Smiley face
Smiley face
Smiley face

وەرزی زستان ڕەوشی ئاوارەکان خراپتر دەکات

2017-11-18 10:52:27



ڕۆژنیوز – هاوکار مستەفا

 

لەگەڵ هاتنی وەرزی زستان و نزمبونەوەی پلەکانی گەرما ژیانی ئاوارەکانی کامپی بەرزنجە لە دۆخێکی خراپدایە و سوتەمەنیی پێویستیان نییە بۆ خۆ گەرمکردنەوە، سەرپەرشتیاری کامپەکەش هۆشداریی دەدات لە زیاتر خراپ بوونی ڕەوشی ئاوارەکان.

 

هێرشەکانی حەشدی شەعبی و سوپای عێراق بۆ سەر شاری کەرکوک و شارۆچکەی خورماتوو لە رۆژی ١٦/ئۆکتۆبەر، بووەهۆی ئاوارەبوونی هەزاران خێزانی کورد، لەو چوارچێویەشدا ١٢١ خێزانی کورد کە ژمارەی ئەندامانی خێزانەکانیان دەگاتە ٥٨٥ کەس لە کامپی بەرزنجەی سەر بە شارۆچکەی سەیدسادق نیشتەجێبوون، بەشێک لەو ئاوارانە لەم ڕاپۆرتەی ڕۆژنیوز-دا باس لە گوزەرانی خۆیان دەکەن و گرفتەکانی خۆیان دەخەنەڕوو.

 

سەبارەت بە دۆخی ژیانیان، سیروان مەجید، یەکێک لە ئاوارەکانی خورماتوو و نیشتەجێی کامپەکە وتی: ئێمە بەم کەشوهەوا ساردەی ئێرە ڕانەهاتووین، پلەکانی گەرما زۆر نزمە بەتایبەت لە شەواندا، بۆیە زۆپا کارپێدەکەین.

 

سیروان مەجید

 

سیروان مەجید، ئاماژەی بۆ ئەوە کرد، کە لەڕووی دابینکردنی سووتەمەنییەوە هاوکاری پێویستیان نەکراوە و وتی: تا ئێستا نزیکەی چوار دەبەی ٢٠ لیتریی نەوتمان پێدراوە، کە بەشی چەند ڕۆژێکی کەمی کردووین.

 

ناوبراو، وتیشی: هەروەک چۆن گەڕانەوەمان زۆر ئەستەمە بۆ سەر ماڵ و حاڵی خۆمان لە خورماتوو بەهەمان شێوەش ئەگەر بەم حاڵەوە ژیان بگوزەرێنین و سوتەمەنی پێویستمان بۆ دابین نەکرێت ژیانی ئێرەشمان سەخت دەبێت و ناچاردەبین کامپەکە جیبهێڵین و بچینە خانووی کرێوە.

 

هەروەها، بەهیجە جەلال، ئاوارەیەکی شاری کەرکوک-ە و وتی: پێداویستی ڕۆژانە و خۆراک لەلایەن ڕێکخراو و خێرخوازانەوە هاوکاریمان کراوە، بەڵام ئەو سوتەمەنییەی کە بۆمان دابیندەکرێت وەک پێویست بەشمان ناکات و ناچارین بۆ حاڵەتێکی زۆر زۆر پێویست نەبێت بەکاری نەهێنین.

 

بەهیجە جەلال

 

سەبارەت بە هۆکاری نەگەڕانەوەیان بۆ شوێنی خۆیان، بەهیجە، وتی:"وەک ئەوەی پێمان وتراوە هێشتا دۆخی ناوشاری کەرکوک جێگیر نییە و لەلایەن حەشی شەعبییەوە شەوانە خەڵک دەڕفێندرێت بەتایبەت کوردەکان، بۆیە نامانەوێت لەم نەهامەتییەوە بچینەوە نەهامەتییەکی تر دانمان بەخۆماندا گرتووە تا ڕەوشەکە بەلایەکدا بکەوێت".

 

جاسم نادر، یەکێکی تر لەئاوارەکانی شاری کەرکوک ڕایگەیاند: ژیان و گوزەرانمان لەم کامپەدا زۆر سەختە، دۆخی دارایمان زۆر خراپە و ئەوەی پێمان نەدرێت لەم کامپەدا لەلایەن ڕێکخراوەکانەوە خۆمان توانای کڕینی هیچ شتێکی ترمان نییە".

 

جاسم نادر

 

لە بەرامبەردا، هاوژین عوسمان، سەرپەرشتیاری کامپی بەرزنجە بە وتی: هەرچەندە توانیومان چەند جارێک بە دەبە سووتەمەنی بەسەر ئاوارەکاندا دابەش بکەین، بەڵام ئەمە لەئاست پێویستدا نییە و دەبێت بە بەرمیل سوتەمەنییان بدەینێ،‌ لەئێستاشدا هیچ بڕێکی وا سوتەمەنیمان لەبەردەستدا نییە.

 

هاوژین عوسمان

 

هاوژین عوسمان، وتیشی: ئێمە لایەنێکی جێبەجێکارین، بۆیە چاوەڕێی حکومەت و ڕێکخراوە ناوخۆیی و دەرەکییەکان دەکەین پێداویستییەکان بەتایبەت نەوتمان بۆ دابین بکەن و ئێمە دابەشی بکەین، بۆ ئەو مەبەستەش بەنوسراوی فەرمی هەم ڕێکخراوەکان و هەمیش حکومەتمان ئاگادار کردووەتەوە، بەڵام تائێستا بڕێکی وامان بۆ دابین نەکراوە، بۆیە ئەگەر بەزووترین کات سوتەمەنی دابین نەکرێت ئاوارەکان بەتایبەت لە شەواندا ڕەوشێکی باشیان نابێت.

 

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin