئەم چالاكییەی كەئەنجامی دەدەم لەگەڵا ئەوەی ناڕەزایی و ئیسباتێكە لەدژی ئەو حەقسزییە (ناهەقییە)ی كە لەدژی ئێوەو گەلی كورد لەلایەن دەوڵەتانی سەردەستەوە پەیڕەو دەكرێ‌، هاوكات رەخنەدانێكی هاوڕێیەتی كەم و لاواز و رزگاربوونمە لەهەستی شەرمەندەیی و بێ‌ روومەتی لەبەرامبەر مێژوو و گەلەكەمدا، ئاستی ئیدیعا و باوەڕیمە بەوەی كە هەتا تاكە كەسێكیش بمێنێ‌ ئەم فەلسەفەو هێڵی ژیانەی ئێوە هەر دەژی و سەردەكەوێ‌.

 

زۆر كەس دەڵێت و دەفكرن كە تا ئایدیۆلۆژی توونە بكەن (لەناوببەن) و نەهێڵن، من گاڵتەم بەمە دێت و ئیدعایەكی زۆر پڕوپووچە، چونكە ئێوە ئیدی لەدڵا و مێشك و حوجرەی بەملیۆنان كەسدا و بەتایبەتی لەدڵی ژناندا جێگیربوون و بوون بەماڵی مێژوو و كۆمەڵگا. هەمووجارێ بەوەفایی و راستگۆیی ژنت بەئێمە ناساند جائەمڕۆ سەرباری هەموو كەم و كورتی و لاوازییەكانمانەوە دەمەوێ‌ رەخنەی خۆم بدەم و بڕیاری بوونی خۆم لەهێڵی سۆسیالیزمی زانستی و دیموكراتی و پارادیگمای نوێ‌ نیشان بدەم و كەمێكیش بێت، پەیامێك بدەمە پاشڤەڕۆیەتی نێوخۆ و هێرشەكانی دەرەوە، منیش زۆرجار وەكو هەڤاڵانی شەهید دەمگوت، خوزگە لەگیانم بەبەهاتر شتێكیتر هەبووایە لەپێناو ئازادی سەرۆك و گەلەكەم و ژنە چەوساوەكاندا فیدام بكردایە.

 

لەدوای گرتنی ئێوە و لەساڵی 1999دا بەردەوام بڕیاری ئەنجامدانی چالاكییەكم هەبوو، بەڵام لەبەر ئەوەی هەلومەرج گونجاو نەبوو بۆ شتێكی وەها و بەتایبەتیش بۆ ئەوەی ئێوە زویر نەكەم هەر هەوڵمدا لەژیاندا دروستبوون، گرێدانی خۆم لەگەڵا ئێوەدا نیشان بدەم، ئەمڕۆش دەزانم كە لەوانەیە ئەم چالاكییە رەخنە بكەن و پەسندی نەكەن بەڵام چی بكەم سەرۆكی من هەندێك هەن ئاشق دەبن و دەستی یەكتر دەگرن و رادەكەن. ئاشقبوونی منیش وەهایە و دڵم بێ‌ ئێوەو بێ‌ پێكەنین و زەردەخەنەی سەر لێوی مناڵانی وڵاتەكەم سوكنایی نایەو ئۆقرە ناگرێ‌.

 

نەمتوانی بڕیارەكەم لەقۆناخێكی وەها هەستیاردا درەنگ بخەم بۆ ساڵی هەشتەمی دەستگیركراوی و دووری ئێوە، بۆیە داوای لێبوردن دەكەم و دەمەوێ‌ ئەوەش بڵێم كە زۆر بە هیواو بەورەم، بەتایبەتی كاتێ‌ بۆ دیاریكردنی كۆمیتەی ئینشای پەكەكە (سەرلەنوێ ئاواكردنەوەی PKK)  ناوی منت گرتە سەر زمانی خۆت و پرسیاری منت كرد، هەستم بەوەكرد كە گەورەترین خەڵاتت دامێ‌ و هەست بەروومەتێكی مەزن دەكەم، بەردەوام رێنماییەكەی تۆ بۆ شۆڕشی باشوور كە وەك شۆڕشێكی ژن بەناوی دەكەن، لەمندا ورەو ئاراستەی تێكۆشانی دیاری كردووە، ئێستاش لەنێو ئەو بێ‌ دەنگی و  مردنەی كە لەباشووردا هەیەو دەمەوێ‌ وەك ژنێكی باشوور كەمێكیش بێت قەرەبووی پاداشتی رەنج و چاكەكانی ئێوە بدەمەوە، زۆر شاد دەبم كەئەنجامێكی سەركەوتوو بەدەست بێنم، لەدواییدا سڵاو و خۆشەویستی و حەسرەتی دیتنی خۆم ئاراستەی تۆی بێ هاوتا دەكەم، لەبیرتان نەچێ‌ زۆرتان بیر دەكەین و زۆرتان بیردەكەین....

 

لەگەڵ سڵاو و رێز و حەسرەتمدا

 28/1/2006

د.خ

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin