Smiley face
Smiley face
Smiley face

شێوەكارێك نەهامەتییەكانی ڕۆژئاوا و باشور ئاوێتە دەکات

2018-01-09 10:57:03



ڕۆژنیوز - ئاشتی ئەحمەد

 

شێوەكارێك لەڕێگەی فڵچە و ڕەنگەکانییەوە نەهامەتییەكانی گەلی كورد لە ڕۆژئاوا و باشور ئاوێتە دەکات.

 

سامی سەعدوڵا عەلی، ئەو هونەرمەندە شێوەکارەیە کە لەساڵی 1971 لەگوندی شیرناوی پارێزگای كەركوك لەدایكبووە، لەدوای ڕاگواستنەکەی ساڵی 1975 بەدواوە بەهۆی ڕاگواستنەکەی بەعس لەو ساڵەوە لەشارۆچكەی چەمچەماڵ نیشتەجێ بووە.

 

 

سامی، ئەندامی كۆمەڵەی هونەرەجوانەكانی چەمچەماڵە و لەسەرەتای نەوەتەكانەوە دەستی بەكاری شێوەكاری و هونەری كردووە، ئێستاش لە چەمچەماڵ سەرپەرشتی بەشی شێوەكاریی هونەرەجوانەكان دەكات، كە یەكێكە لەبەشە زیندووەكانی هونەرەجوانەكان.

 

لەبارەی ئەوەی چ شتێك بۆ سامی ناخۆش و سەخت بووە و کاریگەریی لەسەر دەروونی هەبووە؟ سامی پاش هەڵكێشانی هەناسەیەكی قووڵ بۆ ڕۆژنیوز وتی:"ئەوەی تا ئێستا بۆ من جێگەی ناخۆشیی بووە، ویستومە لە ساڵیادی ئازادكردنی كۆبانێ‌، لە ڕۆژئاوای كوردستان پێشەنگا بكەمەوە، بەڵام بەهۆکاری سیاسییەوە ڕێگریم لێكراوە، ئەگەر ئەو ڕێگرییە نەبوایە، یەكەم كەس دەبووم لە ڕۆژئاوا وەك كوردێكی باشور پیشەنگا بیكەمەوە، تا ئێستاش تابلۆكانم هەڵگرتووە، بەهیوام لەداهاتوودا لەساڵیادی كۆبانێ‌ ئەو پێشەنگایە بكەمەوە".

 

 

سامی لەو بارەیەوە زیاتر ئاشکرای کرد کە زۆر هەوڵی لەگەڵ دراوە تا پێشەنگاكە لە باشور بكاتەوە، بەڵام ئەوە ماوەی یەك ساڵ ئامادەكاریی كردووە بۆ ئەوەی ئەو پێشەنگایە لە ڕۆژئاوا بكاتەوە، بۆیە تا ئێستاش بەو هیوایەیە ئەو ئاواتەی بێتە دی و خزمەت بەشاری خۆڕاگری كۆبانێ‌ بكات.

 

 

وتیشی:"ئەو تابلۆیانەی كە ویستومە لەكۆبانێ‌ نمایشی بكەم لەساڵیادی ڕزگاركردنی ئەو شارە قارەمانە، لەڕێگەی 20 تابلۆی قەبارە گەورەوە گوزارشتی لە كارەساتەكانی ئەنفال و شەنگال و خۆڕاگری و بەرخودانی كۆبانێ‌ دەكرد، بۆیە تابلۆكانم باسی نەهامەتییەكانی گەلی كوردی تێدا بەرجەستە بووە، نەك ڕەخنەم لە گروپێك یاخود لایەنێك گرتبێت".

 

 

ئەو شێوەكارە ئەوەش دەخاتەڕوو، كە لە ناوەڕاستی نەوەتەكانەوە ئەو تابلۆیانەی لەڕێگەی فڵچە و ڕەنگەەوە كێشاویەتی، گوزارشتی لەو مەرگەسات و جینۆسایدانە کردووە کە بەسەر گەلی كورددا هاتوون.

 

سەبارەت بە مەتەریالی تابلۆکانیش سامی ئاماژەی بەوە کرد کە ئەو كەرەستانەی کە لە تابلۆكاندا بەكاریهێناون، بۆیەی زەیتی و هەندێك كەرەستەی جۆراوجۆر بووە.

 

 

سەبارەت بە کەمیی بایەخدان بە هونەری شێوەکاریی، ئەو شێوەکارە گەڕاندییەوە بۆ كۆمەڵگە، چونکە زۆر گرنگە کە تێڕوانیی کۆمەڵگە بەرامبەر هونەر بەتایبەت هونەری شێوەكاری بزانرێت، وتیشی: دیارە لەكۆمەڵگەی خۆماندا گرنگی بەو كارە نادرێت، هەروەها هونەرمەند و شێوەكار دەكەوێتە سەر ئاست و توانای خۆی کە تاچەند بەدەم كارەكانیان و بایەخی كارەكەیەوە بچن.

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin