Smiley face
Smiley face
Smiley face

دوو ژن  به‌هۆی سووتانه‌وه‌ گیانیان له‌ده‌ست داوە

2018-01-09 13:18:13



ڕۆژنیوز- زاهیر ئیبراهیم

 

له‌ شارۆچکه‌ی سۆران و چۆمانی سه‌ر به‌ پارێزگای هه‌ولێر، ته‌نیا له‌ ڕۆژانی کۆتایی ساڵی 2017 دوو ژن سووتاون که‌ به‌هۆی زۆریی سووتانه‌که‌یان گیانیان لەده‌ست داوە، بەڕێوبەرایەتی بەرەنگاربوونەوەی توندوتیژی دژ بە ئافرەتانی سۆرانیش لەکاتی خۆیدا حاڵەتەکانی نەخستوەتەڕوو.

 

وتەبێژی بەڕێوەبەرایەتی بەرەنگاربوونەوەی توندوتیژی دژ بە ئافرەتان لە سۆران، زانیاری لەبارەی دوو حاڵەتی سووتانی ژنان بڵاوکردەوە و ئاماری کۆتایی ساڵی 2017ی بەڕێوەبەرایەتییەکەیانی بۆ ڕۆژنیوز ئاشکرا کرد.

 

ملازم شێروان خالید، وته‌بێژی بەڕێوه‌به‌رایه‌تی بەرەنگاربوونەوەی توندوتیژی دژی ‌ ئافره‌تان لە سۆران به‌ ڕۆژنیوزی راگه‌یاند:"له‌ شارۆچکه‌ی چۆمانی سه‌ر به‌ پارێزگای هه‌ولێر له‌ ڕۆژی 25ی 12ی ساڵی 2017، ژنێکی خێزاندار به‌ ناوی (ش.ص.ن) ته‌مه‌ن 30 ساڵان به‌هۆی سووتانه‌وه‌ ڕه‌وانه‌ی نه‌خۆشخانه‌ی فریاکه‌وتنی سۆران کرا".

 

 

زیاتر وتیشی:"دوای ڕه‌وانەکردنی بۆ نه‌خۆشخانه‌ی هه‌ولێر، دوای چه‌ند ڕۆژێک له‌ مانه‌وه‌ی له‌ژێر چاودێری پزیشک، به‌هۆی زۆریی ڕێژه‌ی سووتانه‌که‌ی که‌ ٩٠% بوو،‌ گیانی له‌ده‌ست دا".

 

هەروەها وتیشی:"دوای گیان له‌ده‌ستدانه‌که‌شی په‌ڕاوی لێکۆڵینه‌وه‌ له‌سه‌ر ڕووداوه‌که‌ کراوه‌ته‌وهن‌  که‌ به‌پێی وته‌ی ژنه‌که‌ له‌ کاتی هه‌ڵکردنی زۆپا سووتاوە به‌هۆی ئه‌وه‌ی جله‌کانی نه‌وتی پێوە بووه‌، له‌ وته‌که‌شیدا له‌به‌رده‌م پۆلیس ئه‌و ژنه‌ سکاڵای له‌سه‌ر که‌س نه‌بووه‌".

 

سەبارەت بە حاڵەتێکی دیکەی سووتان کە هەبووە، شێروان خالید، ڕایگەیاند" له‌ ڕۆژی 31ی مانگی 12ی ساڵی 2017 له‌ سۆران، ژنێکی خێزاندار بە ناوی (ب.ل.ح)  له‌ کاتژمێر 12ی شه‌و به‌ هۆی سووتانه‌وه‌ گه‌یه‌نداریه‌ نه‌خۆشخانه‌ی فریاکه‌وتنی سۆران، به‌پێی وته‌ی که‌سوکارەکەی به‌هۆی نه‌وت له‌ ماڵه‌وه‌ سووتاوه‌، هەربه‌پێی وته‌ی که‌سوکاری ژنەکە، ڕووداوه‌که‌ قه‌زاو قه‌ده‌ر بووه‌، دوای لێکۆڵینه‌وه‌ی ئێمه‌ ژنه‌که‌ش سکاڵای له‌سه‌ر که‌س نه‌بووه‌".

 

وتیشی:"دوای ڕه‌وانه‌کردنی بۆ نه‌خۆشخانه‌ی شاری هه‌ولێر، به‌هۆی زۆری ڕێژه‌ی سووتانه‌که‌ی له‌ ڕۆژی 3/1/2018 له‌شاری هه‌ولێر گیانی له‌ده‌ست دا، تا ئێستاش لێکۆڵینه‌وه‌ له‌سه‌ر ته‌واوی حاله‌ته‌کان به‌رده‌وامه ".

 

له‌ ساڵی 2017  له‌ شارۆچکه‌ی سۆران به‌ پێی ئامارێکی به‌رێوه‌به‌رایه‌تی بەرەنگاربوونەوەی توندوتیژی دژی‌ ئافرەتان لە سۆران، 308 حاڵه‌تی توندوتیژی لە دژی ژنان تۆمار کراوە،‌ که‌ 34 حاڵه‌تیان سووتانی ژنان بووه‌، که‌ به‌هۆی زۆریی رێژه‌ی سووتانه‌کانیان 19 ژن گیانیان له‌ ده‌ست داوه‌.

 

جێگای باسە وتەبێژی بەرەنگاربوونەوەی توندوتیژی دژی ئافرەتان لە سۆران،  پێشتر رایگەیاندووە  کە لەکاتی ڕووداوەکانی توندوتیژی دژ بە ئافرەتان، ئەوان زانیارییەکان لە کاتی خۆیدا بڵاوناکەنەوە، تەنیا ئەگەر ڕاگەیاندنەکان داوابکەن زانیارییەکان دەخەنەڕوو، هەربۆیە ئەمەش دەبێتە هۆی ئەوەی کە زانیارییەکان لە کاتی ڕوودانی حاڵەتەکانی توندوتیژیدا بڵاو نەکرێنەوە لە کەناڵەکانی ڕاگەیاندنەکانەوە.

 

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin