Smiley face
Smiley face
Smiley face

گەرمیانییەکان بە ئومێدەوە باس لە یەکێتی نەتەوەیی دەکەن

2018-01-17 12:15:10



ڕۆژنیوز ـ هاوڕێ کرێکار

 

گەرمیانییەکان بە ئومێدەوە باس لە کۆنگرەی نەتەوەیی دەکەن و دەڵێن، ئەم دۆخەی ئێستای کوردستان بە گشتی و خۆپیشاندانی ڕۆژهەڵات و هەڕەشەکانی سەر عەفرین، ئەوەمان پێدەڵێت، کە لەهەمووکات زیاتر کورد پێویستی بە یەکێتی نەتەوەیی هەیە.

 

بڕیارە کۆبوونەوەی راوێژی نەتەوەیی باشوری کوردستان لە ڕۆژی ٢٧ و ٢٨-ی ئەم مانگە لە شاری سلێمانی بەڕێوەبچێت، بۆ ئەو مەبەستەش کەنەکە سەردانی حزب و لایەنە سیاسییەکانی باشوری کوردستان و چین و توێژە جیاوازەکان دەکات، هاوڵاتییانیش ئومێدیان بە یەکێتی کوردان هەیە، لەم بارەیەوە بەشێک لە چین و توێژەکانی گەرمیان بۆ ڕۆژنیوز دەدوێن.

 

کەریم محەمەد، فەرمانبەرێکى دانیشتووى شارەدێی ڕزگارییە، لەسەر یەکێتییەک بۆ کوردان، وتی:  لە ئێستادا یەکێتى نەتەوەی کورد پرسێکى گرنگى هەنوکەییە، پێویستە هەر زوو کۆنگرەى نەتەوەیی ببەسترێت و حزب و لایەنە سیاسییە باڵادەستەکانى هەر چوار پارچەى کوردستان پێکەوە لەسەر میکانیزمى یەکگرتنێکى سەرتاسەری گفتوگۆ بکەن.

 

 

کەریم محەمەد دۆخی ئێستای کوردستانی وەها پێناسەکرد کە پێویستییەکی زۆری بەیەکڕیزی هەیە و، وتی: دۆخى باشور و خۆپیشاندانى ڕۆژهەڵات و هێرش بۆ سەر عەفرین و گۆشەگیریی سەر سەرۆک ئۆجالان، کۆی هەموو ئەم ڕووداوانە ئەوەمان پێدەڵێن کە پێویستە پەلە بکرێت لە دروستکردنى یەکێتییەکى نەتەوەیی بەهێز، بۆ بەگژداچوونەوەى دووژمنانى گەلەکەمان.

 

خەڵات ساڵەح، ژنە چالاکێکى کۆمەڵی مەدەنییە لە گەڕمیان، و بەمشێوەیە لەسەر یەکێتی نەتەوەیی دەدوێت: داواکارم سەرجەم حیزب و لایەنە سیاسییەکان لە باشور و ڕۆژئاوا و ڕۆژهەڵات و باکور، هەموو ناکۆکیی و بەرژەوەندییە حیزبیەکانیان بەلاوە بنێن و پێکەوە دەست بخەنە ناو دەستی یەک و ببنە خاوەنی یەک هێز و یەک وتاری نیشیتیمانى، بۆ ئەوەى بەو وتارە دژ بە نەیارانى کورد بووەستنەوە .

 

 

خەڵات ئەوەشی وت: گرنگە هاونیشتیمانیانى کورد لە هەر چوار پارچەى کوردستان فشار بخەنە سەر حزبەکان، بۆ ئەوەى یەکێتییەکى نەتەوەی کوردان دروستبکەن، دڵنیام هەموو تاکێکى کورد حەز بەو یەکڕیزى و تەبایی و یەکێتیە دەکات.

 

هەروەها محەمەد مەجید، هاوڵاتیەکى دیکەی دانیشتوی شارەدێی ڕزگاریییەو دەڵێت: بە گرنگى دەزانم ئەمجارە پارتى و ئەو حزبانەى دیکەی باشوور، کە لە یەکەم کۆبوونەوەى ڕاوێژى نەتەوەیی بەشدار نەبوون لە دووەم بەشداربن، پارتی لەبەر تورکیا بەشدارنەبوو لە رابردوودا، ئومێدەکەین ئەم جارە بۆ یەک دەنگی کورد بەشداری بکات.

 

 

ناوبراو گرنگی کۆنگرەی نەتەوەیی لە ئێستادا بەپێویست زانی و وتی: دروستبوونى یەکێتى نەتەوەیی کورد لە ئێستادا پێویستى بەدەنگى هەموو حیزبە سیاسیەکان هەیە، بۆیە هەموویان بەشداربن لەم دۆخەدا بۆ یەکدەنگی کورد زۆر پێویستە.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin