Smiley face
Smiley face
Smiley face

هێرشەکەی مەخمور لە سلێمانی شەرمەزار کرا

2017-12-07 16:36:54



ڕۆژنیوز - ڕۆزە محەمەد

 

لەدژی ھێرشەکەی شەوی ڕابردووی سەر کامپی پەنابەرانی مەخمور، ژنانی گەنجی تێکۆشەر و  کۆمەڵەی گەنجانی وڵاتپارێزی کوردستان و تەڤگەری ئازادی، گردبوونەوەیەکیان لە شاری سلێمانی ڕێکخست.

 

ئێوارەی ئەمڕۆ، لەبەردەم باخی گشتی شاری سلێمانی، بە پێشەنگایەتی ڕێکخراوی ژنانی گەنجی تێکۆشەر و بەبەشداری تەڤگەری ئازادیی کۆمەڵگەی کوردستان و ڕێکخراوی ژنانی ئازادی کوردستان-ڕژاک و کۆمەڵەی گەنجانی وڵاتپارێزی کوردستان، گردبوونەوەیەک بۆ شەرمەزارکردنی هێرشەکەی شەوی ڕابردووی سەر کامپی پەنابەرانی شەهید ڕۆستەم جودی لە مەخمور ئەنجامدرا.

 

شەیما عەتا، ئەندامی ژنانی گەنجی تێکۆشەر لە کۆنگرەیەکی ڕۆژنامەنووسیدا، بەیاننامەی ڕێکخراوەکەی خوێندەوە، کە تێیدا ھاتبوو:"ئێمە وەکو میللەتی کورد حکومەتی عێراقی و نەتەوە یەکگرتووەکان لەم ڕەوشە بە بەرپرسیار دەبینین و لەگەڵ ئەوەی ھیچ چاوەڕوانییەکمان لە دەوڵەتانی داگیرکەر نییە، پێمان وایە پێش ھەموو شتێک لایەنەکانی کورد پێویستە لەسەری بێنە دەنگ و یەکگرتووبن لەبەرامبەر داگیرکەران، ھەروەھا بێدەنگی دەسەڵاتدارانی باشور ئەگەر بەم شێوازە بەردەوام بێت کەواتە لەم ھێرشانە ڕازین".

 

شەیما عەتا

 

ئاماژەش بەوەدرابوو:"ئەم ھێرشە و ھێرشەکانی دیکە بۆ سەر گەلەکەمان لە چوارپارچەی کوردستان ئەوەمان بۆ دەردەخات، کە دوژمنانی کورد یەکیان گرتووە، ئەگەر بێت و کورد یەکگرتوو نەبێت، ئەوا زۆر دەرفەتی مێژوویی لە دەست دەدات".

 

هەر لە گردبوونەوەکەدا، کاروان عومەر، ئەندامی کۆمەڵەی گەنجانی وڵاتپارێزی کوردستان، بەیاننامەی کۆمەڵەکەی خوێندەوە کە تێیدا ھاتووە:"بانگ لە تەواوی گەنجانی  ئازادیخواز دەکەین، کە بەرامبەر بەم ھێرشە بێدەنگ نەبن، بە دروشمی " دوێنێ زوو سبەی درەنگە ئەمڕۆ کاتیەتی" لەبەرامبەر ئەم ھێرش و داگیرکەرییانەی سەر گەلەکەمان بەڕێوەدەچێت ھەر شوێنێک بکەنە مەیدانی سەرھەڵدان و سەنگەری خۆڕاگری بەرامبەر تەواوی ئەم ھێرشانە، وەک گەنجانی وڵاتپاێز لە باشوری کوردستان کۆی ئەم ھێرشانە بێ وەڵام ناھێڵین".

 

کاروان عومەر

 

لەبەشێکی دیکەی گردبوونەوەکەدا، داستان مەعروف، ئەندامی ڕێکخراوی ژنانی ئازادی کوردستان-ڕژاک، لە گردبوونەوەکەدا وتی: پێویستە کورد خۆیان بە ڕێکخستن بکەن و ھاوکاری کوردانی مەخمور بکەن.

 

داستان مەعروف

 

لەکۆتایی گردبوونەوەکەدا، ئازاد عومەر، ھاوسەرۆکی تەڤگەری ئازادی ھەرێمی سلێمانی لە گردبوونەوەکەدا وتی: ئەم ھێرشەی کە کرا ئیدانەی دەکەین و پێشێلکاری مافەکانی مرۆڤە و بێدەنگی نەتەوە یەکگرتووەکان و حکومەتی عێراقی دەکەوێتە ژێر پرسیارەوە، پێویستە ھەموو لایەنەکان خاوەنداری لە ھاوڵاتیانی کەمپەکە بکەین، وە پێویستە ھەموو لایەنەکان بچینە لای یەک و کۆنگرەی نەتەوەیی ببەست.

 

ئازاد عومەر

 

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin