Smiley face
Smiley face
Smiley face

ئایا پارتی ئاگاداری هەوڵە داگیرکارییەکانی تورکیایە؟

2017-12-15 10:00:37



ڕۆژنیوز - بادینان


بە پێی زانیارییەکان شەوی ڕابردوو سوپای تورک هاتووەتە ناو خاکی باشوری کوردستان و ئۆپەراسیۆنی بۆ داگیرکردنی ئەو ناوچانەی باشور دەستپێکردووە، کە لەژێر کۆنتڕۆڵی پارتی دان، پرسیار ئەوەیە، کە ئایا پارتی ئاگاداری پیلانە داگیرکەرانەکانی تورکیایە؟


شەوی ڕابردوو کاتژمێر ١٠:٠٠، سوپای تورک لە لای شەمزینانی سەربە جولەمێرگی باکوری کوردستانەوە، لە دۆڵی ڕەش، ئاوی حاجی بەگ و چیای سرۆوە جموجووڵی سەربازیی دەستپێکردووە  بەرەو باشوری کوردستان.


سەرچاوە خۆجێییەکان ڕایانگەیاند، کە شەوی ڕابردوو کاتژمێر ١٠:٠٠ سوپای تورک لە بارەگای سەربازیی گوندی ماڤانی سەربە شەمزینانەوە سنوورەکانی باشوری کوردستانیان تێپەڕکردووە و کەوتوونەتە هەوڵدان بۆ داگیرکردنی ناوچەی عادلبەگی باشوری کوردستان.


ئەو سەرچاوانە ڕاشیانگەیاندووە: سوپای تورک بۆ تێپەڕکردنی سنوور، سەربازەکانی بە هەلیکۆپتەر لە ناوچەکانی کانی ڕەش، چیای سرۆ و گوندی بەرمیزە-ی سەربە ناوچەی دیانای هەولێر دابەزاندووە، ئاماژە بەوەش دراوە، کە ئەو هێزە تورکانە بەنیازن پاش جێگربوون لە گوندی بەرمیزە بەرەو چیای سرۆ بەڕێبکەون و پیلانە داگیرکەرانەکانیان دەستپێبکەن.


هاوکات فڕۆکە جەنگییەکانی سوپای تورک چیای ئاڤدل کۆفی، چیای سرۆ و دۆڵی ڕەشی سەربە خواکورکیان بۆردومان کردووە، هەلیکۆپتەرە کوبراکانیش دەشتی حەیاتیان بۆردومان کردووە، سەرچاوە خۆجێییەکان ڕایانگەیاندووە، کە شەوی ڕابردوو هەموو ئەو ناوچانە بە سەختی بۆردومان کراون، بەڵام شەر ڕووینەداوە.


دوێنێ گوندی بەرمیزە لەلایەن فڕۆکە جەنگییەکانی سوپای تورکەوە بۆردومان کرابوو، لە ئەنجامی ئەو بۆردومانەدا ئۆتۆمبێلێکی هاوڵاتییانی ئەو گوندە کرابووە ئامانج و هاوڵاتییەکی خەڵی ئەو گوندەش گیانی لە دەستدا.


بەرمیزە لەژێر کۆنتڕۆڵی هێزەکانی پارتیدایە و دەوترێت سوپای تورک بەبێ ئاگاداریی پارتی ناتوانێت بچێتە ئەو ناوچانەوە.


هاوڵاتییەکی خەڵکی گوندی بەرمیزە لەو بارەیەوە قسەی بۆ ئاژانسی هەواڵی فورات کردووە و ڕایگەیاندووە: سوپای تورک بە مەبەستی داگیرکاری هاتووەتە ئەو ناوچانەوە، گوندەکەمان لەلایەن پارتییەوە بەڕێوەدەبرێت، ئەوەی لە گوندەکەمان ڕوویدا ناتوانێت بەبێ ئاگاداری پارتی بووبێت، سوپای تورک هێزەکانی بە هەلیکۆپتەر لە ناوچەکەدا داناوە، لەو لاشەوە ئەو ناوچانە لەلایەن فڕۆکە جەنگییەکانی سوپای تورکەوە بۆردومان کراون، ئەوانە ناکرێت بەبێ ئاگاداری پارتی ڕووبدەن، ئەگەر پارتی ئاگادار نەبووە، پێویستە ناڕەزایی نیشان بدات.


ک.ک
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin