Smiley face
Smiley face
Smiley face

داخستنی گومرگی حاجی ئۆمەران و كاریگەرییەکانی لەسەر کاسبکاران

2017-11-19 10:51:23



ڕۆژنیوز - زۆسك باڵەك

 

كاریگەرییەکانی داخستنی مەرزی نێودەوڵەتی حاجی ئۆمەران تا دێت زیاتر دەردەکەوێت لەسەر کاسبکارانی دەروازەکە، كاسبكارانیش دەڵێن مانەوەی گومرگەكە بە داخراوی ئەگەری كۆچكردنی خەڵك و چۆڵبوونی ناوچەكەی لێ دەكەوێتەوە، چونكە بەشێكی زۆری خەڵك ژیانیان لەسەر ئەو مەرزە نێودەوڵەتیبەیە.

 

لە ڕۆژی 24/9ی ئەمساڵ، ئێران هەموو سنوورەکانی بەڕووی هەرێمی کوردستاندا داخست، لەگەڵ ئەوەی دواتر دەروازەی سنووریی باشماخی کردەوە، بەڵام تا ئێستا دەروازەی سنووریی حاجی ئۆمەران بە داخراوی ماوەتەوە.

 

 

هاوكار ستار، شۆفێری بارهەڵگر لە گومرگی حاجی ئۆمەران بە ڕۆژنیوزی ڕاگەیاند: داخستنی دەروازەی سنووریی حاجی ئۆمەران كاریگەرییەكی زۆر خراپی لەسەر ژیانی ئێمەی شۆفێری بارهەڵگر دروستكردووە، ئەوە نزیكەی مانگ و نیوێك دەبێت ئێمە بێكارو كاسبی لە ناوچەكە ماوینەتەوە.

 

 

ئەو شۆفێرە دەشڵێت: جموجۆڵی بازرگانی ئاسایی بوو ئێمە لە هەفتەی دوو بار تا سێ بارمان هەبوو كە ئەمەش بەشێكی زۆر لە بژێوی خۆمان و ماڵ و كەسوكارمانی دابین دەكرد، بەڵام ئێستا ئەو داخستنە كاریگەرییە خراپەكەی دەركەوتووە، ئێستاکە تا دێت بار و گوزەرانی شۆفێران و كاسبكارانمان خراپتر ئەبێت.

 

وتیشی، داواكارین لە حكومەتی هەرێم و لایەنی پەیوەندیدار هەوڵێكی جدی بدەن بۆ ئەوەی بە زووترین كات گومرگەكە بكرێتەوەو جموجۆڵی بازرگانی ئاسایی ببێتەوە لە سنورەكە، ئەگەرنا ناچارین بۆ دۆزینەوەی كاری تر بژێوی خۆمان ناوچەكە جێبێڵین و بەرەو شوێنێكی تر بڕۆین، چونكە ئۆتۆمبێل هەیە ژیانی سێ تا چوار خێزانی لەسەرەو هەر خێزانێكیش كۆمەڵێك خوێندكار و كۆمەلێك منداڵی هەیە كە هەموویان لەسەر داهاتی ئەو ئۆتۆمبێلە بەرێوەدەچن.

 

ئاكۆ تاهیر ئەنجومەنی گشتی شۆفێرانی بارهەڵگری گومرگی حاجی ئۆمەران بە ئاژانسی ڕۆژنیوزی ڕاگەیاند: بەشێكی زۆری خەڵك و شۆفێر ژیانیان لەسەر ئەم گومرگەیە كە بەتەنیا شۆفێرانی بار هەڵگر كە لە خەتی گومرگی حاجی ئۆمەران كار ئەكەن بە شێوەی فەرمی (633) شۆفێرە كە ئەمەش ئێستاکە هیچ كارو كاسبییەكیان نەماوە.

 

 

هەروەها وتیشی: ئەگەر داخستنی سنورەكە بە بەردەوامی بمێنێتەوە، ناچار شۆفێران دەبێت ئۆتۆمبێلەكانیان بە زەرەر بفرۆشنەوە و لەو ناوچەیە كۆچ بكەن بۆ شارێكی تر و كارێكی تر بدۆزنەوە، ئەوەش دووبارە (تەرحیل)كردنەوەیەكی تری باڵەكایەتییە و چۆمان لە شارۆچكەیەكی گەورەوە دەكاتە شارەدێیەكی بچوك و بێ داهات.

 

ئەو ئەنجومەنە وتیشی، ئێستا شۆفێران زۆربەیان قەرزدارن، بەهۆی ئەوەی لەسەر داوایەكی ئیران ئۆتۆمبێلەكانیان گۆڕی لە تاك بۆ كەپس یان بۆ جۆرێكی گەورەتر كە هەندێكیان كەموكوڕیان هەبوو، بەڵام لەگەڵ ئەو داخستنە ئێستا بە پلەی یەك ئەو شۆفێرانەن كە زیانی زۆریان بەركەوتووەو قەرزێكی زۆریان دەكۆڵدا هاتووە و ئێستاش بێكارن.

 

لەبارەی كردنەوەی مەرزەكەش وتی، ئەوەی ئێمە ئاگاداربین لە پەرلەمانی ئیران بڕیاردرا هەردوو مەرزی حاجی ئۆمەران و پەروێزخان پێكەوە بكرێنەوە، بەڵام تا ئێستاش هەر داخراون، بۆیە پێمانوایە داخستنی مەرزەكە سیاسییە.

 

دەشڵێت، مەرزی حاجی ئۆمەران جگە لەوەی بەشی هەرە زۆی خەڵكی ئەو سنورە بەرژەوەندیان لەگەڵ ئەو مەرزەدایە، بەڵام لە پیرانشاری ڕۆژهەڵاتی كوردستانیش خەڵكێكی زۆر ژیانیان لەسەر ئەو مەرزەیە كە بەس كرێكاری پیرانشار ژمارەیان پێنج هەزار دەبێت و ڕۆژانە لەو مەرزە كاردەكەن، بەڵام ئێستا ئەوانیش بێكارن، بۆیە داواكارین ئەو مەرزە بكرێتەوەو خەڵك و شۆفێران و كاسبكارانیش بكەونەوە سەر بارو گوزەرانی ئاسایی خۆیان.

 

ژیار دڵشاد، ئابوریناس لەو بارەیەوە بە ڕۆژنیوزی ڕاگەیاند: داخستنی گومرگی حاجی ئۆمەران كاریگەریی نەرێنی بەتەنیا لەسەر شۆفێران یان پیلەوەر یان كارمەندان و بازرگانانی ئەو سنورە دروست نەكردووە، بەڵكو بەشێوەی ڕاستەوخۆ و ناڕاستەوخۆ، لەسەر ٧٠%ی خەڵكی ئەو سنورە بە گشتی و بەشێك لە ناوچەكانی تری دروستكردووە.

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin