Smiley face
Smiley face
Smiley face

دوو هەزار چەکداری ئەفغان لە ژێر چاودێریی ئێراندا لە سوریا کوژراون

2018-01-07 09:06:41



ڕۆژنیوز - ناوەندی هەواڵەکان

 

فەیلەقی فاتمیونی سەربە سوپای پاسدارانی ئێران، کوژرانی دوو هەزار چەکداری ئەفغان و برینداربوونی زیاتر لە هەشت هەزار چەکداری ئەفغانی ڕاگەیاند، کە لە ژێر چاودێری سوپای پاسداراندا لە سوریا شەڕیان کردووە.

 

بە گوێرەی هەواڵێکی بەسیج نیوزی سەربە حکومەتی ئێران، زەهیر موجاهد،  بەرپرسیی کلتوری فەیلەقی فاتمیون ڕایگەیاندووە، کە هێزە ئەفغانەکان لە ژێر چاودێریی سوپای پاسداراندا لە سوریا "فیداکاری"ی زۆریان کردووە، لەگەڵ ئەوەشدا ئەوەندەی پێویست گرنگییان نەدراوەتێ.

 

لە بەرامبەر بڵاوبوونەوەی ئەو هەواڵەدا، شا حسێن مورتەزەوی، وتەبێژی سەرۆک کۆماریی ئەفغانستان هەڵوێستی پیشانداوەو ڕەخنەی گرتووە لە بەکارهێنانی هاوڵاتیانی ئەفغان لە شەڕە بەوەکالەتەکانی ئێڕان لەلایەن سوپای پاسدارانەوە.

 

زەهیر موجاهد لەگەڵ ئاشکراکردنی کوژرانی دوو هەزار چەکداری ئەفغان و برینداربوونی هەشت هەزاری دیکە لە شەڕەکانی سوپای پاسداران لە سوریادا، ئاماژەی بەوەدا، کە جیاکاریی ئەنجام دەدرێت لە نێوان بریندارە ئێرانییەکان و بریندارە ئەفغانەکان لەلایەن حکومەتی ئێڕانەوە.

 

ئەو بەرپرسەی فەیلەقی فاتمیون وتووشیەتی، کە هاوڵاتیانی ئەفغان لەکاتێکدا لە شەڕە بەوەکالەتەکانی سوپای پاسداراندا لە سوریا دەکوژرێن، کە هاوڵاتیانی ئەفغان ڕەخنەیان لێدەگرن و دەڵێن، بۆچی بۆ سوپای پاسداران و حکومەتی ئەسەد شەڕ دەکەن، لە کاتێکدا دۆخی وڵاتەکەی خۆمان تا ئەم ڕادیە ئاڵۆزە.

 

شا حسێن مورتەزەوی، وتەبێژیی سەرۆک کۆماری ئەفغانستانیش لە بەرامبەر ڕاگەیاندنی ئەو ئامارەدا وتوویەتی: حکومەتی ئێران نابێت دۆخی نالەباری کۆچبەرە ئەفغانەکان لە ئێراندا وەک هەل بقۆزێتەوەو بەکاریان بێنێت لە شەڕە بە وەکالەتەکانی لە وڵاتانی دراوسێدا.

 

جێگای ئاماژەیە، کە فەیلەقی فاتمیونی سوپای پاسداران لە ساڵی ٢٠١٥دا دامەزرا و پێکدێت لە چەکدارانی ئەفغان، کە زۆربەیان ئەو کۆچبەرە ئەفغانانەن کە لە خاکی ئێڕاندا ئاوارەبوون و هەموو جۆرە پێشێلکارییەک بەرامبەریان ئەنجام دەدرێت.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin