Smiley face
Smiley face
Smiley face

بومەلەرزەکە بووە هۆی هەڵقوڵانی ١٠ کانی لە گوندێکی گەرمیان

2017-11-18 13:06:31



ڕۆژنیوز - بۆتان گەرمیانی

 

لە گوندێکی گەرمیان، دوای بومەلەرزەکە زیاتر لە ١٠ کانیاو و سەرچاوەی ئاوی دروستبووە، پسپۆڕێکی فیزیا-ش دەڵێت: ئەو کانیاوە لە ئەنجامی جوڵەی پلێتەکانی ژێر زەوییەوە دروستبووە.

 

پاش ئەو بومەلەرزە بەهێزەی کە شەوی ١٢ی ئەم مانگە بە چڕیی ڕۆژهەڵاتی کوردستان و بەشێکی باشوری کوردستانی گرتەوە، زەرەر و زیانێکی زۆری ماددی و گیانی لێکەوتەوە، بەڵام لە گوندی بەرلوت سەر بە شارۆچکەی کەلاری ناوەندی ئیدارەی گەرمیان، بە پێچەوانەوە بووە هۆی ئەوەی زیاتر لە ١٠ کانی و سەرچاوەی ئاوی لە گوندەکەیان هەڵقوڵاوە، کە بۆ خواردنەوە و کشتوکاڵ و ئاژەڵ بەکاری دەهێنن.

 

 

ئەرسەلان ئەحمەد، دانیشتوی گوندی بەرلوتە بۆ ڕۆژنیوز وتی:"بومەلەرزەکە بۆ ئەم گوندەی ئێمە بوو بە قازانج، چونکە ئاوی ژێر زەویی هێناوەتە سەرەوە و چەند کانی لێ دروستبووە، نزیکی پێنج کانیمان وشکی کردووە، بەڵام زیاد لە ١٠ کانی دروستکردووە".

 

 

ئەرسەلان، وتیشی:"ئاوی ئەم کانییانە زۆر لەو ئاوانەی بازاڕ ڕوون و پاکترە کە پێی دەڵێن ئاوی کانزایی و بۆ خواردنەوە و کشتوکاڵ و ئاژەڵیش بەکاری دەهێنین".

 

هەروەها، محەمەد فەرەج، گوندنشینێکی بەتەمەن بوو کە ماوەی ٥٠ ساڵ دەبێت لەو گوندەدا دەژی و بە ڕۆژنیوزی وت:"من ساڵانێکی زۆرە لەم گوندەدا دەژیم، هەتاکو ئێستا ئاوی گوندەکەمان بەمشێوەیە زۆر نەبووە، بە جۆرێک کە هەر ماڵێک و کانییەکی بۆخۆی هەبێت".

 

 

هەر لەو بارەیەوە، جەمیل محەمەد، مامۆستای بەشی فیزیا لە زانکۆی گەرمیان بە ڕۆژنیوزی وت:"بومەلەرزە پێش ڕوودانی و پاش ڕودانیشی جگە لە زەرەرو زیان هاوکات هەندێک سود و لایەنی باشیشی هەیە، لە هەندێ جێگەشدا ئاوی ژێر زەوی زۆر لە قوڵاییدایە، بەڵام  بومەلەرزە ئاوەکە هەڵدەدات بۆ چینێکی بەرزتر کە بەردەست دەبێت بۆ مرۆڤ".

 

 

ئەو مامۆستایەی زانکۆی گەرمیان، وتیشی:"دروستبوونی ئەم حاڵەتە دەگەڕێتەوە بۆ چەند هۆکارێک لەوانە، جوڵەی ئاسۆیی پلێتەکانی ژێر زەویی لەگەڵ یەکتر کە ئاڕاستەی ئاوی ژێر زەوی دەگۆڕێت لەگەڵ ئاوی سەر زەوی، یان دوو پلێت کە یەکیان بچێتە سەرەوە و ئەویتر نزم بێتەوە دەبێتەهۆی ئەوەی کە ئاوی ژێر زەوی لە ناوچە جیاجیاکاندا بەشێکی بێتە سەرەوە و بەشێکی بچێتە قوڵایی زەوی".

 

جەمیل محەمەد، وتیشی:"لەوانەیە ئەم گۆڕانە بۆ هەمیشەیی بێت، لەبەرئەوەی ئەم بومەلەرزەیەی کە ڕوویدا بە پلەی ٣ .٧ ڕێختەر بوو، بومەلەرزەیەکی بەهێزبوو، بۆیە پێدەچێت چەند ساڵ بخایەنێت بۆ گەڕانەوەی ئەو ئاوانە بۆ دۆخی جارانی خۆی".

 

 

ش.ف

 

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin