Smiley face
Smiley face
Smiley face

فشارەکان ڕۆژنیوز ناوەستێنن

2018-01-22 16:39:59



ڕۆژنیوز – ناوەندی هەواڵەکان

 

ئاژانسی هەواڵی ڕۆژنیوز، پاش هاککردنی لەلایەن دەوڵەتی تورکەوە، بۆماوەی نزیکەی پێنج کاتژمێر، لە ئێستادا توانراوە ئاژانسەکە لە دەست هێرشکەرانی دەوڵەتی تورک وەربگیرێتەوەو بەردەوامی بە بڵاوکردنەوەی هەواڵەکانی دەدات.

 

وێڕای سەدان ئاستەنگی، ڕۆژنیوز لە ١-١٠-٢٠١٤ وە، بە دروشمی "خستنەڕووی ڕاستییەکان ئەرکی ئێمەیە" هەواڵەکانی بە زارەوەکانی و سۆرانی و کورمانجی و زمانەکانی عەرەبی و تورکی بڵاودەکاتەوە.

 

ئاژانسی ڕۆژنیوز لەماوەی چوارساڵی کارکردنیدا، ڕووبەڕووی سەدان ئاستەنگ بووەتەوە، هەر لە دەستگیرکردن و شاربەدەرکردنی پەیامنێرەکانەوە، تا تیرۆرکردن و شەهیدکردنی پەیامنێرەکانی، دواترین هێرشیش بۆ سەر ڕۆژنیوز، هاککردنی وێب سایتەکەبوو، کە لە پای ڕووماڵکردنی ڕاستییەکاندا ئەمڕۆ هاککرا.

 

 

لەسەرەتای دامەزراندنی ڕۆژنیوزەوە، چەندین جار پەیامنێرەکانی ڕووبەڕووی لێدان و ڕفاندن و هەڕەشەکردن بوونەتەوە، لە ساڵی ٢٠١٦دا، پەیامنێری ڕۆژنیوز ئامانج ڕەسوڵ، لە کاتی ڕووماڵیکردنی ئۆپەراسیۆنی ڕزگارکردنی شەنگالدا لەلایەن چەتەکانی داعشەوە شەهیدکرا.

 

(ئامانج ڕەسوڵ)

 

هەر لەو ساڵەدا و لە ١٣ی ئابدا، ڕۆژنامەنووس و پەیامنێری ڕۆژنیوز وەدات حسێن، لەلایەن چەند چەکدارێکەوەو بە ڕۆژی ڕووناک لە ناو شاری دهۆکدا ڕفێندرا، پاش چەند کاتژمێرێک، بە بریندارییەکی سەختەوە دۆزرایەوە، کە هەمان کات بەهۆی دڕندەیی ئەشکەنجەکانەوە ژیانی لەدەستدا و شەهیدبوو.

 

(وەدات حسێن)

 

لە دوای تیرۆرکردنی وەدات-ەوە، ڕۆژنیوز چەندین بەدواداچوونی بۆ کەیسەکە کردووەو بەردەوامە، بەڵام لەلایەن ئاسایش و پۆلیسی دهۆک و دەسەڵاتدارانی حکومەتی هەرێمەوە، تا ئێستاش یەک کەس لەسەر کەیسەکەی دەستگیرنەکراوەو تیرۆرکەرانی لە رای گشتی جیهانی و ناوخۆ دەشاردرێتەوە.

 

ڕۆژنیوز پاش شەهیدبوونی دوو پەیامنێری لەو ساڵەدا، بەگوڕتر لە جاران کارەکانی بەردەوامی پێداوە، کە هەر بەو هۆیەشەوە دەیان جار پەیامنێر و وێنەگرەکانی دەستگیرکراون و ئەشکەنجە دراون و پێشێلکارییان بەرامبەر کراوە، بەجۆرێک لە راپۆرتی سەندیکا و ڕێکخراوە ناوخۆیی و نێودەولەتییەکاندا، پێشلکارییەکانی بەرامبەر  ڕۆژنیوز هەمیشە پشکی شێریان بەرکەوتووە.

 

دواین پێشێلکاری بەرامبەر ڕۆژنیوز، کە پێشێلکارییەکی زەقی بنەماکانی کاری ڕاگەیاندنی و مافەکانە مرۆڤی جیهانییە، هاککردن و راگرتنی ماڵپەڕەکەی بووە لە ئەمڕۆدا، کە ئەوەش دوای ئۆپەراسیۆنی دەولەتی تورک دێت بۆ داگیرکردنی عەفرین و بۆردوومانکردنی هاوڵاتیانی مەدەنی ئەو سنوورە، کە تێیدا چەندین هاوڵاتی شەهید و برینداربوون، کە چەند منداڵ و ژنێکیشیان تێدایە.

 

لەکاتی هاککردنی ڕۆژنیوزدا، هاککەرانی دەوڵەتی تورک جگە لە دانانی ئاڵاو لۆگۆ و سرودی فاشیزمی تورکیا، لەسەر ماڵەپەڕەکەیان نووسیبوو:"ئێوە ترسنۆکن و هەواڵی ترسنۆکەکانیش ڕووماڵ دەکەن، بە سادەیی پێتان دەڵێین ئەوەی کوردستانی لە خەیاڵدا هەبێت، جێگەی گۆڕستانە، لەمەبەدوا تامی پڵنگەکان بکەن".

 

ئەو پەیامەی دەوڵەتی تورک بۆ ڕۆژنیوز دوای ئەوە دێت، کە ڕۆژنیوز شکستەکانی ئەو سوپایەی بڵاوکردەوەو باسی لە پێشێلکارییەکانی مافی مرۆڤ کرد لەلایەن ئەو سوپایەوە لە سنووری کانتۆنی عەفرین.

 

پێش هاککردنەکە، دادگای دەوڵەتی تورک لە ئەنقەرە، سەرجەم پەڕەکانی ڕۆژنیوزی لە تۆرە کۆمەڵایەتییەکانی داخست، ئەوەش بەبیانووی ئەوەی کە بەڵگەی ڤیدیۆیی دوو ئەندامی میتی دەوڵەتی تورکی بڵاکردەوە، کە لەلایەن گەریلاکانەوە بە دیل گیرابوون و چەندین کاری سیخوڕی میتیان بۆ رای گشتی جیهان ئاشکراکرد.

 

لەماوەی دوو ساڵی ڕابردوودا، لەهەردوو وڵاتی تورکیا و ئێران، ماڵپەڕی ئاژانسی ڕۆژنیوز فلتەر کراوە، خوێنەرانی ماڵپەڕی ئاژانسەکەمان تەنها لەڕێگەی پڕۆگرامەکانی شکاندنی فلتەرەوە دەتوانن بڵاوکراوەکانی ئاژانسەکەمان ببینین.

 

دوای ئەو ئاستەنگییانە، لە ئێستادا ئاژانسی رۆژنیوز بە دروشمەکەی خۆی بەردوامە لە کارکردن و بڵاوکردنەوەی هەواڵ و راپۆرتەکانی، کە لە هەرشوێنێکدا پێشێلکارییەکانی مافی مرۆڤ بوونی هەبێت، وەک ئەرکێکی سەرشانی بۆ وەرگرانی خۆی دەگوازێتەوە، بە ئامانجابوونی دروستکردنی کۆمەڵگەیەکی دیموکرات و تاکێکی هۆشیار..

 

ڕۆژنیوز- ئاژانسێکی هەواڵییە، بە زارەوەکانی سۆرانی و کورمانجی، و زمانەکانی عەرەبی و تورکی هەواڵەکانی بە نووسین و ڤیدیۆ لە سەر ماڵپەرێک بڵاودەکاتەوە، هاوکات بەپێی گرێبەستێک، هەواڵ و راپۆرتە ڤیدیۆییەکانی لە ڕێگەی چەند کەناڵێکی ئاسمانی کوردییەوە بڵادەکرێتەوە.

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin