Smiley face
Smiley face
Smiley face

نێچیرڤان بارزانی لە نێوان بەتانی و بۆمبەکانی ئەردۆغان-دا..شرۆڤە

2017-11-14 15:02:23



ڕۆژنیوز - سۆران حسێن

 

نێچیرڤان بارزانی، لەنێوان دووبژاردەی ئەردۆغاندا، کە ناردنی چەند بەتانییەک و هەزاران بۆمبی کوشندەیە بۆ هاوڵاتی هەرێمەکەی، سوپاسی ناردنی بەتانییەکان دەکات و بێدەنگی هەڵدەبژێرێت بۆ کوشتنی هاوڵاتیانی ئەم هەرێمە بە بۆمبە کوشندەکانی ئەردۆغان.

 

١ی ئەم مانگە ئیبراهیم كاڵن-ی وتەبێژی سه‌رۆكایه‌تی كۆماری توركیا دەربارەی داواکاری نێچیرڤان بارزانی بۆ بینینی ئەردۆغان، وتی، "سەرۆک کۆمارمان ئەگەر بە گونجاوی بزانێ لەگەڵ نێچیرڤان بارزانی کۆدەبێتەوە"، بەڵام ١٤ ڕۆژ بەسەر ئەو لێدوانەدا تێپەڕیوەو هیچ بینینێکی ئەردۆغان بۆ نێچیرڤان بارزانی دیاریی نەکراوە.

 

ئەگەرچی تا ئێستا ئەردۆغان ئامادەنەبووە، کە نێچیرڤان بارزانی ببینێت، بەڵام، نێچیرڤان-ی سەرۆکی حکومەتی هەرێم و جێگری سەرۆکی پارتی، بەردەوامە لە هەوڵەکانی بۆ بینینی ئەردۆغان.

 

١٢ی ئەم مانگە بومەلەرزەیەک ڕۆژهەڵات و باشوری کوردستانی هەژاند، دوای چەند کاتژمێرێک فڕۆکەکانی دەوڵەتی تورکیا هەرێمی کوردستانیان بۆردوومانکرد و، جارێکیتر هاوڵاتی مەدەنییان کردە ئامانج و شەهیدیان کرد.

 

هەمان کاتی بۆردوومانەکە، دەوڵەتی تورکیا کە سودمەنترین دەوڵەتە لە ژێرخان و سەرخانی هەرێمی کوردستان، چەند بەتانییەکی بە فڕۆکەیەک ناردە هەرێمی کوردستان، کە دەکرێت بوترێت پارەی کەمتر لە یەک خولەکی داهات و ڕێژەی هەناردەی نەوتی هەرێمە بۆ ئەو وڵاتە، سەرنج ڕاکێش بوو، نێچیرڤان بارزانی بەرامبەر شەهیدکردنی هاوڵاتیانی هەرێمەکەی بێدەنگەی هەڵبژارد و بەرامبەر ناردنی چەند بەتانییەک، پێش گەیشتنی فڕۆکەکە سوپای حکومەتەکەی ئەردۆغانی کرد.

 

سەتان کەس لە تۆڕی کۆمەڵایەتی فەیسبووک لە بەرامبەر بەتانییەکانی ئەردۆغاندا نووسیویانە "بۆردوومانمان مەکە و بەتانیمان ناوێ!"، لەگەڵ ئەوەشدا ڕەخنەی توندی بێدەنگی حکومەتی هەرێمیان کردووە، بەرامبەر بۆردوومانەکانی دەوڵەتی تورک.

 

وەک هەندێک چاودێری سیاسیش باسیان لێوەکردووە، سوپاسەکەی نێچیرڤان بارزانی بۆ حکومەتەکەی ئەردۆغان، دەگەڕێتەوە بۆ ئەو هەوڵانەی نێچیرڤان دەیدات بۆ بینینی ئەردۆغان و، وەک ١ی ئەم مانگە ئیبراهیم كاڵن وتی، ئەگەر ئەردۆغان بە گونجاوی بزانێ لەگەڵ نێچیرڤان بارزانی کۆدەبێتەوە، بەڵام دیارە لە ئێستادا کاری زیاری بە نێچیرڤان ماوەو ئامادەیی بۆ بینینی پیشان نەداوە.

 

ئەو وتانەی کاڵن و ڕەتکردنەوەی بینینی نێچیرڤان لەلایەن ئەردۆغانەوە، لە کاتێکدایە، کە حکومەتەکەی نێچیرڤان و دەوڵەتی تورک گرێبەستی ٥٠ ساڵەی نەوتیان لە نیواندایە، وەک سیاسییەکانیش وتیان، لە ئێستادا تورکیا دەستی بەسەر ملیۆنان دۆلاری نەوتی هەرێمدا گرتووەو دەڵێت ڕادەستی بەغدای دەکەینەوە.

 

ئەمانە لە کاتێکدا ڕوودەدەن، لە هەڵبژاردنەکانی ٢٠١٤ی تورکیادا، مەسعود بارزانی سەرۆکی پێشووی هەرێم و سەرۆکی ئێستای پارتی، هاوشانی ئەردۆغان بە شارە کوردییەکاندا دەسوڕایەوەو بانگەشەی بۆ ئەردۆغان و ئاکەپە دەکرد، بەڵام دوای ئەنجامدانی ڕیفراندۆم لە هەرێمی کوردستاندا، بەشیوەیەکی زۆر توندو قسەی نەشیاویش، ئەردۆغان لە میدیاکانەوە هێرشی دەکردە سەر بارزانی و حکومەتی هەرێم.

(بارزانی لە کاتی بانگەشەدا بۆ ئەردۆغان و ئاکەپە)

لە دوای ئەو هێرشانەوە، تورکیا بەردەوام بووە لە بۆردوومانی ناوچە سنوورییەکانی هەرێمی کوردستان، لە بری هەڵویست وەرگرتن بەرامبەر ئەردۆغان و حکومەتەکەی، کە ئێستا لە تورکیاشدا بەرەو شکست هەنگاو دەنێت، نێچیرڤان بارزانی و حزبەکەی و میدیاکانی، هەموو هەوڵێکیان بۆ دووبارە نزیکبوونەوەیە لە ئەردۆغان، ئەمەش هەمووانی بەوە گەیاندووە، کە نێچیرڤان و حزبەکەی لە پێناو بەرژەوەندی خۆیاندا، ئامادەن بۆ هەموو سازشکردنێک، هەربۆیە ئێستاش پێش گەیشتنی فڕۆکەکەی تورکیا، نێچیرڤان سوپاسی بەتانییەکانی ئەردۆغانی بۆ هەرێمی کوردستان کرد.

 

لە کاتێکدا، کە زۆرینەی لایەنە سیاسییەکانی چوارپارچەی کوردستان و ڕێکخراوە کوردییەکانی ئەوروپاو تەنانەت کەجەکەش، بانگەوازی کەمپەین و هاوکاری بەپەلەیان بۆ لێقەوماوانی بومەلەرزەکە کردووە، بەڵام نێچیرڤان بارزانی خۆی و حکومەت و حزبەکەشی هیچ هەوڵێکی لەو شێوەیەشیان نەبووە، بچوکترین هاوکاری لێقەوماوانی بومەلەرزەکەی هەرێمی کوردستانیان نەکردووە، لەجیاتی هەماهەنگی لەگەڵ ئەو لایەنانەدا، جارێک سوپاس نامە ئاراستەی دەوڵەتی تورک دەکەن لەبەرامبەر ناردنی چەند بەتاننییەکدا، ئەمەش ئەوە دەردەخات، لێرەشدا هیچ یەکڕیزی و یەکدەنگی کوردیان بەلاوە گرنگ نییە، بەڵکو سود لە ئەزموونی ئەو هەموو شکستە نابینن و جارێکیتر پش بە وڵاتانی دەوروبەروو نەیارانی کورد و ئازادیخوازان دەبەستن.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin