Smiley face
Smiley face
Smiley face

عەلی حەمەساڵح: کۆمەڵێک کۆمپانیای حزبیی پارە لە خەڵک وەردەگرن

2017-12-17 15:06:38



ڕۆژنیوز - قەرەچوغ ئەنوەر

 

عەلی حەمەساڵح، ڕایدەگەیەنێت، کە کۆمەڵێک کۆمپانیای حزبیی لە خاڵە سنوورییەکان دانراون بەناوی جیاواز پارەیەکی زۆر لە هاوڵاتیان وەردەگرن.

 

ئەمڕۆ، عەلی حەمەساڵح، ئەندامی پەرلەمانی هەرێمی کوردستان لە فراکسیۆنی گۆڕان لە بینای پەرلەمان کۆنگرەیەکی ڕۆژنامەنووسیی ئەنجامدا.

 

عەلی حەمەساڵح، ڕایگەیاند: کۆمەڵێک کۆمپانیای حزبیی لە خاڵە سنوورییەکان دانراون بەناوی جیاواز پارەیەکی زۆر لەخەڵکی هەرێمی کوردستان وەردەگرن، کە ئەمە گەندەڵییەکی ڕێکخراوە و لەلایەن سەرۆکایەتی حکومەتی هەرێمەوە کراوە.

 

ناوبراو، ڕوونییکردەوە: ژمارەیەک کۆمپانیا بەبێ ئەوەی گرێبەستیان هەبێت و هیچ ئەرکێک بکەن، بڕی سێ هەزار دینار بۆ ١٠٠ هەزار دینار لەبەرامبەر پشکنینی سوتەمەنی و مەنەفێست و دڵنیایی لە خەڵک وەردەگرن.

 

عەلی حەمەساڵح، وتیشی: کۆمپانیایەک بەناوی ڕەزگەوە پشکنین بۆ کاز و سوتەمەنی و بەنزین دەکات، کە بۆ هەر تانکەرێک بەنزین و گاز بڕی ١٠٠ ھەزار دینار وەردەگرێت، بۆ هەر تانکەرێک نەوت ٦٠ ھەزار دینار وەردەگرێت، لەکاتێکدا پێشوتر حکومەت خۆی ئەو کارەی دەکرد و بۆ ھەرتەنکەرێک ٢٨ ھەزار دینار وەردەگیرا، ئەمەش دەبێتە ھۆی گرانی لەسەر خەڵک و پارەکەش بۆ حکومەت نیە کۆمپانیاکەش گرێبەستی نییە و کارەکە بە کارمەندی حکومەت دەکات.

 

ئەو پەرلەمانتارە، ناوی چەندین کۆمپانیای تری ئاشکراکرد، کە لە سێ هەزار دینارەوە بۆ ٥٠ دۆلار پارە لە هاوڵاتیان وەردەگرن و هەر یەکە و لە بەرامبەر شتێکدا، بە وتەی ئەو هیچ سودێکی بۆ هاوڵاتیان نییە.

 

سەبارەت بە چوونی شاندی پەرلەمان بۆ بەغدا، عەلی حەمەساڵح، ڕایگەیاند: بەھیچ شێوەیەک گۆڕان ئامادەنییە لەگەڵ شاندی پەرلەمانی بچێتە بەغدا، چونکە ئەوە ئەرکی حکومەتە و لیژنەکانی پەرلەمانی ھەولێر و بەغدا ھیچ کارێکیان پێ ناکرێت.

 

لەبارەی مووچەشەوە، ڕایگەیاند: فشار لەسەر حکومەت ھەیە بۆ ئەوەی قەرزی کۆمپانیاکان بداتەوە، بۆیە ئەوەی چاوەڕوان دەکرێت لە ٢٠١٨ موچە بەرەو کەم بوونەوە و نەمان دەڕوات و حکومەتیش توشی قەرزێکی زۆر بوە بەسودی زۆر.

 

 وتیشی: کۆمپانیای روس نەفت بڕی ١ ملیادر و ٥٠٠ ملیۆن دۆلار-ی داوەتە حکومەت و چاوەروان دەکرێت داوای وەرگرتنەوەی بکات، چونکە لەسنووری کەرکوک بەرھەم ھێنانی نەوت نەماوە.

 

ئەو پەرلەمانتارەی گۆڕان، بۆ چارەسەری ئەم دۆخە "ھەڵوەشانەوەی حکومەتی ئێستا و پێکھێنانی حکومەتی ڕزگاریی نیشتیمانی بەپێویست دەزانێت، یاخود ئەوپارانەی بردراونەتە دەرەوە بھێندرێنەوە ھەرێمی کوردستان".

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin