Smiley face
Smiley face
Smiley face

حزبە کوردییەکان شاندێک ڕەوانەی خورماتوو دەکەن

2018-01-14 12:58:39



ڕۆژنیوز ـ هاوڕی کرێکار

 
بەشێک لە حزب و لایەنە سیاسیەکانى شارۆچکەى خورماتوو، لە شارەدێی ڕزگاری سەر بە کەلار کۆبوونەوە و بڕیاریاندا شاندێک ڕەوانەی خورماتوو بکەن.


کاتژمێر١٠ى  بەیانى ئەمڕۆ، لە بارەگاى کۆمیتەى ڕێکخستنى ڕزگاری حزبی شیوعى کوردستان لە ڕزگاری، پێنج حزبی کوردستانى نێو شارۆچکەى خورماتوو، کە پێکهاتبوون لە یەکێتى نیشتیمانى کوردستان و پارتى دیموکراتى کوردستان و یەکگرتوى ئیسلامى کوردستان وکۆمەڵی ئیسلامى کوردستان و حزبی شیوعى، سەبارەت بە پرسی گەڕانەوەی ئاوارەکان بۆ خورماتوو کۆبونەوە.


مەلا کەریم شکور، بەرپرسی مەڵبەندی حەمرینى یەکێتى نیشتیمانى کوردستان، دوای کۆبوونەوەکە لە کۆنگرەیەکى ڕۆژنامەوانیدا بە دەزگاکانى ڕاگەیاندنى وت: پێنج حزبی سیاسی شارۆچکەى خورماتوو، جگە لە بزوتنەوەى گۆڕان کۆبووینەوە، لەپێناو گەڕانەوەى دانیشتوانى شارۆچکەکە بۆ شوێنى خۆیان و یەکڕیزى هێزە سیاسیەکانى کوردستان و بەشدارییکردنمان بە یەک لیست لە هەڵبژاردنى  پەرلەمانى عێراق، کە بڕیارە مانگى ئایاری داهاتوو ئەنجام بدرێت.

 


مەلا کەریم وتیشی: لە بەشێکى کۆبونەوەکەدا شەلال عەبدول قائیمقامى لەسەر کار لابراوی خورماتوو و دوو ئەندامى ئەنجومەنى شارۆچکەى خورماتوو ئامادەبوون و گەیشتینە بڕیارێک، لەم ڕۆژانەدا ئەندامانى کوردی ئەنجومەنى شارۆچکەى خورماتوو و چەند بەڕێوەبەرێکى ئیداریى و نوێنەرانی لایەنەکان بە شاندێک سەردانى شارۆچکەى خورماتوو دەکەن و لەگەڵ قائیمقامى  شارۆچکەکە بە وەکالەت کۆدەبنەوە، تەوەری یەکەمى کۆبونەوەکەیان قسەکردن دەبێت لەسەر گەڕانەوەى ئاوارەکانى خورماتوو بۆ شوێنى خۆیان، بەمەرجێک هێزێکى نیشتیمانی  بێ جیاوازى گیانى هەمووان بپارێزێت. 


باسی لەوەشکرد، دواتر باس لەوەش دەکەن دواى گەڕانەوەى ئاوارەکان دەبێت بارەگا حزبیەکان بگەڕێنەوە شوێنى خۆیان لە خورماتوو. 


ئاماژەى بەوەشدا: لە کۆبونەوەکەدا قسەمان لەسەر ئەوە کردووە،  هێزە سیاسییە کوردییەکانى خورماتوو، بە یەک لیس بەشداری هەڵبژاردنەکانى ئەنجومەنى نوێنەرانى داهاتوى عێراق بکەن، کە بڕیارە لەمانگى ئایاری داهاتودا ئەنجام بدرێت، هەنگاوی باشمان بڕیوە، بڕیاریشە ئێوارەى ئەمڕۆ جارێکى تر لەسەر ئەو پرسە کۆببینەوە.


ک.ک
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin