Smiley face
Smiley face
Smiley face

نەخۆشەکانی دەربەندیخان چاویان لە شارەزوورە بۆ نەشتەگەریی

2017-12-12 08:09:50



ڕۆژنیوز- هاوكار مستەفا

 

بەهۆی داخستنی زۆربەی نەخۆشخانە و مەڵبەندە تەندروستییەكانی شارۆچكەی دەربەندیخان دوای بومەلەرزەكەی مانگی ڕابردوو، نەخۆشەکانی دەربەندیخان چاویان لە شارەزوورە بۆ نەشتەرگەریی، بەرپرسانی كەرتی تەندروستی شارەزووریش گرفتی كەمیی بینایان هەیە.

ئێستاکە بەهۆی داخستنی نەخۆشخانە گشتییەكەی دەربەندیخان، هیچ جۆرە نەشتەرگەرییەك لە شارۆچكەی دەربەندیخان بۆ نەخۆشەکانی ئەو سنورە ئەنجام نادرێت، هاوكات وەك كارئاسانییەك بۆ هاوڵاتیان، وابڕیارە كە بەشی نەشتەرگەریی لە شارەزوور ڕۆژێك تەرخان بكات بۆ هاوڵاتیانی دەربەندیخان.

 


د.ڕەنج سەلاحەدین، بەڕێوەبەری نەخۆشخانەی گشتیی شەهید ڕەوف بەگ لە شارۆچكەی شارەزوور، بە ڕۆژنیوزی ڕاگەیاند: لە ئەنجامی ئەو بوومەلەرزەیەی كە مانگی ڕابردوو سنورەكەی گرتەوە، بینای نەخۆشخانەكەمان یەكێك بوو لەو بینایانەی كە زۆرترین زیانی بەركەوتووە و تا ئێستاش نۆژەن نەكراوەتەوە، بەجۆرێك نهۆمی دووەمی نەخۆشخانەكەمان بەتەواوەتی داخستووە كە هەردوو قاوشی پیاوان و ژنانی تێدا بوو.
 


ئاماژەی بەوەش كرد، لەلایەن بەرپرسانی كەرتی تەندروستی دەربەندیخان و سلێمانییەوە داوامان لێكراوە كە وەك هاوكاریكردنی هاوڵاتیانی دەربەندیخان لە بەشی نەشتەرگەری نەخۆشخانەكەماندا جێگایەكی تایبەت بۆ نەشتەرگەری هاوڵاتیانی دەربەندیخان بكەینەوە بە ستاف و پزیشكی خۆیانەوە، بەڵام ئێمە سەرەڕای ئەوەی خوازیاری هاوكاریكردنی هاوڵاتیانی دەربەندیخانین تەنها دەتوانین لەهەفتەیەكدا یەك ڕۆژ تەرخان بكەین بۆ نەشتەرگەری هاوڵاتیانی دەربەندیخان.

لای خۆیەوە كەمال ئەحمەد، بەرپرسی بەشی ڕاگەیاندن لە نەخۆشخانەی گشتی شەهید ڕەوف بەگ لە شارۆچكەی شارەزوور بە ڕۆژنیوزی وت: بەهۆی ئەوەی ئێستا ژمارەیەك لە بەشی ناو نەخۆشخانەكەمان كاركردن تیایاندا ڕاگیراوە بەهۆی تێكچون و ڕووخانی دیوارەكانەوە، ناتوانین وەك پێویست كاروبارەكان بەڕێوە ببەین، ئەوە سەرەڕای ئەوەی هیچ جۆرە قەربووكردنەوە و هاوكارییەك نەكراوین، لە كاتێكدا هاوڵاتیانی سنورێكی بەرفراوان سەردانی ئەم نەخۆشخانە گشتییە دەكەن.

 


ئەوەشی خستەڕوو، بەدڵنیاییەوە گواستنەوەی بەشی نەشتەرگەری نەخۆشخانەی دەربەندیخان بۆ نەخۆشخانەكەی ئێمە گرفتی گەورە و فشاری زیاترمان لەسەر دروست دەكات، چونكە ئەوەی بە ئێمە وتراوە تەنها پزیشكی پسپۆڕی نەشتەرگەری ژنان دێت بۆ ئەنجامدانی نەشتەرگەری بە بێ‌ ئەوەی ستافەكەی لەگەڵ بێت، لەكاتێكدا ئێمە خۆمان گرفتی كەمی كارمەندی تەندروستیمان هەیە، بۆیە واباشتر ئەوەندەی حكومەت بیر لەم جۆرە چارەسەرانە بكاتەوە، واباشترە بەجدی بیر لە نۆژەنكردنەوەی بیناكان بكاتەوە، چونكە كار بەم شێوەیە بەڕێوە ناچێت.

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin