Smiley face
Smiley face
Smiley face

ژنانی ئاشتی هاوکارییان گەیاندە ئاوارەکانی خورماتوو

2017-11-15 16:32:40



ڕۆژنیوز –  بۆتان گەرمیانی 

 

کەمپەینی ژنانی ئاشتی، کە ژمارەیەک لە ڕێکخراوەکانی ژنان لە سلێمانی لەخۆ دەگرێت، هاوکاری گەیاندە ئاوارەکانی شارۆچکەی خورماتوو، لە سنووری گەرمیان.

 

دوانیوەڕۆی ئەمڕۆ، لە هۆڵی بارەگای مەڵبەندی ٦ی گەرمیانی کۆمەڵی ئیسلامی کوردستان، وەفدێکی کەمپەینی ژنانی ئاشتی، کە لە ١٠ ڕێکخراوی ژنانی سلێمانی پێکهاتوون، لە شارۆچکەی کەلار ناوەندی ئیدارەی گەرمیان، کۆمەک و هاوکارییان بەسەر ئاوارەکانی شارۆچکەی خورماتووی سەربە پاریزگای سەلاحەدین دابەشکرد.

 

 

ژینۆ حەمە ڕەشید، ئەندامی ڕێکخراوی ژنانی ئازادی کوردستان-ڕژاک و ئەندامی کەمپینەکە، بۆ ڕۆژنیوز قسەیکرد و وتی:"ئێمە لە سلێمانییەوە هاتووین ١٠ ڕێکخراوین و کەمپەینێکمان دروستکردووە بە ناوی "کەمپینی ژنان بۆ ئاشتی"، بۆ هاوکاریکردنی ئاوارەکانی خورماتوو، ئێمەش وەکو ڕێکخراوی ژنانی ئازادی کوردستان، بەشداریمانکرد لەم کەمپینەدا، ئەمڕۆش چوار کەسمان وەکو نوێنەر هاتینە گەرمیان".

 

 

ژینۆ، وتیشی:"کۆمەڵێک پێداویستی، ڕاخەر، کەلوپەلی زستانە و یاری منداڵانمان بۆ هێناون و دابەشی دەکەین بەسەریاندا، دەمانەوەێت لە نزیکەوە گوێ لە داواکارییەکانیان بگرین، بەتایبەتی ژنان و ئەوەی لە تواناماندا هەیە بۆیان بکەین".

 

شنۆ عەبدوڵا ئەندامی سکرتارێتی ڕێکخراوی خوشکان و ئەندامی کەمپینی ژنانی ئاشتی، بە ڕۆژنیوزی وت:"بەڕاستی بارودۆخی ئاوارەکانی خورماتوو تادێت بەرەو خراپی دەچێت، دیارە ماوەک بەسەر ئاوارەبوونیاندا تێپەڕیوە بەهۆی ڕووداوە یەک لەدوای یەکەکانی هەرێمی کوردستان، ئێمە هەستمانکرد کە کەمتر باس دەکرێن و کەمتر هاوکارییان پێدەگات".

 

 

دەشڵێت:"ئێمە هەوڵی تەواو دەدەین، کە ئەمە دوا کارمان نەبێت، چونکە ئێمە لە ڕێگای ئەم کەمپەینەوە زیاتر لە کەموکورتییەکانی ژنان تێگەشتین، هەوڵیش دەدەین کە ڕێکخراوەکانی تریش بخەینە ئەم پرۆژەوە، بۆ ئەوەی بتوانین هاوکارییەکی باشتر بگەیەنینە ئەو خێزانە ئاوارانە".

 

وشیار کامل، ئاوارەیەکی شارۆچکەی خورماتوو، بە ڕۆژنیوزی وت:"سوپاسی ئەم ڕێکخراوانە دەکەین، کە توانیویانە دەستی هاوکارییمان بۆ درێژ بکەن، چونکە بەڕاستی حکومەتی هەرێم هیچی بۆمان نەکردووە".

 

 

ئەو ئاوارەیە، ئەوەشی خستەڕوو:"بەهۆی سەرما و باو بارانەوە، جێگەی مانەوەمان پێویستە، لەگەڵ نەوت و زۆپا، یان کارمان بۆ بکرێت بگەڕێینەوە جێگەی خۆمان، یان پێداویستییەکانمان دابین بکرێت، حکومەتی هەرێم هیچکام لەمانەی بۆ دابین نەکردووین، بۆیە داوا لەم ڕێکخراوانە دەکەین کە لە بیرمان نەکەن".

 

 

ب.ل 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin