Smiley face
Smiley face
Smiley face

کاڵکان: لە ساڵی ٤٠می پەکەکەدا گەورەترین شەڕدەکەین و سەردەکەوین

2017-11-15 09:35:24



ڕۆژنیوز - ناوەندی هەواڵەکان

 

دوران کاڵکان، ئەندامی کۆمیتەی بەرێوەبەرایەتی پارتی کرێکارانی کوردستان- پەکەکە، ڕایدەگەیەنێت: ساڵی ٤٠-ەمی پەکەکە گەورەترین شەڕدەکەین و سەردەکەوین.

 

دوران کاڵکان شەوی ڕابردوو میوانی بەرنامەی "ئولکەدەن"ی تەلەفزیۆنی مەدیا خەبەر بوو، لەبارەی ساڵی ٤٠-ەمی پەکەکە، سەرکەوتنی ڕەقە و شۆڕشی داهاتووی کورد قسەیکرد.

 

دوران کاڵکان وتی: لە کۆبوونەوەی ساڵانەی کۆمیتەی ناوەندیی پەکەکەدا، ئەندامانی کۆمیتەکە ساڵی ٤٠می پەکەکەیان بە گرنگ نرخاند، کۆمیتەی ناوەندیی پەکەکە پلانسازییەکی بۆ ساڵی ٤٠-ەم ئامادەکرد، بانگەوازیی هەموو ئەندامانی حزب و هەموو ئەوانەی لە سەر ڕێبازی ڕێبەرایەتین دەکەین، کە لە سەر هێڵی سەرکەوتن دا تێبکۆشن.

 

کاڵکان هەروەها گۆشەگیرکردنی ئۆجالانی بەبیرخستەوەو، وتی: گۆشەگیرکردنی ڕێبەرایەتی گرنگترین بابەتی کۆبوونەوەکانمان بوو، هاوکات ڕەخنەی زۆر جدیمان لە خۆمان گرت، بەردەوامبوونی دۆخێکی بەم شێوەیە زۆردارانە مەترسیی قورس دەخاتە سەر گەلەکەمان.

 

لە بەشێکی دیکەی قسەکانیدا باسی لەوە کرد، کە ساڵی ٤٠-ەم لە هەموو بوارەکان و مەیدانەکاندا دەبێتە ساڵی شۆڕش و، وتی: باوەڕمانوایە کە ساڵی ٤٠-ەم ئەنجامی تێکۆشانی ٣٩ ساڵەی پەکەکە دێتە دی، ئێمە لە ساڵی نوێدا گەورەترین شەڕ دەکەین و گەورەترین سەرکەوتنیش بە دەست دێنین، پێمانوایە ساڵی ٤٠-ەمی پەکەکە ساڵی شۆڕشە.

 

لە بەردەوامیدا ئاماژەی بە سەرکەوتنی هێزەکانی سوریای دیموکرات- قەسەدە دا و، وتی: سەردەمێکی نوێ دەستیپێکردووە، لە قەیرانی قەتەرەوە هەتاکو شەڕی تاران و هێرشەکانی تورکیا بۆسەر عەفرین زۆر ڕووداوی نوێ ڕوودەدەن، وتبوومان کە تێکچوونی داعش لە ڕەقە گۆڕانکاریی گرنگی هاوسەنگییەکانی ناوچەکەی بەدواوە دەبێت، ئەوانەی ئێستا ڕوودەدەن پەیوەندییان بە تێکچوونی داعشەوە هەیە، هێرشی سوپای عێراق، ڕیفراندۆم و ڕووداوەکانی سعودی و لوبنان بێ پەیوەندی نین بەوەی باسمان کردن.

 

کاڵکان لە کۆتاییشدا، وتی: پاش سەرکەوتن دژی داعش لە مەخمور و شەنگال و کۆبانێ، تێکۆشانی گەلی کورد لە باکوری کوردستانمان هەیە دژی فاشیزمی ئاکەپە و مەهەپەیە، ئەگەر گەلی کورد لە باکوری کوردستان دژی فاشیزمی ئاکەپە و مەهەپە تێکۆشانی نەکردبایە، بەرخۆدانی ڕۆژئاواش بەم شێوەیە نەدەبوو.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin