Smiley face
Smiley face
Smiley face

"ئەگەر تورکیا هێرش بکاتە سەر عەفرین کۆتایی بە خۆی دێنێت"

2018-01-20 11:48:17



ڕۆژنیوز – بەرهەم لەتیف


مامۆستایەکی زانکۆی سلێمانی لەسەر هێرشەکانی عەفرین دەڵێت: تورکیا دەیەوێت بەم هێرشانەی شۆڕشی ڕۆژئاوا لەناو ببات، بەڵام ئەگەر تورکیا ئەو هەڵە گەورەیە ئەنجام بدات ئەوا هێرشکردنە سەر عەفرین دەبێتە کۆتاییهاتنی خۆی.


دەوڵەتی تورکیا هەڕەشە و هێرشەکانی بۆ سەر عەفرین چڕکردوەتەوە و ڕۆژانە بەردەوامە لە تۆپبارانکردنی ئەو ناوچەیە، ئەوەش نیگەرانی گەلی کوردی لێکەوتووەتەوە.


شوان عەبدوڵا، مامۆستا لە زانکۆی سلێمانی، بە ڕۆژنیوزی وت:" هەر لە سەرەتاوە کە شۆڕشی ڕۆژئاوا دروست بووە تورکیا ویستوێتی لێیبدات و نەیهێڵێت، کە دەزانێت سەرچاوەی شۆڕشەکە کوێیە و چەندەها بیانووی بۆ دروستکردووە و بەربەستی خستوەتە بەردەم، بەڵام هیچ کاتێک سەرکەوتوو نەبووە، ئێستاش بەم ڕێگەیە دەیەوێت هێرش بکات، ترسی ئەوەی هەیە کە شۆڕشەکە فراوانتر ببێت، دەیەوێت بەم هێرشانە هەژموونی خۆی بسەپێنێت لە ناوچەکەدا".

 


وتیشی:" تورکیا ئەوەی کە لە باشور بۆی گونجاوە دەیەوێت لە باکوری سوریاش بۆی بگونجێت، کە باشوری پارچە پارچە کردووە و کردوێتی بە سەربازگە و مۆڵگەی خۆی، بەڵام خەیاڵی خاوە و بۆی ناچێتەسەر، چونکە ئەوەی لە باشور بۆی گونجا بەهۆی دەسەڵاتی حزبگەرایی و بنەماڵەگەرایی، بەڵام بەهیچ شێوەیەک لە باکوری سوریا ئەوەی بۆ ڕوونادات، چونکە نە کوردەکان و نە عەرەب و نە سریانیەکان هیچیان ئامادەی ئەوەیان تێدا نیە کە ببن بە دەستکەلای ئاکەپەی و ئەردۆغان".


باسی لەوەشکرد:"ئەگەر تورکیا ئەو هەڵە گەورەیە بکات و هێرش بکاتە سەر عەفرین کۆتایی بە خۆی دێنێت، باوەڕناکەم کە هێرش بکات، بەڵکو دەیەوێت چاوترسێنی کورد بکات لە ناوچەکەدا".


ئەو مامۆستایەی زانکۆ، ئەوەشی خستەڕوو: پێویستە پشتگیری یەکتری بکەین، یەکێتی نەتەوەیی ببەسترێت لەهەر چوارپارچەی کوردستان و ئەم پرسانە یەکلایی بکرێتەوە، چونکە ناکرێت هەموو ڕۆژێک ئەم هەڕەشەیەمان لەسەر بێت، ئێستا خاکی باشور نیوەی بووەتە مۆڵگەی سەربازی تورکیا، ئێمە دەبێت لە هەموو پارچەکانی کوردستان و لە ئەمریکا و ئەمریکای لاتین و لە ئەفریقا و لە هەر شوێنێک کە کورد یاخود ئازادیخوازێک هەبێت یەک دەنگ بین و پشتگیری دۆزی کورد بکەین.


ک.ک
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin