Smiley face
Smiley face
Smiley face

بایدەمیر لەناو پەرلەمانی تورکیا-دا دەستی خستەسەر دڵی و وتی 'کوردستان لێرەیە'

2017-12-13 17:22:27



ڕۆژنیوز – ناوەندی هەواڵەکان

 

لە وەڵامی پەرلەمانتارانی ئاکەپە کە پرسییان کرد کوردستان لەکوێیە، عوسمان بایدەمیر، پەرلەمانتاری هەدەپە لە پەرلەمانی تورکیا، دەستی خستەسەر دڵ-ی و وتی "کوردستان ئەمە و لێرەیە"، بەو هۆیەشەوە عوسمان بایدەمیر بە بەشداریی پێنەکردن لە دوو دانیشتنی داهاتووی پەلەمانی تورکیا سزادرا.

 

لەكاتی بەرێوەچونی دانیشتنی ئەمرۆی پەرلەمانی توركیا، عوسمان بایدەرمیر، پەرلەمانتاری شاری ڕوحا-ی پارتی دیموکراتی گەلان-هەدەپە لە پەرلەمانی تورکیا، لەمیانی پێشكەشكردنی وتارێک لەناو هۆڵی پەرلەمان، ناوی کوردستان-ی هێنا، بەوهۆیەشەوە ڕووبەڕووی ڕەخنەی توندی پەرلەمانتارانی ئاکەپە بووەوە.

 

بایدەمیر لە وتارەکەیدا، وتی:"ئەو گەلەی کە ئێوەی هەڵبژاردووە چەنێک ڕێزدارە، ئەو گەلەیشی کە کوردی هەڵبژاردووە ئەوەندە ڕێزدارە، تەنها شتێک هەیە کە پێوستە ئەنجام بدرێت، ئەویش ئەوەیە، کە دەبێت کۆتایی بە لەنابردنی کەلتووری بهێنرێت".

 

هەروەها، وتیشی:"لەم وڵاتەدا نەک تەنها کودەتایەک، بەڵکو چەندین کودەتا ئەنجامدراوە، هەوڵی کودەتاکەی ١٥ی  ٧ یەکێک بوو لەوانە، بەڵام ئەوەی کە هەوڵی ئەنجامدانی کودەتای وەک فریادڕەسێک بینی و بەڕاستیش کودەتای لەم وڵاتە ئەنجامدا، ئەم حکومەتە خۆی بوو، یەکێکیش لەو کودەتایانە، کودەتای ٤ ی ١١ ی ٢٠١٦ بوو".

 

لە بەشێکی دیکەی قسەکانیدا، عوسمان بایدەمیر وتی:"من ڕۆڵەیەکی کوردم و نوێنەرێکی کوردستانم، با ئەم شوێنە ببێتە شوێنی هاوبەشی کورد و تورک، ئەگەر ئێوە کورد دوورەپەرێز بگرن یان بیانخەنە زیندان، لە کۆتاییدا ئێوە ٨٠ ملیۆن کەس بەتەواوی لەدەست دەدەن، وەرن با پێکەوە دەسەڵاتێکی سیاسی دروستبکەین کە کەس لەبیرنەکەین".

 

بەهۆی ئەوەی عوسمان بایدەمیر لەناو وتەکانیدا وشەی 'کوردستان'ی بەکارهێنا، سەرۆکی پەرلەمانی تورکیا، سەرۆکی فراکسیۆنی ئاکەپە و پەرلەمانتارانی ئاکەپە نیگەران بوون و لە بایدەمیر-یان پرسی: کوردستان لەکوێیە؟، بایدەمیر-یش دەستی خستەسەر دڵی و وتی:"ئەمەیە، کوردستان لێرەیە"، بەهۆی ئەم هەڵوێستەیشییەوە، سەرۆکی پەرلەمانی تورکیا، عوسمان بایدەمیر-ی بە بەشداریپێنەکردن لە دوو دانیشتنی داهاتووی پەرلەمانی تورکیا سزادا.

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin