Smiley face
Smiley face
Smiley face

پەیەدە لە باشور: هێرش بۆ سەر عەفرین هێرشە بۆ هەموو کوردستان

2018-01-17 15:02:11



ڕۆژنیوز - دانا عومەر

 

هاوسەرۆکی نوێنەرایەتی پەیەدە لە باشوری کوردستان دەڵێت، کە هێرشی تورکیا بۆ سەر عەفرین بە واتای هێرش بۆ سەر هەر چوار پارچەی کوردستانە، بۆیە هەموو گەلی کورد هەموو پشتگیریی عەفرین دەکەن.

 

سلێمان عەرەب، هاوسەرۆکی نوێنەرایەتیی پارتی یەکێتی دیموکرات- پەیەدە لە باشوری کوردستان، لە بارەی هەڕەشەکانی ئەردۆغان بۆ سەر عەفرین بۆ ڕۆژنیوز دەدوێت.

 

سلێمان عەرەب، وتی: حکومەتی تورک داگیرکاریی خاکی سوریا و دوژمنایەتیی گەلی کورد و گەلانی سوریا دەکات و نایەوێت کێشە و ئاڵۆزییەکانی سوریا چارەسەرببن و پرۆژە دیموکراتییەکان لە سوریا سەربکەوێت، بۆیەشە هەڕەشەی هێرش دەکاتە سەر عەفرین، هێرش بۆ سەر عەفرین سەرەتا لە دژی گەلی کورد و پاشانیش دژی چارەسەریی دیموکراتی لە سوریایە.

 

وتیشی: لە چەند ساڵی ڕابردوودا هەموو هەوڵدانەکان و سیاسەتە نێودەوڵەتییەکانی تورکیا شکستیان هێناوە، ئەوە سیاسەتەکانی لە سوریاش دەگرێتەوە، نەیتوانی لە لە هیچ کامە لە گۆڕانکارییەکانی سوریادا ڕۆڵ بگێڕێت، هۆکارەکەشی ئەوەیە، کە تورکیا خۆی بە پێی بەرژەوەندییەکانی پشتگیریی هێزە توندڕەوەکانی کرد، ئێستاش دەیەوێت دەستکەوتەکانی گەلی کورد لە ڕۆژئاوای کوردستان و فیدراسیۆنی باکوری سوریا بۆ چارەسەرکردنی ئاڵۆزییەکانی سوریا بکاتە ئامانج.

 

لە بەردەوامیدا، وتی: تورکیا دەڵێت، کە شەڕ هێشتا کۆتایی نەهاتووە و بەنیازە دژی هێزەکانی سەر سنوورەکانی شەڕ بکات، بەڵام ئەو شەڕەی تورکیا شەڕێکە لە دژی گەلانی سوریا و گەلی کورد، بە تۆپبارانکردنی عەفرین ئەو پەیامە دەداتە ئێمە کە ناتوانێت ئارامی و ئاشتی لە عەفرین قبوڵ بکات و دەیەوێت خەڵکی عەفرین ئاوارە بکات.
 
سلێمان عەرەب وتیشی: باوەڕمان وایە کە هێزەکانی بەرگری لە عەفرین و گەلانی عەفرین دەتوانن ناوچەکە لە بەرامبەر هەموو هێرشێکدا بپارێزن، لەلایەکی دیکەوە ئەو هێرشە تەنیا بۆ سەر عەفرین نییە، بەڵکو دژی هەموو گەلی کورد لە هەر چوار پارچەی کوردستان و هەروەها لە دژی گەلانی سوریاشە.
 

هاوسەرۆکی نوێنەرایەتیی پەیەدە لە باشوری کوردستان بانگەوازیی گەلی کوردیشی کرد، کە لە بەرامبەر ئەو هێرشانەدا بوەستن و پشتیگریی گەلانی عەفرین بکەن.

 

ناوبراو ئەوەشی وت: ئەو هەڕەشە و هێرشانە نابنە ئاستەنگ لە بەردەم تێکۆشانی خەڵکی عەفرین بۆ پێشخستنی خۆبەڕێوبەریی دیموکراتی لە کانتۆنەکەدا و گەلانی عەفرین پێداگر و بەردەوامن لە هەوڵدانەکانیاندا.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin