Smiley face
Smiley face
Smiley face

گەنمەشامییەکی جیاواز لە دەشتی شارەزوور بەرهەم دەهێندرێت

2017-10-23 11:54:36



ڕۆژنیوز- هاوکار مستەفا

 

بۆ یەکەمجار و لەسەر ئاستی هەرێمی کوردستان گەنمەشامی هۆڵەندی لە دەشتی شارەزوور بەرهەم هێندرا، کە تامی شیرینە و تەنها بۆ برژاندن بەکاردیت، جوتیارە بەرهەمهێنەرەکەش دەڵێت: شارەزوور لەبارترین دەشتە بۆ ئەو بەرهەمە.

 

خەسرەو محەمەد، ئەو جوتیارە نمونەییەی گوندی بێڕەشکەی دەشتی شارەزوور- ە و بۆ یەکەمین جار گەنمەشامی هۆڵەندی هێناوەتە هەرێمی کوردستان و ئەمساڵ بەرهەمی هێناوە.

 

 

خەسرەو محەمەد، لە لێدوانێکیدا بۆ ڕۆژنیوز خۆشحاڵی خۆی نیشاندا بەوەی، کە یەکەم جوتیارە لەسەر ئاستی هەرێم گەنمەشامی هۆڵەندی چاندبێت و سەبارەت بە بیرۆکەی کارەکە وتی: لەلایەن بەشی توێژینەوەی بەڕێوەبەرایەتی گشتی کشتوکاڵی سلێمانییەوە دەستنیشانکرام بۆ بەرهەم هێنانی ئەم گەنمەشامییە.

 

خەسرەو محەمەد

 

ناوبراو، وتیشی: تۆوەکەم لە هۆڵەندا کڕیوە و هێناومەتە هەرێمی کوردستان.

 

سەبارەت بە تایبەتمەندییەکانی گەنمەشامی هۆڵەندی، ئەو جوتیارە، وتی: تامێکی شیرینی هەیە و تەنها بۆ برژاندن بەکاردێت و ناتواندرێت بکرێت بە عەلەف و ئارد.

 

 

وتیشی: لە ماوەیەکی کەمدا پێدەگات و تەنها سێ مانگی پێویستە، بەجۆرێک لە ١٥/تەموز دەستدەکرێت بە چاندنی و لە ١٥/تشرینی یەکەم دەستدەکرێت بە لێکردنەوەی و پاشان دەکرێتە ناو زەرفی تایبەت و لە عەلوەی سلێمانی ساغی دەکەینەوە، ئاسانیش ساغدەکرێتەوە و خواستی زۆری لەسەرە، لە هەموو شت گرنگرتر ئەوەیە، کاتێک دەچێندرێت، کە جوتیار پێویستی بە زوەیەکەی نابێت بۆ بەرهەمی تر.

 

 

ئەو جوتیارەی دەشتی شارەزوور، ئامادەیی خۆیشی دەربڕیی، کە لە ساڵانی داهاتوودا هەر جوتیارێک لە دەشتی شارەزوور بیەوێت ئەو جۆرە بەرهەمە بچێنێت ئامادەیە ڕێنمونی پێویستی بکات، چونکە وەک ئەو باسیکرد"دەشتی شارەزوور لەبارترین دەشتە و لەڕووبەڕی یەک دۆنم زەوی دەتواندرێت بڕی دوو تۆن و ٥٠٠ کیلۆ لەو جۆرە گەنمەشامییە بەرهەم بهێندرێت".

 

 

بەدەر لە بەرهەم هێنانی ئەو جۆرە گەنمەشامییە، خەسرە محەمەد، ئاماژەی بە بەرهەمهێنانی جۆرە نۆک-ێک کرد، کە لە مانگی ئایار-دا هەم دەچێندرێت و هەمیش دەستکەنە دەکرێت، بەشێوەیەکە کە لە مانگی تشرینی دووەم دەچێندرێت و لە مانگی ئایار دەستکەنە دەکرێت، پاشان دووبارە لەمانگی ئایار جارێکی تر لەسەر هەمان زەوی دەچێندرێتەوە لەمانگی ئەیلول پێدەگات و وتی: ئەوە یەکەمین جارە لە هەرێمی کوردستان ئەو جۆرە نۆکە دەچیندرێت و من چاندوومە.

 

هەروەها، پەروین ئەحمەد، یەکێک لەو ژنانەی کە دانیشتووی گوندی ناوگردان-ی سەر بە شارۆچکەی سەیدسادقە و ماوەی ٢٥ ساڵە لە زەوییە کشتوکاڵییەکانی دەشتی شارەزوور و پێنجوێن کاردەکات سەبارەت بە لێکردنەوەی گەنمەشامی بە ڕۆژنیوزی وت: ماندوبوونی زیاتر دەوێت و هەروەها دەست و دەموچاویشمان تووشی هەستیاریی دەبێت، بۆیە کارێکی هەروا ئاسان نییە.

 

پەروین ئەحمەد

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin