Smiley face
Smiley face
Smiley face

دروستکردنی تەسبیحی قەزوان و بەکارهێنان و نرخەکانی .. بە وێنە

2017-12-07 10:02:08



ڕۆژنیوز – ئاشتی ئەحمەد

 

بەكارهێنانی تەسبیح لەناو گەلانی ڕۆژهەڵاتی ناوەڕاست مێژوویەکی دوورو درێژی هەیە، تاڕادەیەک پەیوەستە بە ئاینە جیاواز و یەک لەدوای یەکەکانی ناوچەکەوە هەیە، کوردیش بەهۆی ناوچە شاخاوییەکەی تەسبیحی لە زۆر کەرەستەی بەردەستی دروستکردووە، دروستکردنی تەسبیحی قەزوان یەکێکە لەو جۆرە تەسبیحانەی کە لەناو کورددا باوی هەیە.

 

دروستکردن و بەکارهێنانی تەسبیحی قەزوان، تاڕادەیەک بوەتە خوویەک و زۆرێک لەوانەی تەسبیح بەکاردەهێنن حەزیان بە تەسبیحی لەقەزوان دروستکراوە، ئەویش بەهۆی ئەوەی کە سروشتییە زۆرجار جۆر و ڕەنگی دەگمەنی تێدا دەردەکەوێت و نرخەکەی دەگاتە ٤٠٠ دۆلار.

 

 

سەبارەت بەجۆری قەزوان و فرۆشتنی لەبازاڕەكاندا، محەمەد ڕەحیم یەکێکە لەوکەسانەی کە ماوەی ١٥ ساڵە تەسبیحی قەزوان دروست دەکات و لە بازاڕی شارۆچکەی چەمچەماڵدا دەیفرۆشێتەوە، وتی، ئەو قەزوانە لەشاخەكانی كوردستان دەهێنرێت و بەئامێری تایبەتی خۆی كوندەكرێت پاشان ئێمەش دەیهۆنینەوە و گوڵینگەی لێدەبەستین و دەیفرۆشین.

 

 

باسی لەوەشكرد، بەڵام ئێستا بەهۆی خراپی كارەبا بە (درەوشە) کونی دەکەن، پاشان دەیهۆننەوە، ئەوەشی خستەڕوو كە بەشێكی زۆری خەڵك لەسنورەكەیان بەو شێوازە قەزوان کون دەكەن.

 

سەبارەت بە جۆرەکانی تەسبیح کە بەپێی جۆری قەزوانەکان دەناسرێتەوە، ئاماژەی بەوە کرد، تەسبیحی قەزوان جۆری زۆرە وەك ئەبڵەق، سبوخ، قەلەخۆرە، لاسورە، دەست نەخش، سادە، بنەشیلە، لەگەڵ چەندین جۆری دیكە.

 

سەبارەت بە زۆریی بەكارهێنانی تەسبیح، ئەو تەسبیحفرۆشە وتیشی:"تەسبیح بە گشتی وەك خوو وایە، کەسی وا هەیە بەبێ‌ تەسبیح ئیدارە ناكات.

 

سەبارەت بە نرخی تەسبیحەکانیش وتی: نرخی تەسبیحەكان بەپێی جۆر و دەگمەنیی و دانسقەیی جۆری قەزوانەکە دەگۆڕێت، بە گشتی لە سێ‌ هەزار دینارەوە تا چوارسەد دۆلار دەبێت.

 

كامەران عومەر، یەکێکە لەو کەسانەی خۆی قەزوانەکان کون دەکات و دەیانکات بە تەسبیح و دەیانفرۆشێت، بۆ ڕۆژنیوز وتی:"12 بۆ 13 ساڵ دەبێت تەسبیح دروست دەكەم، قەزوانەکە بەزۆریی لە سنوورەكانی ڕۆژهەڵاتی کوردستان دەیهێنم، وەك گوندەکانی گۆخلان، چۆمان، میشێو، کە سەربە شارۆچکەی پێنجوێنن، جگەلەوەش لە گوندەکانی دامێن چیای قەرەداغ و دوڵی شلێرش دەیهێنین.

 

 

سەبارەت بە قۆناغەکانی ئامادەکردن و کونکردنی دەنکە قەزوانەکان کامەران وتی: دەنکە قەزوانەكان دەشۆینەوە و پاشان وشكی دەكەینەوە، كونیدەکەین، دواتر دەیانهۆنینەوە و گوڵینگەیان لێدەبەستین و لەبازاڕ دەیان فرۆشین.

 

لەبارەی جۆرەکانی قەزوانیش ئاماژەی بەوە كرد: قەزوانی سنوری ڕۆژهەڵاتی كوردستان جوانترە لە قەزوانی شاخەكانی باشور، هەربۆیە زۆر جار بەهەفتە دەچمە ڕۆژهەڵاتی کوردستان بۆ هێنانی قەزوان، لە هەر سەفەرێکمدا بەشی 50 بۆ 60 تەسبیح قەزوان دەهێنم، لەو ڕێگەیەشەوە بایی 400 بۆ 500 هەزار دینار تەسبیح دەفرۆشم.

 

 

سەبارەت بەوە کە خراپیی باری دارایی خەڵک تا چەند كاریگەریی كردوەتە سەر كارەكەیان، وتی: پێش قەیرانی دارایی، ئەو قەزوانانەی لە ڕۆژهەڵاتەوە دەمانهێنا و تەسبیحمان لێ دروست دەكرد، هەریەک لە تەسبیحەکانمان بە 150 هەزار دینار دەفرۆشت، بەڵام ئێستا 50 بۆ 60 هەزار دینار زیاتر ناکات، هەرچەندە بەهۆی جۆری باشیی و جوانیی هەندێکیانەوە تەسبیح هەبووە بە سەد هەزار دیناریش فرۆشتوومە.

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojne[email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin