Smiley face
Smiley face
Smiley face

ژنان: قبوڵ ناکەین یاسای لێبوردنی گشتیی بکوژانی ژنان بگرێتەوە

2017-12-17 10:17:03



ڕۆژنیوز - قەرەچوغ ئەنوەر

 

بەشیک لە ژنانی هەرێمی کوردستان ڕازیی نابن، کە بەھیچ شێوەیەک ماددە و بڕگەکانی پڕۆژە یاسای لێبوردنی گشتیی، بکوژی ژنان و منداڵان بگرێتەوە و دەڵێن: تەنانەت قبوڵ ناکەین سزاکەشیان سوک بکرێت.

 

بڕیارە ئەمڕۆ کاتژمێر ١١ی پێش نیوەڕۆی ئەمڕۆ  پەرلەمانی هەرێمی کوردستان کۆببێتەوە و گفتوگۆ لەبارەی پڕۆژە یاسای لێبوردنی گشتی بکات، کە پێشتر هەرسێ لیژنەی یاسایی و مافی مرۆڤ و ناوخۆ لە پەرلەمان، ئامادەیان کردووە.

 

لاڤان فەریق، پارێزەرێکی شاری هەولێرە و لە ڕێگای ڕۆژنیوزەوە داوای لە ئەندامانی پەرلەمان کرد، کە بەھەموو توانایەک ھەوڵبدەن ھیچ بڕگە و ماددەیەکی یاسای لێبوردنی گشتی بکوژانی ژنان نەگرێتەوە، چونکە وەک ئەو وتی:"جگە لەوەی تاوانکردنە بەرامبەر بەژنان، سوککردنی سزای بکوژان وادەکات کوشتنی ژنان بەچەندان جار دووبارە ببێتەوە".

 

لاڤان فەریق

 

ئەو پارێزەرە ڕەخنەی لە دەسەڵاتی دادوەریی گرت و وتی:"چەندین کەیس ھەیە لە دادگاکان، کە تاوانبار ھەیە بەکوشتنی ژن و دەستدرێژیکردنە سەر منداڵان سزایەکی چەند مانگی دەدرێت و پاشان ئازاد دەکرێت".

 

هەروەها، تاڤگە عومەر بەڕێوەبەری گشتیی فەرمانگەی یاسای دەستەی سەربەخۆی مافەکانی مرۆڤ لەھەرێمی کوردستان بە ڕۆژنیوزی وت: ئێمە نامانەوێت یاسای لێبوردنی گشتی تاوانبارانی بازرگانیکردن بەماددەی ھۆشبەر و بکوژانی ژنان و گەندەڵکاران بگرێتەوە، چونکە بەرژەوەندیی گشتی دەخاتە ژێر مەترسییەوە.

 

تاڤگە عومەر

 

لە بەرامبەردا، ئێڤار ئیبراھیم، سەرۆکی لیژنەی داکۆکییکردن لە مافی ئافرەتان لە پەرلەمانی هەرێمی کوردستان بە ڕۆژنیوزی ڕاگەیاند: ئێمە نەک ئەو بڕگە و مادانە ڕەتدەکەینەوە، کە باس لە لێبوردنی بکوژانی ژن بکەن، تەنانەت قبوڵی ناکەین سزاکەشیان سوک بێت.

 

ئێڤار ئیبراھیم

 

ئێڤار، وتیشی: زۆرینەی ئەندامانی پەرلەمان لە فراکسیۆنە جیاوازەکان بەڵێنیان پێداوین، کە بۆ ئەو مەبەستە پشتیوانی لیژنەکەمان و راوبۆچوونمان بن.

 

هەر لەوبارەیەوە، ئەمەل جەلال، ئەندامی ئەنجومەنی باڵای کاروباری خانمان بە ڕۆژنیوزی وت: پێویستە یاساکە بە جۆرێک قورس بکرێت، کە ھەموو کەسێک نەگرێتەوە، ئێمەش وەک ئەنجومەنی باڵای کاروباری خانمان بەھیچ شێوەیەک لەگەڵ ئەوە نین بکوژانی ژنان و منداڵان سزاکەیان سوک بێت.

 

ئەمەل جەلال

 

بەگوێرەی پرۆژە یاساکە، لێبوردنەکە تاوانبارانى ئەم کەیسانە ناگرێتەوە: تیرۆر، ئەو تاوانانەی بە ئاسایشی ناوخۆ و دەرەوە گرێدراون، بازرگانیکرد بە ماددەی هۆشبەر، بازرگانیکردن بە خۆراک و دەرمانی بەسەرچوو، گەندەڵیی، زینا، بە قاچاخ بردنی شوێنەوار، ڕفاندن، حوکمدراوانی گەڕاوەکان لەسەر تاوانی بە مەبەست، دەستدرێژیی سێکسی، ئەشکەنجەدانی منداڵان، بازگانیکردن بە مرۆڤەوە و لەگەڵ تاوانى کوشتن، بەڵام ئەو کەسانە دەگرێتەوە، کە لە دەرەوەی دادگا سوڵح-یان کردووە.

 

ش.ف

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin