Smiley face
Smiley face
Smiley face

پۆلیسی گەرمیان ئاماری سەرپێچیکارانی ژینگەی بڵاوکردەوە

2018-01-08 13:23:46



ڕۆژنیوز ـ هاوڕێ کرێکار 


پۆلیسی داراستان و ژینگەى گەرمیان ڕایگەیاند، لە ماوەى یەک ساڵدا لە سنوری ئیدارەى گەرمیان ٢٢٣ سەرپێچیکار سزادراون و ٤٣ باڵندەش ئازاد کراون و بەشێکى زۆری ئامارەکانیش زیادیان کردوە. 


کاتژمێر ١٠:٣٠ خولەکى بەیانى ئەمڕۆ، لە کۆنگرەیەکى ڕۆژنامەنووسیدا، لە بیناى بەڕێوەبەرایەتى پۆلیسی دارستان و ژینگەى گەرمیان، ئاماری ساڵانەى سەرپێچیکارانی ژینگە ڕاگەیەندرا. 


سەرکەوت ڕەحیم بەڕێوەبەری ڕاگەیاندنى بەڕێوەبەرایەتى پۆلیسی داراستان و ژینگەى گەرمیان، بە دەزگاکانى ڕاگەیاندنى ڕاگەیاند: لە ماوەى ساڵی ٢٠١٧ دا، لە سنوری ئیدارەى گەرمیان ٢٢٣ سەرپێچیکار  سزادراون بە بڕی پێنج ملیۆن و ٦٢٧ هەزار دینار، بەراورد بە ساڵی ڕابردووش ٣٤ سەرپێچیکار زیادی کردووە.

 


سەرکەوت ڕەحیم، وتیشی: لە لایەن بنەکەکانى بەڕێوەبەرایەتیمانەوە، ٩٢ پارچە چەکى سەرپێچیکاران دەستى بەسەردا گیراوە و بەراورد بە ساڵی ڕابردوو حەوت پارچە چەک زیادی کردووە، هەروەها ئەمساڵ ٤٣ باڵندە ئازادکراوە و بەراورد بە ساڵی ڕابردوو نۆ باڵندە کەمى کردووە، هەر لەم ساڵدا حەوت ئۆتۆمبیل و ماتۆڕسکیلی سەرپێچیکاران دەستى بەسەردا گیراوە و بەراورد بە ساڵی ڕابردوو یەک هۆی گواستنەوە زیادی کردووە. 


ناوبراو باسی لەوەشکرد: ئەمساڵ دەست بە سەر٨٠ کەرەستەى ڕاوچیدا گیراوە و بەراورد بە ساڵی ڕابردوو، ٥٦ کەرەستە زیادی کردووە، هەر لەم ساڵدا ٣٨٩ دۆنم زەوى لە پوش و پاوان سوتاوە.  


سەرکەوت ڕەحیم، ئاماژەى بەوەشدا: بەشێکى زۆری ئامارەکانى ئەمساڵ زیادیان کردووە، هەروەها سەرپێچیکار، ڕاوچی و داربڕ دەگرێتەوە و سەرپێچیکارانیش بەپێی ڕێنماییەکانى وەزارەتى ناوخۆ لە لایەن دادگا و بەڕێوەبەری یەکە ئیدارییەکانى وەک قائیمقام و بەڕێوەبەری ناحیە سزادەدرێن. 


ک.ک
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin