Smiley face
Smiley face
Smiley face

نوێنەری پەیەدە لە باشور: یەکنەگرتنمان هۆکاری ئەمەیە بەسەرماندا هاتووە

2017-10-23 18:59:43



ڕۆژنیوز - محەمەد حەسەن

 

لە سیمینارێکدا لە شارۆچکەی رانییە، نوێنەری پارتی یەکێتی دیموکراتی- پەیەدە، لە باشوری کوردستان وتی، هەموو داگیرکەران دژمان یەکیان گرتووە، بەداخەوە یەکنەگرتووی ئێمەش وایکرد، ئەمەی دەیبینین بەسەر گەلەکەماندا لە باشودا هاتووە.

 

ئێوارەی ئەمڕۆ لە شارۆچکەی ڕانیەی ناوەندی ئیدارەی ڕاپەرین، سمینارێک لە سەر باروودۆخی ڕۆژهەڵاتی ناوەراست و سیستمی خۆبەڕێوەبەری لە ڕۆژئاوای کوردستان، بۆ سولەیمان عەرەب، نوێنەری پەیەدە لە باشوری کوردستان ڕێکخرا.

 

سولەیمان سەبارەت بە ئالۆزییەکانی ڕۆژهەڵاتی ناوەڕاست و پێگەی گەلی کورد، وتی:"ئەمڕۆ گەلی کورد لە ڕۆژهەڵاتی ناوەڕاست ڕۆلێکی گرنگی هەیە لە دووبارە دیزاینکردنەوەی ڕۆژهەڵاتی ناوەراست، لە ئێستادا سیستمی خۆبەڕێوەبەری دیموکرات لە ڕۆژئاوای کوردستان و باکوری سوریا بەباشی جێگای خۆی گرتووە، کە فکری ڕێبەر ئاپۆیە".

 

 

وتیشی:"لە ڕۆژی ئەمڕۆدا هەموو داگیرکەرێک و دوژمنی کورد لە بەرامبەر کورد یەکیان گرتووە، بەڵام بە داخەوە کورد تا ئێستا نەیانتوانیوە یەکیتی خۆیان بە دەست بێنن، دەبینین لە سەر ئەو یەک نەگرتنە ئەمڕۆ باشوری کوردستان دوای ئەو هەموو ساڵە دووچاری چ کارەساتێک هات، لێرەدا ڕێبەر ئاپۆ چەندین ساڵە هاواری یەکیتی و یەکگرتنی کوردان دەکات، بەڵام بە داخەوە لەلایەن چەند لایەنێکی دیاریکراوەو کۆنگرەی نەتەوەیی ئاستەنگ دەکرێت.

 

سولەیمان ئەوەشی وت: ئەو سیستمەی کە لە ڕۆژئاوای کوردستان و باکوری سوریا جێگیربووە، بە پێویستی دەزانین کە لە بەشەکانی دیکەی کوردستان کاری پێکرێت، چونکە نموونەی ڕۆژئاوای کوردستان و باکوری سوریا سیستمی پێکەوە ژیانە، دەتوانین بڵین ژنان پێشەنگ بوون لەو دەستکەوتانەی کە لە ڕۆژئاوا بە دەستخراوە.

 

لە کۆتایی قسەکانیدا سولەیمان عەرەب نوێنەری پەیەدە لە باشوری کوردستان، وتی: ئەو ئەزموونەی کە لە باشوری کوردستان هەیە پێویست دەکات کە بە هەموومان بیپارێزین، چونکە لە پێناو ئەو دەستکەوتانە شەهیدێکی زۆر دراوە، بۆیە ئەرکی هەر تاکێکە کە بە هەمووان لە هەر شوێنێکی ئەو جیهانەبین خاوەنداری لە نرخ و بەهاکان بکەین، لە ئیستاشدا دۆخی ڕێبەر ئۆجالان نادیارەو گرنگە گەلی کورد لە کوردستان و وڵاتانی ئەوروپا و  هەموو جیهان بکەونە سەر شەقامەکان و خاوەنداری لێبکەن.

 

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin